Salmos 1 - Cofán: Chiga Tevaen'jen

Ñoa'me avuja'cho

¹ Avujatssi tsu tsa a'i majan ega aindeccu su'choma pañambe, ni egae tsinconsundeccu tson'chove tsombe, ni Chigave in'jambipa feñasundeccui'ccu fae'ngae afasembe canse'cho.

² Tsa'ma tiseja Na'su manda'choma pañamba avujatsse canse. Nane pa'cco a'ta cose'qque tsama asi'ttaemba in'jamba canse.

³ Tsa a'ija naifa'su quini'jian'can tsu. Nane na'en otafanga jonsi tise naite nambe pasa'jembi ni tise najen'qque pandipa sheque'jembi. Pa'cco tise tson'jen'cho tsu ñotsse sombo.

⁴ Tsa'ma ega aindeccuja tsa'caña'bi tsu. Nane tsendeccuja trigo ttonoma fingian anga catiqquia'caen tsu catiyeya'cho.

⁵ Tsa'camba tsu Chiga tise'pa injama'choma somboen'jenqui tsendeccuja ccusha'faya'bi. Toya'caen ño'andeccui'ccu fae'ngae canse'faya'bi tsu.

⁶ Nane Na'su Chigaja ño'andeccuma tsu ñotsse coirapa an'biaña. Tsa'ma ega aindeccuja tisupa in'janqquia'caen cansepa pa'faya.