Éxodo 19 - Cofán: Chiga Tevaen'jen

Israendeccu Sinaíni nepi'cho

¹ Israendeccuja tise'pa Egiptone sombo'cho tres ccovuve nepisi Sinaí a'i menia nepi'fa.

² Refidimne sombopa Sinaí a'i menia nepipa tse'tti can'jen'fa ccotta'cco isevetsse.

³ Chiga ttu'sesi Moisésja ccotta'cconga ansunde Chigama cachuiye. Ansundesi Na'suja ccotta'cco'ye tisema su: —Va ña quenga su'choma tansintsse condaja Jacob omba'su dushundeccunga tsa israendeccunga:

⁴ ‘Poiyi'cco qui atte'fa ña egiptondeccunga tson'choma; toya'caen ma'caen ña que'ima va tisu can'jeni i'choma. Nane pindonga ancamba jiqquia'caen qui vani nepi'fa.

⁵ Tsa'camba que'i ñama ñotsse pañamba ñai'ccu injancco'ta qui ñoa'me ña aindeccu'faya. Nane poi ande'su aindeccu tsu ñambe'fa. Tsa'ma que'ija poiyi'cco aindeccuma ti'tsse ñambe'faya qui.

⁶ Que'i qui ñoa'me ñama afa'su aindeccuve da'faya. Ñoa'me ñama shondo'su aindeccu'faya qui.’ Pa'cco va ña su'choma israendeccunga condaja.

⁷ Tsa'caen susi pañamba jipa Moisésja israe'su coenzandeccuma ttu'sepa pa'cco Na'su tisenga mandapa su'choma condase.

⁸ Tsama pañamba israendeccuja poiyi'cco fae'ngatsse in'jamba su'fa: —Pa'cco Na'su Chiga su'choma jinge tsoñe. Tsa'caen su'fasi Moisésja Na'sunga japa tsama condasi

⁹ pañamba Na'suja su: —Que canjan, sintssia unjimba'cco'ye gi quenga attiaña cuintsu aindeccuja ña quenga afa'choma pañamba tsangae quema ñotsse in'jamba paña'jen'faye. Moisésja ccase aindeccu su'choma Na'sunga condasi

¹⁰ Na'su Chigaja su: —Japa aindeccuma ja'ño tu'i'qque ñoñajan cuintsu ñame injan'jen'faye. Nane sarupama'qque tsu ma'ppamba

¹¹ tisuma'qque ñoñaña'cho tui'vene. Nane ña Na'su Chigata gi tui've Sinaí ccotta'cconga andeya poiyi'cco aindeccu caña'jen'ni.

¹² Ccotta'cco andepa'fanga ma'caen ccutsu'faya'chove condaja cuintsu aindeccu panshambeyi can'faye. Nane tsa ccotta'ccoja ansunde'masia tsu, toya'caen catse'ma'sia. Majan catse'ninda tsu fi'ttiya'cho.

¹³ Tsa'ma majañi'qque tisema pporaembe'yi patui'ccu tsambi'ta oma'ccoi'ccu tsu fi'ttiya'cho. Nane a'i tsambi'ta aiña'cho tsa'caen tson'ninda tsu junde fi'ttiya'cho. Tsonjen'choma pañambayi tsu aindeccuja tsa ccotta'cconga catseye osha'fa.

¹⁴ Chiga tsa'caen susi pañamba Moisésja ande aindeccuma ñoñañe cuintsu Chigama iñajan'jen'faye. Aindeccu tise'pa sarupama ma'ppan'fasi

¹⁵ Moisésja su: —Ñoña'jen'faja tui'vene. Toya'caen pushesui'ccu can'jen'fajama.

¹⁶ Dos a'ta pasasi tsanda tsu veyaemba afa'je. Toya'caen sintssia unjimba'cco tsu tsa ccotta'ccoma picco. Nane tsonjen'cho quian'me jen'choma pañamba poiyi'cco canjensundeccu ttun'dundu'je'e dyo'fa.

¹⁷ Tsa'caen tsonsi Moisésja aindeccuma canqque'ye somboemba anga Chigai'ccu cachuiccoye. Angapa tise'pama ccotta'cco utufanga ccutsian itoyian.

¹⁸ Tsonsi si'nge enttinge'ye Chiga Sinaí ccotta'cconga andesi tsu tsa ccotta'cco'ye onfen'ba sombo. Nane onfen'bata tsu panme matssan'jen'cho'ye somboqquia'caen oro'je. Toya'caen pa'cco ccotta'cco tsu dyo'oe oya'je.

¹⁹ Toya'caen tsonjen'cho jen'jen'cho'qque ti'tsse quian'me je'ñacca'ni Moisés afasi Chigaja tsanda afaqquia'caen afa.

²⁰ Tsomba Na'su Chigaja Sinaí ccotta'cco tansin'choni andepa Moisésma su cuintsu jundeyi tisenga ansundeye. Moisés ansundesi

²¹ Na'su Chigaja su: —Andepa aindeccunga condaja cuintsu majañi'qque panshamba ñama atteqquen tsombe'yi ccutsu'faye. In'jambi gi tsain'bitssi tsendeccu'su pa'faye.

²² Nane Chigama afa'su nasundeccu ñanga catseye osha'cho'a'qque tsu tisupama ñotsse ñoñaña'cho ña tise'pama iyicca'yesa'ne. Tsa'caen iyicca'yeta gi tise'pama dañoña.

²³ Tsonsi Moisésja Na'sunga su: —Aindeccuja in'jan'faya'bi va Sinaí ccotta'cconga ansundeye. Nane queyi qui se'pi majañi'qque panshambitsse tseni ccutsu'faye vaja que andesi.

²⁴ Tsa'ma Na'su Chigaja su: —Andepa japa jai'ngae Aaróni'ccu ansundeja. Tsa'ma Chigama afasundeccu toya'caen aindeccuma'qque se'pija cuintsu ña can'jeni ansundembe'yi can'faye. Ña iyicca'yepa tise'pama dañosa'ne.

²⁵ Tsonsi Moisésja andepa poiyi'cconga ccase condase.