Miqueas 7 - Cofán: Chiga Tevaen'jen

Israendeccu vana'jemba ina'jen'cho

¹ ¡Va'cha gi! Taiya'cho tayo pasasi aqquia ttatta'su gi. Nane poi andenima tta'tta'ma gi o'fa tsaja, higove me'i'an'ma aqquia tta'tta vanaqquia'caen

² majan Chigave in'jamba ñotsse tson'suma attembi. Nane poiyi'cco tsu tisupanaccuma quendeccoqquia'caen fi'tticcoye ronda'je'fa.

³ Egae tsincoñejan ñoa'me injama'pandeccu tsu. Ande na'su afe'chove isuye in'jamba tsu manda'je'fa. Injama'choma somboen'su'qque corifin'dima isuye atesu afe'sune ñotsse afaye. Joccapindeqquiaja tise'pa in'jangae in'jan'chove tsomba fae'ngae ñoña'fa canqquesundeccuma dañoñe.

⁴ Tise'pa'su bove ñotssiaja nojan'can tsu. Ti'tsse joccapitssia'qque ataccuma bove ega tsu. Tsa'ma que'ima coira'su Chiga aya'fama afasundeccu suqquia'caen tsu tsane afepoeña'cho a'ta nepiya. Tsequi a'ta tsendeccuja injamambie dapa qque'faya.

⁵ Tisupapora in'jamba afa'choma pañajama. Que injama'cho in'jan'choma'qque que ñotsse in'jan'chonga condajama. Nane que pushenga jongoesuma condase'je'ta injan'jeñi condaseja.

⁶ Nane dutssiyendeccu tise'pa yayandeccuma paña'faya'bi. Onquengendeccu tise'pa mamandeccuma chi'ga'faya. Chinandeccu tise'pa chan ccashendeccuma'qque chi'ga'fa. Nane a'ima ti'tsse iyicco'su tsu tise'pa tsaofa'su antiandeccu.

⁷ Tsa'ma ñajan Na'su Chigave in'jamba gi ronda'jeya. Tise ñama pañasi gi ccushaen'su qquen tisema in'jamba canseya.