Jueces 16 - Cofán: Chiga Tevaen'jen

Sansón Gazani japa tson'cho

¹ Fae a'ta Sansónjan Gaza canqqueni japa tisu ai'voi'ccu gana'su pushesuma atte. Attepa tsambe tsa'onga ca'ni tsequi cose tisei'ccu anañe.

² Ca'nisi Gaza'su aindeccuja paña'fa tsa canqqueni Sansón can'jen'chove. Pañamba itoye ttupa tsequi a'ta cose'tsse canqquembe sombo'ttinga ronda'fa tise sombojisi indiye. Tsa'caen cosepa quimbipa ño'faye tisupa tsaoni ja'fa ccaqui sinte fi'ttiye qquen in'jamba.

³ Tsa'ma Sansónjan enttinge coseya'ngaeyi can'jemba jangipa japa canqque sombo'tti'su piccofin'dima indichoya'chove dyaiña'choi'ccu fae'nga pa'cco quini'cconga yavian'choma sai isupa opipa anga Hebrón isevetssia'su ccotta'cconga. Tseni angapa ccuiña.

Sansón Dalilai'ccu tson'cho

⁴ Omboe tsa Sansónjan Sorec sinjunccuni'su pushesuma attepa ñotsse in'jan. Tise iniseja Dalila.

⁵ Tsonsi filisteo'su nasundeccu Dalilani jipa su'fa: —Osha'ta tta'ttapa atesuja tise jongoesui'ccu tsa'caen quin'anme da'chove. Toya'caen tta'ttapa atesuja ma'caen tisema patsupa tandamba an'biaña'chove. Que oshapa atte'ninda ingi poiyi'cco gi mil ciento corifin'dive quenga afe'faya.

⁶ Tsa'caen su'fasi Dalila Sansónma su: —Chigáne ñanga condaja ¿queja jongoesui'ccu qui tsa'caen quin'anme da? ¿Jongoesui'ccu tandansi qui opattuye oshaya'bi?

⁷ Tsonsi Sansónjan co'fepa su: —Siete battittianccu'su tandan'fa toya sambambi'choai'ccu tandan'ninda gi tsainfambie dapa faesu a'ia'caen injanga quingo'jeya.

⁸ Pañamba condasi filisteo'su nasundeccuja siete cuna toya sambambi'choa battittianccu'su tandan'fama ipa Dalilanga afe'fa. Afesi tsai'ccu Dalilaja Sansón ana'jen'choma tandan.

⁹ Tsomba tsandiendeccu a'tutsse cuartoni ronda'jesi Sansónma fundopa su: —¡Sansón, injama'tse! ¡Filisteondeccu quema indiye ji'fa! Pañamba Sansónjan battittianccu'su tandan'fama opattu shequian simba'fa si'ngenga pporopa ttuqquia'caen. Tsa'caen tsonsi filisteondeccuja tise jongoesui'ccu quin'go'chove toya in'jan'fambi.

¹⁰ Tsonsi Dalilaja Sansónma su: —Queja afopoemba ñama sumbive attian. Tsa'ma chigáne ñanga condaja ma'caen quema tandaña'chove.

¹¹ Sansónjan su: —Cuna soga toya tandan'jembi'choai'ccu tandan'ninda gi tsainfambie dapa faesu a'ia'caen injanga quingo'jeya.

¹² Tsa'caen supa ana'jensi Dalilaja Sansónma cuna sogai'ccu tandan. Tandamba faesu aindeccu cuartoni indiye ronda'jesi Sansónma fundopa su: —¡Sansón, injama'tse! ¡Filisteondeccu quema indiye ji'fa! Pañamba Sansónjan tivema tandan'cho sogama ttuña cati iro chipirima tuñaqquia'caen.

¹³ Tsa'caen tsonsi ccase Dalilaja Sansónma su: —Ja'ño'qque qui afopoemba ñama sumbive attien. Ñanga condaja ma'caen quema tandaña'chove. Sansónjan su: —Ña tsove'su tosema siete boña'fave indipa sarupave ugaje'cho iroi'ccu fae'ngae ota'tapa yoshavai'ccu ta'ya've indian'ninda gi tsainfambie dapa faesu a'ia'caen injanga quingo'jeya. Tsa'caen supa ana'jensi Dalilaja tise tosema siete boña'fave indipa sarupave otata'je'cho iroi'ccu fa'enga ota'tapa

¹⁴ yoshavai'ccu ta'ya've indian. Indiamba Sansónma fundo: —¡Sansón, injama'tse! ¡Filisteondeccu quema indiye ji'fa! Sansónjan qquendyapa pa'cco tisema otatapa yoshavai'ccu indian'choma ucca cati.

¹⁵ Tsonsi Dalila tisema su: —Afopa'cho aqquia ti qui ñame ñotsse in'jan qquen su. Nane tayo tres se ñanga afopoemba ñama sumbive attien'ma qui toya ñanga condambi ma'caen dapa que tsa'caen quin'go'je'choma.

¹⁶ Tsa'caen poi a'ta panshaen toeveyi iñajanse'poensi Sansónjan paña'ma quimbi.

