Isaías 40 - Cofán: Chiga Tevaen'jen

Chigaja mende'yepa ñotsse afa'cho

¹ Que'i Chigaja qquen su: “Ñoqui'faja, ñoqui'faja ña aindeccu.

² Jerusalénma'qque mende'yepa ñotsse afa'faja. Nane tisenga conda'faja tisupa vana'jen'choma tayo pasa'chone. Tayo tsu tise egae tsincon'chone afepoen'choma isu'fa. Nane Na'su Chiga tive'suma dos se afepoenqquia'cantsse vana'choi'ccu isu'fa.”

³ Tsonsi a'i aya'faja qquen fundoya: “A'i menia'ni Na'su jiya'chove ñoña'faja. Tise tsaiquima tansianqquia'caen ñoña'faja.

⁴ Sinjunccumajan oviviya'cho. Ccotta'ccomajan joqquitssiamba sefaccoa andema fae'ngaeña'cho. Tsaiqui cca'rutticcoa'ma tansiaña'cho. Ande ccutticcoa'ma ovivipa fae'ngaeña'cho.

⁵ Tsonsi Na'su Chiga tise ñotssiama canjaensi tsu poi aindeccu fae'ngae tsama atte'faya. Na'suyi tsu tsa'caen conda.”

⁶ Aya'faja “¡Fundoja!” qquen susi gi ñajan iñajampaña: “¿Jongoesu qquen gi fundoya?” “Poiyi'cco a'i tsu shoshoviacan'fa. Nane te'ta'caen ta'etssimbi tsu.

⁷ Na'su Chiga tise aya'fai'ccu ufasi shoshovi pandisi te'ta'qque pandipa shequeya. Ñoa'me tsu a'ija shoshovia'caen pandi'faya.

⁸ Shoshovi sambasi te'ta'qque pandipa sheque'faya. Tsa'ma ingi Chigambe Aya'faja tsangae tsu jinchoya.”

⁹ Que, Ziónga ñotsse conda'su, ccotta'cco sefa'tssianga ansundepa quian'me fundopa va ñotsse condase'choma condaja. Nane dyombi'tsse Jerusalénga condapa poi Judá'su canqquenga'qque quian'me qquen condaja: “¡Va'tti tsu que'i Chigaja!”

¹⁰ Na'su Chigaja Oshachoma Oshachopa ja'ño tsu ji. Nane Tise tivei'ccu tsu oshachoma patsu'je. Jipa tsu tise afepoeña'choma i, ño'anga ñotssiama afepa eganga egama afeye.

¹¹ Ovejama coira'sia'caen jipa tise ovejama ñotsse coira'je. Nane oveja du'shuma opipa injama'ttinga munsin. Toya'caen oveja du'shuve an'bian'choma vasuitsse angacan.

Ñotssia tsu Israel Chigaja

¹² ¿Majan tsu tise tivenaccui'ccu pa'cco marma ichhoi isupa agattoye oshaya? ¿Majan tsu tise tive'su tsimian'ccoi'ccu sefacco attaja'suma agattoye oshaya? ¿Majan tsu pa'cco ande'su sisipama boñamba agatto'ccoi'ccu agattoye oshaya? ¿Majan tsu ccotta'ccoma dusianccunga ppiñamba dusiancañe oshaya?

¹³ ¿Majan tsu Na'su Chigama tansian'su? ¿Majan tsu tisema conda'su ma'caen agattoeñe?

¹⁴ ¿Majan tsu tise afa'choma fuite'su? ¿Majan tsu tisema in'jaen'su in'jaña'chove? ¿Majan tsu tisema atesian'su ñotsse mandaya'chove? ¿Majan tsu tisema nafattian'su osha'cho ande, mar, sefacconi jincho'chone atesuye? ¿Majan tsu tisema dyaiñamba conda'su osha'choma atesu'suve?

¹⁵ Nane Chiganejan poi andesundeccu tsu fae se tsa'ccu su'duqquia'can'cho'cco. Toya'caen ande'su ccuttopa'si dusianccuma oyaembiqquia'can'cco tsu poi andesundeccu. Mar'su anttepo'chosundeccuja sisipa sheque'fo'choacan'cco tsu.

¹⁶ Nane pa'cco Líbano ande'su aña'choja shacaya tsu Chiganga afe'ya'chove oque oraeñe. Líbano'su quini'cco'qque shacaya tsu si'tsipa tsama oqueye.

¹⁷ Chiganejan poi andesundeccu tsu me'i'en daqquia'caen jinchombi. Nane ñoa'me tisenejan barembi tsu.

²⁷ Israel, que'i Jacob aindeccu, ¿Jongoesie qui qquejian'fa? ¿Micomba qui qquen su'fa: “Na'suja ña vana'jen'choma atesumbi; Chigaja ñoa'me ñama aqque'pa”?

²⁸ ¿In'jan'fambi ti qui? ¿Paña'fambi ti qui? Na'suja tsangae canse'cho Chiga tsu. Nane va ande'su osha'choma agattoen'su tsu. Quimbimbe'yi can'jemba ño'faye atesumbi. Tise in'jan'choja ñoa'me joccapitssia tsu, a'i atesumbi'choa.

²⁹ Quin'su me'choa'ma tsu quiñaen. Oshambi'choama tsu in'jaen osha'chove tsoñe.

³⁰ Nane dusungandeccu'qque quimbiye atesu'fa. Ti'tsse quin'andeccu'qque oshambipa amppi'fa.

³¹ Tsa'ma majan Na'suve in'jan'da shacaya'bi tsu cuna quin'sui'ccu canseye. Nane pindo sefani chhajeqquia'caen tsu patsu'faya. Quimbimbe'yi buttoqquia'caen tsu canse'faya. Quin'sui'ccu tsu quimbimbe'yi tsui jacan'faya.