Amós 5 - Cofán: Chiga Tevaen'jen

Na'sunga toequi jiya'cho

²¹ “Que'i injanga Chigama iñajan'cho fiestama gi chi'ga. Ñoa'me gi que'i bo'fa'choma in'jambi.

²² Que'i oque oraemba Chiganga afe'choma ñajan in'jambi. Que'i trigoma afe'choma'qque gi in'jambi. Que'i ppu'chotssia vaurama afe'ni'qque ñajan isuya'bi. Nane que'i ñama ñoquiañe afe'choma'qque gi in'jambi.

²³ Que'i settapaen'cho quen'ba'osi gi in'jambi. ¡Tsai'ccu ña'ñe biani joqquitssi'faja! Pañañe in'jambi gi que'i jeñaqque'su jen'jen'choma.

²⁴ Tsa'ma na'en ai'jeqquia'caen tsu tansintsse in'jamba mandaya'cho. Nane na'en sambambe'yi tsangae ja'jeqquia'caen tsu ñotsse tsoña'cho.

²⁵ “Israendeccu, que'i cuarenta canqque'fave a'i menia can'jemba ¿ñoa'me ñanga ti qui osha'cho afe'choma fi'ttipa afe'fa?

²⁶ Ja'ño qui que'i na'suve Sicutma pañamba o'fe chiga Quiyúnme'qque in'jan'fa. Tsa tisupa ñoña'cho chigandeccuma qui iñajan'fa.

²⁷ Ñoa'me gi Damasco ti'tsse joccani que'ima joqquitssian moeña.” Tsa'caen tsu Na'suja su. Tsa Osha'choma Oshacho'cho Chiga qquen tsu tisuma inisian.