Salmos 40 - Cofán: Chiga Tevaen'jen

Chiga in'janqquia'cantsse tsoña'cho

¹ Na'suve opatsse ronda'jesi tiseja puntssamba ñama paña'jen.

² Pañamba canse'masia chango'ye ñama somboemba tssipaccu'ye'qque somboen. Somboemba ña tsu'ttema patunga ccutsianqquia'caen fae'ngatssianga ñama fuitepa angacan.

³ Ña aya'fanga cuna settapoen'choma afaensi gi ingi Chigama avujatsse ñotsse afapa settapoen'jen. Ñama pañamba tsu tsain'bio a'i in'jamba Na'suve in'jan'faya.

⁴ ¡Nane avujatssi tsu Na'suma pañamba in'jan'choja! Joccapitssia qquen in'jan'cho a'ima iñajambi fuiteya'chove. Ni faesu chigandeccuve ttattasundeccuma afa'jembi.

⁵ Na'su, ña Chiga, tsain'bitsse qui ingine ñotsse tson'jen. Que ingine in'jan'cho'qque antte'masia tsu. ¿Majan tsu faesuja tsa'caen tsoñe oshaya? Tsane faesunga condaye in'jansi aya'fa tsu shaca pa'tssima ñotsse condaye.

⁶ Queja fi'ttipa afe'choma in'jambipa trigoma afe'choma'qque chi'ga. Nane oque oraemba afe'cho ni egae tsincon'choma joqquitssianqque'su afe'choma'qque qui in'jambi. Tsa'ma ña tsosinama qui fetta.

⁷ Tsa'cansi gi su: ¡Vani gi can'jen! Nane que tevaen'jen ñane suqquia'caen gi can'jen.

⁸ Ña Chiga, que in'janqquia'caen tsoñe gi ñoa'me avujatssi. Ña injama'choni gi que atesian'choma an'bian tsa'caen tsoñe.