¹⁷ Tsa'caen quimbipa pa'ccoma a'tatsse tisenga conda: —Minguite'qque gi ña tosema cha'ttupa cansembi. Nane toya ñama isu'fambi'te gi Chigambe nazareo a'ive dapa tosema chattumbe'yi coemba canse. Ña tosema cha'ttuni'da gi tsainfambie dapa faesu a'ia'caen injanga quin'gopa canseya.

¹⁸ Pa'ccoma tansintsse conda qquen in'jamba Dalilaja filisteo'su nasundeccunga qquen conda'choma moe: —Ccase fae seyi ji'faja. Pa'ccoma tsu tiseja ñanga tansintsse conda. Tsonsi ccase filisteo'su nasundeccuja tise'pa corifin'di'ccu ji'fa.

¹⁹ Dalilaja Sansón tsovema tisu ttena'gonga opipa anae. Tsa'caen anaemba a'ima ttu'se cuintsu tise siete'fave uga'cho tosema chattuye. Tsa'caen tosema chattupa tayo tisema patsuye ashaen qquen in'jamba

²⁰ Dalilaja quian'me Sansónma fundo: —¡Sansón, injama'tse! ¡Filisteondeccu quema indiye ji'fa! Sansónjan qquendyapa in'jan: “Tayoe tsonqquia'caen tsomba tisuma ccushaeñe.” Tsa'ma atesumbi Na'su Chiga tisei'ccu can'jembi'choa've.

²¹ Tsonsi filisteondeccu tisema indipa tise tso'fema boi somboemba tisema anga'fa Gaza canqqueni. Tseni angapa tise tivema cu'a yoshava candenai'ccu tandamba picco'je'ttinga piccopa manda'fa cuintsu trigoma sunda'jeye.

²² Tsa'caen piccoyepa can'jen'ni tise toseja ccase sho'yoye ashaen.

Sansón pa'cho

²³ Filisteo'su nasundeccuja avujatsse bo'fa tise'pa chiga Dagónga ñotssia afe'choma oquepa afeye. Tsa'caen bopa qquen settapoen'fa: “Ingi chiga Dagón tsu ingi'ccu iyicco'su Sansónma patsupa inginga afe.”

²⁴ Toya'caen filisteo aindeccu'qque Sansónma attepa qquen afapa settapoen'fa: “Ingi chiga tsu ingi'ccu iyicco'suma patsupa inginga afe. Nane ingi andema dañomba ingi aindeccuma fitti'tti'chone tsu ja'ño tisema patsupa inginga afe.”

²⁵ Toya tsa'caen avujatssipa fundopa afa'fa: “Sansónma somboenjan ingi tisema camba fe'ñañe.” Tsa'caen supa Sansónma picco'je'ttie somboemba ccutsian'fa chiga Dagón etti'su dos enttinge'su chan'jime dyaiña'chombe enttingenga.

²⁶ Tse'tti ccutsupa tise tive'ye fendepa angacan'su du'shuma su: —Ña tivei'ccu tsa dos enttinge'su chan'jime dyaiña'choma pporaemba ccutsuye gi in'jan quimbipa.

²⁷ Nane tise tsa'caen su'je'ni tsu tsa Dagón ettinga on'ba'e tsandiendeccu toya'caen pushesundeccu'qque bo'fa. Poi filisteo'su nasundeccu'qque can'jen'fa. Nane Dagón etti omba'su ppappacconga'qque tsu faesu tres mil a'i bo'fa Sansónma attepa fe'ñañe.

²⁸ Tsa'caen bo'fasi Sansónjan Na'su Chigama iñajamba su: “Ti'tsse Joccapitssia Na'su ñama injan'jemba ja'ño fae seyi'qque ccase in'jaenjan ña va filisteondeccuma ccane'qque dañoñe ña dos tso'fema daño'fa'chone.”

²⁹ Tsa'caen iñajamba Sansónjan tisu tivema yasapa dosve tsa Dagón etti enttinge'su chan'jime dyaiña'choma pporaen. Tsa dos tsu pa'cco tsa'oma indichoya'chove dyaiña'cho. Tsanga tsu tansinfa'su tivei'ccu fae dyaiña'choma pporaemba pavefa'su tivei'ccu faesuma pporaen.

³⁰ Pporaemba Sansónjan qquen quian'me su: “¡Filisteondeccu'qque ñai'ccu fae'ngae pa'faja!” Tsa'caen supa pa'cco tisu tsain'fai'ccu dyaiña'choma ccofetta. Ccofettasi pa'cco Dagón etti osuisi filisteo'su nasundeccu, poiyi'cco tse'ttini can'jensundeccu'qque otssiye'fa. Tsa'caen tsu Sansónjan tise cansuite fitti'tti'choma pan'shantssi a'ive tisui'ccu fae'ngae fi'tti.

³¹ Pañamba tise quinshingendeccu, poiyi'cco tise yayambe antiandeccu'qque ande'fa tise ai'voma isupa angaye. Angapa tisema a'tu'fa tise yaya Manoa atu'ttinga tsa Zora Estaol canqque enttingenga. Nane veinte canqque'fave tsu Sansónjan israendeccuma manda'je.