Daniel 4 - Cofán: Chiga Tevaen'jen

Nabucodonosor sumbie da'cho

¹ “Ña, na'su Nabucodonosor, gi poi canqque'su aindeccu, poi ande'su, toya'caen poi ccaninga aya'fangae afasundeccu mani'su andeni canjensundeccuma'qque ñotsse in'jamba conda.

² In'jan gi que'i'qque ñoa'me ti'tsse joccapitssia Chiga ñanga osha'cho camboeni'tssia've tson'choma pañamba atesu'faye.

³ Ñoa'me ñocca'tssi tsu tise in'jamba canjaen'cho. Tise manda'je'choja tsangae tsu jinchoya. Toya'caen tise oshacho'choma'qque tsu tsangae canjaen'jen'ña.

⁴ “Ña, Nabucodonosor gi avujatsse na'su tsaoni canse. Toya'caen osha'choma an'biamba gi shacambitsse canse.

⁵ Tsa'ma fae cose anañe ccuipa anamba gi ñoa'me dyo'tssia've ayo'o. Tsa in'jan'cho toya'caen attian'cho tsu ñoa'me ñama dyoña.

⁶ Tsa'caen ayo'opa gi manda cuintsu poiyi'cco Babilonia'su atesu'chondeccu ñani jipa jongoesune tsa'caen ña ayo'ochoma ñanga conda'faye.

⁷ Tsonsi tsu ji'fa poiyi'cco Babilonia'su injama'pandeqquia, atesu'chondeccu, jai'ngae ma'caen daya'chove atesu'chondeccu, toya'caen o'fema camba ma'caen daya'chove atesu'chondeccu'qque. Tsa'caen ji'fasi gi ña ayo'o'choma condase. Tsa'ma tsendeccuja jongoesune ña tsa'caen ayo'ochoma condaye osha'fambi.

⁸ Osefa'poe tsu Daniel, tsa Beltsasar'qque ña chigandeccune ñotssiave inisian'choaja ji. Tsama tsu ñoa'me joccapitssia Chiga Qquendya'paja angacan. Tise jisi gi ña ayo'ochoma condaseye ashaemba qquen su:

⁹ ‘Beltsasar, jai'ngae ma'caen daya'chove atesu'chondeccumbe na'su qui. In'jan gi quemajan joccapitssia Chiga Qquendyapa tsu angacan. Toya'caen qui osha'cho ma'caen atesu'ma'sia'a'qque tayo atesu. Ña ayo'opa atte'choma pañamba ñanga condaja jongoesune tsa'caen ña ayo'ochoma.

¹⁰ Qquen tsu ña ana'jen'chonga ccuipa ana'jemba atte'cho: Enttinge andeni tsu fae quini'jin se'fatssia ccutsu.

¹¹ Tsa quini'jin tsu coemba randeve da. Tise tsutopaja chiga sefacconi ppo'rotssi. Nane ande shaca'chone'qque qui tsama atteye osha.

¹² Tsambe najenjan ñoa'me me'detssipa tise na'qque ñoa'me tsain'bitssi tsu. Nane poiyi'cco añe nanitssi tsu. Toya'caen osha'cho aiña'cho tsu tise tumbianccuni ccui'fa. Tise ttembangaja chhiriria tsu tsao'paemba dusu'cho'fa. Tsa'ye tsu canse'paja pa'cco andenga sombo'je.

¹³ “ ‘Tse'faei'ccuyi gi Chiga sefacconi'su shondo'su sefaccone ande ji'choma atte.

¹⁴ Tsata tsu quian'me fundopa qquen afa'je: Va quini'jima ttuttupa ttembama'qque cha'ttufaja. Tise najema joqquitssiamba name'qque shequian cati'faja cuintsu osha'cho aiña'cho tsambe tumbianccuni ccuisundeccu ccuyayain ja'faye. Toya'caen tise ttembani canjen'cho chhiriria'qque cuintsu ccuya'faye.

¹⁵ Tsa'ma setsa'cho toya'caen setsa'fama'qque toe'ttingayi antte'faja. Nane yoshava toya'caen cu'a yoshava candenai'ccu tandamba tsampi'su shoshoviccunga antte'faja cuintsu suruno tisenga shequesi toya'caen osha'cho aiña'cho tseni cansesundeccui'ccu shoshovima an'jeñe.

