Job 1 - Cofán: Chiga Tevaen'jen

Job vanañe ashaen'cho

¹ Uz andeni tsu fae a'i, Job, qquen inisecho'choja can'jen. Tsa a'ija egae tsincombe'yi ñotsse canse. Nane dyoe'sui'ccuyi tsu ñotsse Chigave in'jan. Toya'caen faesuma egae tsincoñe in'jambi.

² Jobja siete dutssi'ye, tres onque'ngeme tsu an'bian.

³ Toya'caen siete mil ovejambe na'su. Nane tres mil cameyo, mil qquitssa'je'cho vaura, quiniento boro, toya'caen tsain'bio semasundeccuve tsu an'bian. Nane pa'cco chiga sombo'jefa'su aindeccuma ti'tsse rico tsu.

⁴ Job dutssiyendeccu tsu fiestaeñe atesu'fa poi tisupa naccu'su tsa'onga. Nane cca'tti cca'tti'su tise'pa tsa'onga fiestaen'jemba tise'pa tres antian pushesundeccuma'qque ttu'se'fa.

⁵ Fiestaen'choma nanisi Jobja tise dushundeccuma ttu'sepa tise'pane Chigama iñajan. Sinte'yi jangipa ovejama oque oraemba Chigama iñajan poiyi'cco tise'pa egae tsincon'chone. Nane Jobja in'jamba'qque tise dushundeccu Chigama afase'fasa'ne tsa'caen tson.

⁶ Maqui a'ta poiyi'cco Chigama sefacconi'su shondosundeccu Na'su Chiganga catsepa ccutsusi Satana'qque fae'ngae tise'pai'ccu jipa ccutsu.

⁷ Jisi Na'su Chigaja iñajampaña: —¿Mane qui ji? Satanajan su: —Pa'cco andenga shoquendi jacan'su gi.

⁸ Tsonsi Na'suja tisema su: —¿Attembi ti qui ñama shondo'su Jobma? Faesu tisia'can'me me'i'on tsu. Nane tiseja ñama in'jamba ñama shondo'supa egae tsincombe'yi ñotsse canse. Ni faesuma'qque egae tsincombi. Nane faesu a'ija tsa'caen canse'fambi.

⁹ Tsa'ma Satanajan su: —¿Aqquia injanga ti tiseja quema ñotsse shondo'su? Me'in.

¹⁰ Tsa'ma que tisema fuitesi majañi'qque tisema dañoñe oshambi; ni tise antiandeccuma, ni tise an'bian'choma. Nane queja tisema ñotsse fuitesi pa'cco osha'cho tsu ñotsse naniñe. Tsa'cansi tiseja osha'choma tsain'bitsse atapoemba poiyi'cco tsa ande'su a'ima ti'tsse rico.

¹¹ Tsa'ma tise'bema itsaye'ta tsu quema afaseya.

¹² Tsonsi Na'su Chigaja Satanama su: —Ju, ñotssi tsu. Que in'janqquia'caen tsonjan pa'cco osha'cho Job an'bian'choma. Tsa'ma tisema mingae pporaenjama. Tsonsi Satanajan Na'su'ye joqquitssin ja.

¹³ Fae a'ta Job dushundeccuja antian coenza tsaoni fiestaen'jen'fa.

¹⁴ Tsa'caen tson'jen'ni fae tsandie Job tsaoni jipa qquen su: —Ingi qquitssa'je'cho vaurai'ccu nasipani dyandya'je'ni borondeccu'qque pporotsse shoshovima an'jen'fa.

¹⁵ Tse'faei'ccuyi sabeondeccu jipa vaura, boroma'qque cca'namba aindeccuma chhichhi'ccoi'ccu fittitti'fa. Jo'su ñañi gi ccushapa ji condaye.

¹⁶ Tsa'caen tise afa nani'ccu faesu'qque jipa qquen su: —Tsanda veyaemba ovejama coirasundeccu ovejama'qque oque fi'tti. Jo'su ñañi gi ccushapa ji condaye.

¹⁷ Tsa'caen tise afa nani'ccu faesu'qque jipa qquen su: —Tres naccu caldeondeccu jipa pa'cco cameyoma cca'namba chhichhi'ccoi'ccu aindeccuma fittitti'fa. Jo'su ñañi gi ccushapa ji condaye.

¹⁸ Tsa'caen tise afa nani'ccu faesu'qque jipa qquen su: —Que dutssiyendeccu, onquengendeccu'qque antian coenza tsaoni fiestaen'jen'fa'ni

¹⁹ a'i menia'su fingian jipa tsa'oma fingian ttovasi osuipa poiyi'cco que dushundeccuma fi'tti. Jo'su ñañi gi ccushapa ji condaye.

²⁰ Tsonsi Jobja jangipa tisu ñombi'ye'choma canjaeñe tise ondiccu'jema chitta ttova. Tsomba pa'cco tise tosema'qque fuchha catipa andenga puntssan dyaipa Chigama iñajamba

²¹ su: —Chu'cco gi va andenga isuye. Toya'caen pa'ta gi chu'cco jaya. Na'suyi tsu pa'ccoma ñanga afe. Toya'caen Na'suyi tsu ñama itsa. ¡Ñoa'me ñotssia tsu Na'su Chigaja!

²² Tsa'cansi Jobja egae tsincombi ni Chigama afasembi.