Deuteronomio 31 - Cofán: Chiga Tevaen'jen

Moisés Josuénga manda'cho

¹ Ccase Moisés israendeccuma condapa qquen su:

² “Tayo ciento veinte canqque'fave an'biamba gi ti'tsse que'ima angacañe oshambi. Toya'caen Na'suja ñama se'pi Jordán Na'ema iseye.

³ Tsa'ma Na'su que'i Chiga tsu que'ima o'tie jayipa tsa ande'su aindeccuma patsupa nepiaña que'i tseni can'jen'faye. Na'su suqquia'caen Josué tsu que'ima mandapa angacaña.

⁴ Nane Na'suja amorreo nasundeccu, Sehón toya'caen Ogma fi'ttipa tise'pa andema'qque patsupa nepianqquia'caen tsu tsa ande'su aindeccuma'qque nepiaña.

⁵ Na'su tsa'caen anttesi que'i tsa andesundeccuma patsu'ta ña que'inga mandaqquia'caen tise'pama tson'faya'cho.

⁶ Que'i injama'choma ñoñamba quinse'tsse iyicco'faja. Dyombe'yi tise'pai'ccu geraen'faja. Nane Na'su que'i Chiga tsu que'ima catimbe'yi que'i'ccu fae'ngae iyiccoya.”

⁷ Tsomba tse'i Moisésja Josuéma ttu'sepa, poiyi'cco israendeccu paña'jen'ni, tisenga qquen su: “Que injama'choma ñoñamba quinse'tsse tsonjan. Nane que qui va aindeccuma angacaña Na'su Chiga tise'pa tayopisundeccu'yenga tansintsse su'choi'ccu afeye qquen su'cho andeni. Queja tise'pama mandasi tsu tsa andema patsupa an'bian'faya.

⁸ Na'su que Chigaja quema o'tie japa quei'ccu can'jeña. Tiseja quema catiya'bi ni chi'gaya'bi. Tsa'cansi dyojama ni injansejama.”

Manda'cho tevaen'jema an'bian'cho

²⁴ Tsomba Moisés pa'cco manda'choma tevaen'jenga tevaen nanimba

²⁵ leví aindeccunga, tsa Na'su Chiga a'i'ccu injancco'fa'cho cafonma angasundeccunga, qquen su:

²⁶ “Va manda'cho tevaen'jema isupa Na'su, que'i Chiga a'i'ccu injancco'fa'cho cafon utufanga ejian'faja. Tsa'caen an'bian'faja que'i egae tsincon'choma injan'jeñe.”