¹⁶ Toya'caen cuintsu tise injama'cho injiengembitsse dasi jongoesu aiña'choa'caen dapa siete canqque'fave tsa'caen canseye.

¹⁷ Tsa pa'cco tsu ño'an sefacconi'su shondosundeccu canjaen'cho cuintsu poi aindeccu qquen in'jan'faye: Ti'tsse joccapitssia Chiga tsu pa'cco va ande'su nasundeccuma ma'caen tsoñe oshacho. Toya'caen tise tsu majama na'suve tsoñe in'jan'da tsama na'suve tson. Nane tise tsu utu'ccoa'ma in'jan'da tsama poi ande na'suve tson.

¹⁸ “ ‘Tsa tsu ña, na'su Nabucodonosor, ayo'ocho. Ja'ño, Beltsasar, condaja jongoesune ña tsa'caen ayo'ochoma. Nane fae atesu'choyi'qque tsu ña'suja pañamba condaye oshambi. Tsa'ma queta qui condaye osha quei'ccu Chiga Qquendya'pa can'jensi.’

¹⁹ “Tsa'caen susi pañamba Daniel, tsa Beltsasar qquen inisecho'choja, jongoesune ayo'ochoma tayo in'jamba dyopa asi'ttaen ccutsu. Tsonsi gi ña, na'suja, tisema su: ‘Beltsasar, ña ayo'ochone, toya'caen condaya'chone panshaen asi'ttaenjama.’ Ña tsa'caen susi tsu Beltsasarja qquen su: ‘Ay, tsa Que Ti'tsse'tssiambe ayo'ocho te ma'caen'qque que enemigonga tsa'caen daye'can.

²⁰ Tsa Que Ti'tsse'tssiambe atte'cho quini'jin se'fa'tssia, rande, sefacconi ppo'rotssisi mangae ande shaca'chone atteje'cho,

²¹ tsa najen ñotssiama an'bian'cho, toya'caen tsain'bitssi name an'biansi poiyi'cco an'jen'cho, tsa osha'cho aiña'cho tseni cansesundeccuma tumbianqquian'su, tsa tise ttembani chhiriria tsao'pama an'bian'cho quini'jin tsu

²² Que Ti'tsse'tssia'ma canjaen. Nane que coemba ma'caen ti'tsse joccapitssia've da'choma tsu canjaen. Nane Que Ti'tsse'tssia, osha'cho ñotssiama an'bian'cho tsu sefacconi ppo'rotsse atapa. Nane que manda'je'cho'qque tsu poi andeni ja.

²³ Toya'caen fae'cco sefacconi'su ño'an shondo'su andejipa qquen afa'je'choma qui paña: Tsa quini'jima ttuttupa cati'faja. Tsa'ma setsa'cho, toya'caen setsa'fama'qque toe'ttingayi antte'faja. Nane yoshava, toya'caen cu'a yoshava candenai'ccu tandamba tsampi'su shoshoviccunga antte'faja cuintsu suruno tisenga shequesi toya'caen osha'cho aiña'cho tseni cansesundeccui'ccu fae'ngae siete canqque'fave shoshovima amba canseye.

²⁴ Tsa pa'cco tsu ma'caen joccapitssia Chiga Que Ti'tsse'tssia'ma tsoña'chove canjaen.

²⁵ Nane Que, Ti'tsse'tssia qui aindeccu'ye joqquitssipa aiña'chondeccui'ccu canseya. Vaura'caen qui shoshovima amba canseya. Toya'caen que ai'vonga tsu suruno shequepa tssipoen'jeña. Tsa'caen qui siete canqque'fave canseya. Nane Joccapitssia Chiga tsu va ande'su nasundeccuma ma'caen tsoñe oshachopa tsayi majama na'suve tsoñe in'jan'da tsama na'suve tson'su qquen in'jaña'ngae qui tsa'caen canseya.

²⁶ Tsa setsa'cho toya'caen setsa'fama toe'ttinga antteye manda'cho tsu canjaen Que Ti'tsse'tssia ccase jai'ngae Chiga ma'caen oshacho'choma atesupa na'suve daya'choma.

