Jueces 2 - Cofán: Chiga Tevaen'jen

Josué pa'cho

⁶ Josuéja israendeccuma can moesi poiyi'cco tisupa isuya'cho andenga isuye jaja'fa.

⁷ Josué toya cansuite tsu poiyi'cco israendeccuja Na'su Chigama iñajamba can'jen'fa. Toya'caen Josué pa'ninda tisei'ccu coenzandeccu toya cansuite tsu tsa'caen Na'su Chigama iñajan'fa. Nane tsendeccu poiyi'cco tsu Na'su osha'cho israendeccunga ñotsse tson'jen'choma attepa in'jan'chondeccu.

⁸ Tsa'ma Josuéja ciento diez canqque'fave an'biamba pa.

⁹ Pasi tisu andenga tisema a'tu'fa. Tsa Timnat-sera andeni tsu Efraín ande'su Gaas ccotta'cconi nortefanga jincho.

¹⁰ Poiyi'cco Josuéi'ccu fae'ngae israe'su coenzandeccu'qque pa'fa. Tise'pa pa'fasi omboe can'jensundeccuja Na'su Chigama atesumbipa tise israendeccunga ñotsse tson'jen'choma'qque atesu'fambi.

Israendeccu Na'su Chigama cati'cho

¹¹ Tsa'ma israendeccu egae tsinconsi Na'su atte'ma in'jambi. Nane israendeccuja osha'cho chiga Baal ñoña'choma iñajañe ashaen'fa.

¹² Na'su, tise'pa tayopisundeccuma Egipto'ye somboensi in'jan'cho Chigama catipa pporotsse canjensundeccumbe chigandeccuma iñajan'jen'fa. Tsa'caen tsonsi Na'su Chigaja tise'pama iyicca'ye.

¹³ Nane Na'suma catipa chiga Baal toya'caen osha'cho chiga Astarté ñoña'choma'qque iñajan'fa.

¹⁴ Tsa'caen tson'fasi Na'su Chigaja tise'pama iyicca'yepa antte cuintsu ccanambandeccu jipa osha'choma cca'nasi tise'pa pporotsse canjen'su iyiccosundeccu'qque jisi oshambi'e dapa patsuye'faye.

¹⁵ Iyiccosundeccuma iyiccoye ja'fa'ninda Na'su'qque tise'pama se'pi. Nane Na'su tayo condaqquia'caen se'pisi tsu patsuye'fa. Tsa'ma tsa'caen vana'jen'fa'a'qque

¹⁶ Na'su Chigaja ñoquiansundeccuma anttepa moe cuintsu israendeccuma angacamba tise'pa iyiccosundeccu'ye ccushaeñe.

¹⁷ Tsa'ma israendeccuja ñoquiansundeccuma ñotsse paña'fambi. Pañambipa Na'suma catipa faesu chigandeccuma iñajan'jen'fa. Nane tise'pa tayopisundeccu Na'su manda'choma pañamba canseqquia'caen canse'fambi.

¹⁸ Faesu aindeccu israendeccuma patsusi vana'jen'ninda tsu Na'su Chigaja tise'pa ina'jen'choma pañamba tise'pama mende'ye. Mede'yepa ñoquian'suma ccutsiamba fuite cuintsu tsambe cansuite israendeccuma tise'pa iyiccosundeccu'ye ccushaeñe.

¹⁹ Tsa'ma tise'pa manda'su pasi aindeccuja ccase egae tsincomba tise'pa tayopisundeccuma bove egae dapa faesu chigandeccuma iñajamba canse'fa. Nane anttembe'yi egae tsincomba tsosinambie dapa Na'suma pañañe in'jan'fambi.

²⁰ Tsa'caen canse'fasi Na'su Chiga ti'tsse tise'pama iyicca'yepa su: “Tayopi'su israendeccui'ccu gi fae'ngae injancco'fa'choma afa. Tsa'ma va, tise'pa dushundeccu, tsama catipa ñama pañambisi gi

²¹ ti'tsse tise'pama fuiteya'bi. Nane Josué pasi toya va andeni joqquitssimbi'chondeccuma gi joqquitssiaña'bi.”

²² Na'suja tsa'caen antte israendeccu tsendeccui'ccu fae'ngae can'jemba ma'caen tsoña'choma atesuye; nane tise'pa tayopisundeqquia'caen Na'su Chigama pañañe, tsambi'ta pañambi'choave atesuye.

²³ Tsa'caen atesuye in'jamba Na'suja tsa andeni canjensundeccuma junde joqquitssiambi. Nane poiyi'cco Josué patsumbisi can'jen'chondeccuma toya can'jeñe antte.