Jueces 7 - Cofán: Chiga Tevaen'jen

Gedeón madiandeccuma patsu'cho

¹ A'taningae tsu Jerobaal, tsa Gedeónjan, poiyi'cco tise sundarondeccui'ccu Harod tsa'ccu sombo'jeni bopa can'jen'fa. Tsene'da tsu Madiandeccu can'jen'choja nortefa faesu sinjunccu tsa More ccotta'ccoi'ccu pporotsse.

² Tse'ttinga tsu Na'su Chigaja Gedeónma su: “Panshaen tsain'bitssi sundarove qui i. Nane israendeccu ana'faya'chove ña anttesi madiandeccuma gana'da tsu tisupayi oshapa gana qquen in'jan'faya.

³ Tsa'cansi poiyi'cco tsandiendeccunga condaja: ‘Poiyi'cco majan dyojo'ma jayi'ta tsu toequi shandaye osha'fa tise'pa tsaoni.’ ” Tsa'caen susi pañamba Gedeón condasi tsu veinte y dos mil tsandie shanda'fa. Tsa'ma toya tsu diez mil can'jen'fa.

⁴ Tsa'cansi Na'suja ccase Gedeónma su: “Toya tsu panshaen tsain'bitssi sundaro. Poiyi'ccoma nai'quini angasi gi quenga canjaeñe majan quei'ccu ja'faya'chove, toya'caen majan toequi shanda'faya'chove.”

⁵ Tsa'caen susi Gedeónjan sundarondeccuma nai'quini anga. Tsonsi tsu Na'suja su: “Tivei'ccu ichhoipa tisu menzanza'fai'ccu ain'caen cu'i'cho sundarondeccuma attufaenjan tsutta'choi'ccu puntssandyaipa cu'i'cho sundarondeccu'ye.”

⁶ Tsa'caen tsomba attesi jo'su tresciento a'iyi tsu tivei'ccu ichhoipa aya'fanga angapa ain'caen cu'i'chondeccu. Poiyi'cco cca'indeccu tsu tsutta'choi'ccu puntssandyaipa cu'i'fa.

⁷ Tsonsi Na'suja Gedeónma su: “Tsa tresciento a'i'ccuyi gi que'ima ccushaemba madiandeccuma afeya cuintsu que'i tise'pama patsuye. Cca'ija poiyi'cco tsu ja'faya'cho tise'pa tsaoni.”

⁸ Tsa'caen susi Gedeónjan poiyi'cco cca'indeccuma tise'pa tsaoni jaye moe. Tsa'ma tise'pa api, tsonjen'choma'qque isupa moe. Moemba jo'su tresciento a'i'ccuyi catiye. Tse'ttieta tsu madian'su sundarondeccumbe carpa sheque'choja sinjunccuni. Tsambe tansin'choni tsu Gedeónjan can'jen.

⁹ Tsequi cose Na'suja Gedeónma su: “Jangipa andeja madiandeccu'su carpani. ¡Ñoa'me gi tsendeccuma quenga afeya cuintsu que tise'pama patsuye!

¹⁰ Tsa'ma toya iyiccoye dyojo'ta carpa sheque'chonga a'tutsse quema shondo'su Furai'ccu

¹¹ japa tise'pa condase'je'choma paña'faja. Tsomba qui dyoe'suma pasapa madiandeccui'ccu iyiccoye jaye osha.” Tsa'caen susi Gedeón, tisema shondo'su Furai'ccu andepa a'tutsse carpa sheque'chonga catse'fa.

¹² Nane madiandeccu, amalecitandeccu toya'caen faesu chiga sombo'jefa'su aindeccuja jongoesu a'ju shequeqquia'caen tsu tsa sinjunccuni on'batsse can'jen'fa. Tise'pa cameyo'qque tsain'bitssipa mar otafa'su sisipama agattoye oshambi'tssiqquia'ca'on.

¹³ Tseni nepipa Gedeónjan paña fae sundaro tise ayo'o'choma qquen condase'je'choma: —Ayo'o gi. Nane cebadama ñoña'cho pan funui'cho'ccoa mutsinoi jipa va carpa sheque'chonga amppipa fae carpanga quian'me desi osuipa amppi.

