Oseas 11 - Cofán: Chiga Tevaen'jen

Chiga pañambindeqquia'ma in'jan

¹ “Israelja ñoa'me du'shua'can tsu. Nane tise chuite gi tisema ñotsse in'jamba Egipto andene tisema ttu'se.

² Tsa'ma ti'tsse tisema ttu'sesi ti'tsse tsu tiseja ccaningae ja. Nane ña aindeccuja afopa'cho chigandeccunga osha'choma afepa ñoña'cho chigandeccunga'qque ñome'bama oque oraen'fa.

³ Ñajan Efraín tive'ye fendepa angacan cuintsu tsui jacañe atesuye. Tsa'ma tsendeccuja ña tise'pama coira'je'chove atesu'fambi.

⁴ Tise'pama ñotsse in'jamba gi angacan. Nane osha'cho ñotssiave gi tson cuintsu tise'pa ñame in'jan'faye. Du'shu changa catsesi puntssamba chochoenqquia'caen gi tise'pama coira'je.

⁸ Efraíndeccu: ¿Ma'caen gi quema catiya? Ju, que'i israendeccu: ¿Ma'caen gi quema antteya? ¿Osha ti gi Adma canqquema sefaenqquia'caen que'ima'qque sefaeñe? Nane ¿Osha ti gi Zeboimma tsonqquia'caen que'ima'qque tsoñe? ¡Me'in! Injama'cho tsosipie que'ima ñotsse in'jansi ña in'jan'choja ccaninga tsu.

⁹ Nane ñajan a'imbipa ñoa'me Chiga gi. Ñajan Efraínma ñoa'me iyicca'ye'ma fi'tti sefaeña'bi ni a'i egae tsonqquia'caen tise'pama tsoña'bi. Ña gi que'imbe enttingeni can'jen'cho ñotsse jincho'cho. Que'ima fi'tti sefaeñe jinchombi gi.”