²⁷ Ja'ño Ti'tsse'tssia, ña suqquia'caen qquen tsoncanjan: Ñotsse canseja ti'tsse egae tsincombe'yi. Tisu egae tsincon'choma anttepa va'chandeccuma fuiteye in'janjan. Isha qui tsa'caen tsomba ti'tsse ñotsse, avujatsse, toya'caen opatsse osha'choma an'biambaja canseya.’ ”

²⁸ Pa'cco va condase'cho suqquia'caen tsu na'su Nabucodonosorja da.

²⁹ Fae canqque'fa pasasi na'suja tisu na'su Babilonia'su tsa'o omba'su ppappacco'ye tsuí ja'jepa

³⁰ qquen su: “Canjan Babiloniajan ñoa'me rande tsu. Ña gi tisu oshacho'choi'ccu ñoa'me va ande'su na'su can'jeña'cho canqqueve ñoña cuintsu aindeccu ña oshacho'choma atte'faye.”

³¹ Toya tsa'caen afa'je'ttie tsu na'suja sefaccone tisenga qquen afa'choma paña. “Vama pañajan na'su Nabucodonosor. Que manda'je'chota ja'ñojan quembembi tsu.

³² Nane aindeccu'ye joqquitssipa qui aiña'chondeccui'ccu canseya. Toya'caen siete canqque'fave qui vaura'caen shoshovima amba canseya. Tsa'caen qui canseya joccapitssia Chiga tsu poi andeni cansesundeccuma ma'caen tsoñe oshachopa majama na'suve tsoñe in'jamba tsama na'suve tson'su qquen in'jaña'ngae.”

³³ Tsa'caen susi pañamba tse'faei'ccuyi Nabucodonosorja tsa'caen dapa aindeccu'ye joqquitssi. Tsa'caen joqquitssipa vaura'caen shoshovima an'jen. Toya'caen suruno'qque tisema tssipoensi tise tose'qque pindo tose'caen bia'ave dapa quitsuicco'qque bia'ave da jongoesu pindo rande quitsuiccoa'caen.

Nabucodonosor ccusha'cho

³⁴ “Siete canqque'fa pasapa ña ccushaya'cho a'ta nepisi gi ña Nabucodonosor sefacconima camba in'jan tisu sumbie da'choma ccusha'chove. Tsa'caen ccushapa gi joccapitssia Chiga tsangae canse'suma ñotsse afapa qquen su: Tise oshacho'choja tsangae tsu quiña'jeña. Toya'caen tise manda'je'cho'qque pasambe'yi tsangae tsu jinchoya.

³⁵ Va ande'su a'i majan tisia'can'me me'i'on tsu. Tise tsu tson'jen ma'caen tisu in'janqquia'caen, sefacconima, toya'caen andenima'qque. Nane majañi'qque, ti'tsse'tssia qquen in'jamba, tise oshacho'chone toya'caen tise in'jamba ma'caen tson'chone– ¿Jongoesie qui tson? ¿Ma'caen qui tson? –qquen iñajampañaña'chove me'i'on tsu.

³⁶ “Tse'faei'ccuyi gi ñotsse in'jamba tisu joccapitsse manda'je'choma, tisu ñotssiama an'bian'choma, toya'caen tisu ti'tsse'tssia'ma'qque ccase an'bian. Tsonsi tsu ña na'suite ñama shondosundeccu, toya'caen ña ti'tsse'tssiandeqquia've tson'chondeccu ñame ttatta'su ji'fa. Tsomba tsu ñama ccase tsa ande'su na'suve ca'nia'fasi gi tayoe tisu an'bian'choma ti'tsse'tsse an'bian.

³⁷ “Ja'ñojan ña Nabucodonosor gi sefacconi'su Na'suve in'jamba tise ñotssianga iñajan'jen. Nane pa'cco tise tson'cho tsu ñoa'metsse tson'cho; tansintsse tson'cho tsu. Toya'caen tsu osha ‘ñajan ti'tsse'tssi gi’ qquen in'jan'chondeccuma vanaemba ñombi'yeañe.”