Nehemías 1 - Cofán: Chiga Tevaen'jen

Nehemías israendeccune iñajan'cho

¹ Va tsu Hacalías dutssi'ye Nehemías condase'cho. Artajerjes na'suve dapa canqque'fa veinteve manda'je'ni, tsa Quisleu ccovuni gi ña, Nehemíasja, Susa canqqueni can'jen.

² Ña tsa'caen can'jen'ni tsu ña antian Hananijan, Judáne ji'cho tsandiendeccui'ccu ñani can'su ji'fa. Tsonsi gi Jerusaléne toya'caen tsa'su aindeccu tseni catiyepa Babiloniani jimbindeqquiane'qque iñajampaña.

³ Iñajampañasi tsu qquen condase'fa: “Tsa patsuyepa ccuyapa can'jen'chondeccuja ñoa'me aiye'pave dapa vana'jen'fa. Nane Jerusalénma patu ttuccuja pa'cco tsu asittaye'cho. Toya'caen tsa'su sombo'ttima picco'je'choma'qque tsu pa'ccoma si'ngei'ccu oque cati'cho.”

⁴ Tsama pañamba gi i'namba ñombi'yepa ambe'yi asettupa sefani canjen'su Chigama iñajamba qquen su:

⁵ “Ñoa'me dyo'tssia Na'su sefacconi canjen'su Chiga, majan que manda'choma pañamba tson'sui'ccu, toya'caen majan queve in'jan'chondeccui'ccu tsangae injancco'su;

⁶ Chigáne, ña, a'ta toya'caen cose'qque quema shondo'su israendeccune quema iñajan'choma pañamba tsa'caen tsonjan. Atesu gi ingi israendeccu gi quenga egae tsincon'fa. Nane ñoa'me ña'su aindeccu, toya'caen ña'qque gi tsa'caen egae tsincon.

⁷ Quenejan ñoa'me barembi'choa've gi tson'fa. Nane que mandasi quema shondo'su Moisés tsa manda'cho toya'caen se'pi'choma afasi ingija pañambipa que suqquia'caen tson'fambi.

⁸ In'jan gi que Moisésnga qquen su'choma: ‘Que'i egae tsincon'ninda gi pa'cco andenga asi'ttaen moeña.

⁹ Tsa'ma tsa'caen asi'ttaen japa ccase ñame in'jamba, ña manda'choma tson'fa'ninda gi mapán ande shaca'choni canjen'fa'ni'qque ccase Jerusaléni iya. Tsa Jerusalén tsu ñoa'me ña in'jamba isu'cho ande.’

¹⁰ “Ingita gi quema shondosundeccu, toya'caen gi que aindeccu, toya'caen que tisu oshacho'choi'ccu ccushaen'cho aindeccu.

¹¹ Chigáne Na'su, ña quema iñajansi, toya'caen quema shondosundeccu iñajansi, pañamba tsa'caen tsonjan. Nane avujatsse gi quema ñotsse afa'je'fa. Toya'caen ña na'suni japa iñajansi tisema in'jaenjan cuintsu ñame in'jamba ña iñajan'choma afeye.”