¹⁴ Tsa'caen condasesi tise amigoja su: —Tsa panda tsu israendeccu'su Joás dutssi'ye Gedeón matichi'ccu ingima fitti'ttiya'cho. Nane Chiga tsu Gedeónga antte cuintsu tiseja poi madiandeccuma patsupa tsani sheque'cho carpama'qque metsse patsuye.

¹⁵ Gedeónjan jongoesune ayo'ochove conda'choma pañamba avujatsse Na'su Chigama afa. Toequi Israel sundarondeccu can'jeni japa qquen su: —¡Jangi'faja! ¡Ñoa'me tsu Na'su Chigaja antte ingi madiandeccuma patsu'faya'chove!

¹⁶ Tsomba tsa tresciento tsandiendeccuma attufaen tres naccuve. Attufaemba poiyi'cconga tsonjen'choma afepa toya'caen apima'qque afe. Tsa apiccunga tsu singete'cho setsa'je'cho tuñoma a'tutsse an'biaña'cho.

¹⁷ Tsomba Gedeónjan su: “Ña carpa sheque'chombe jofa'su utufanga nepipa ma'caen tson'nijan que'i'qque ñama camba ¡ma'de'faja!

¹⁸ Nane ña, toya'caen ñai'ccu jasundeccu tsonjen'choma jeña'fasi paña'da que'i'qque poiyi'cco carpa sheque'choma shoquendi ccutsupa que'i tsonjen'choma jeñamba qquen fundo'faja: ‘¡Na'su Chiga, toya'caen Gedeónme'qque in'jamba patsu'faja!’ ”

¹⁹ Tsa'caen supa Gedeónjan tisei'ccu jaya'cho cien a'i'ccu carpa sheque'chombe jofa'su utufanga nepi'fa. Ñoa'me enttinge cosesi madiandeccu tseyi faesu sundarondeccuma cambiamba ronda'suve ccutsian'fa. Nepipa jundeyi tise'pa tsonjen'choma jeñamba anga'cho apima dojo'fa.

²⁰ Nane tsa tres naccu poiyi'cco tsonjen'choma jeñamba fae'ngatsse apima dojo'fa. Tse'faei'ccuyi singete'cho tuño anchandasi pavefa'su tivei'ccu tsama yasapa tansinfa'su tiveni tsonjen'choma an'biamba qquen fae'ngae fundo'fa: “¡Na'su Chiga, toya'caen Gedeónme'qque in'jamba matichi'ccu patsu'faja!”

²¹ Tsa'caen tsomba poiyi'cco tise'pa ccutsu'ttie carpa sheque'choma shoquendi ccutsu'fasi tsu madiandeccuja dyopa fundopa ccuya'fa.

²² Nane tsa tresciento tsonjen'choma fae'ngae jeñasi tsu Na'su Chigaja madiandeccuma in'jaen cuintsu poiyi'cco dyopa tisupanaccu matichi'ccu iyicco'faye. Poi madián'su sundarondeccu tsu Bet-sitani toya'caen Zererani'su tsaiquiningae buttopa ccuyayain ja'fa. Nane Abel-mehola andeni ppo'rotsse ja'fa Tabat canqque jini.

²³ Toya'caen tsu Gedeónjan Neftalí, Aser toya'caen Manasés'su tsandiendeccuma ttu'se cuintsu madiandeccuma omboen'faye.

²⁴ Efrainsundeccu ccotta'cconi can'jen'chondeccunga'qque Gedeónjan condasundeccuma moe qquen su'choi'ccu: “Jipa madiandeccuma mandian'faja. Jordán naini o'tie japa Bet-barapie se'pi'faja tsendeccu ise'fasa'ne.” Tsa'caen ttu'sesi poi Efraíndeccu ttupa Jordánma ise'faye se'pi'fa Bet-barapie.

²⁵ Toya'caen tsa dos madián'su nasundeccuma, tsa Oreb toya'caen Zeebma indipa fi'tti'fa. Nane Orebma fitti'ttima tsu inisian'fa Oreb patuve. Toya'caen Zeebma fitti'ttima tsu Zeeb vino tsa'ccuve sombo'je'ttive inisian'fa. Tsa'caen madiandeccuma mandian moemba Oreb tsove toya'caen Zeeb tsovema Jordán naini ipa Gedeónga afe'fa.