Salmos 37 - Cofán: Chiga Tevaen'jen

Na'sunga antteya'cho

¹ Iyiccayejama egae tsinconsundeccu gana'jensi. Ni injama'choni se'pijama tise'pa osha'choma an'biansi.

² Junde tsu shoshovima samboenqquia'caen toya'caen te'tama pandianqquia'caen sefaen'faya.

³ Tsa'ma osha'choma Na'sunga anttepa ñotsse tsonjan va andeni opatsse can'jemba ñotssiama isuye.

⁴ Na'suma ñotsse in'jamba avujatssija. Nane tsa'caen avujatssisi tiseja que injama'cho tsosipie in'jan'choma quenga afeya.

⁵ Tisu canse'choma Na'sunga antteja. Nane tisenga osha'choma anttesi tiseja quema fuitepa tsoña.

⁶ Tiseja que ñotssiama coejechiga enttinge a'ta chanjunqquia'caen attiamba que tansintsse in'jamba su'choma'qque a'tatsse canjaeña.

⁷ Na'suma iñajamba ziyapa tise fuiteya'chove ron'daya'cho. Tsa'ma a'i egae in'jamba injanga tson'cho ñotsse naningesi que injama'choni se'pijama.

⁸ Iyicca'yejama toya'caen putsa'suve da'choma catija. Nane iyicca'ye'ninda tsu ti'tsse egave daya.

⁹ Nane Na'suja egae tsinconsundeccuma ande'ye ccuchaya. Tsa'ma Na'suve in'jamba pañasundeccuja andema isupa an'bian'faya.