1 Reyes 16 - Cofán: Chiga Tevaen'jen

Chiga aya'fama afa'su Jehú afa'cho

⁶ Baasa pasi tisema a'tu'fa Tirsani. Omboe tsu tise dutssi'ye Elaja manda.

⁷ Tsonsi Na'su Chiga tise aya'fama afa'su Jehúma in'jaensi tsu Jehúja, tsa Hanani dutssi'ye, Baasanga Chiga egae tsoña'chove afapa Baasa antiandeccunga'qque afa. Nane Jeroboambaja egae tsinconsi Chiga tise'pa egae tsincon'choma chi'gapa sefaenqquia'caen tsa Baasa tson'choma'qque chi'ga.

Ela, omboe Zimri manda'cho

⁸ Tsonsi Asa veinte y seis canqque'fave Judáma mandasi tsu Baasa dutssi'ye Elaja Israelma mandaye ashaen Tirsani. Ca'nimba tsu dos canqque'faveyi manda.

⁹ Nane tise sundaro caroma enttingeve na'su tsu Zimri qquen inisecho'cho. Tsa tsu faesundeccui'ccu ñoña'fa ma'caen Elama fi'ttiya'chove. Tsa'caen tson'jen'fa'ni fae a'ta Elaja Tirsani can'jemba tise tsa'o na'su Arsambe tsaoni ja. Tseni japa Arsai'ccu cui'jepa ñoa'me ccusi.

¹⁰ Tsa'caen dasi tse'faei'ccuyi Zimrija jipa tisema fi'tti. Fi'ttipa tise manda'je'choma itsapa manda. Tsequi tsu Asa Judáma manda'je'choja veinte y siete canqque'fave nepi.

¹⁵ Tsaite tsu Zimrija siete a'taveyi israendeccuma manda.

¹⁶ Nane israendeccu'su sundarondeccuja filisteo'su Gibetónma shoquendi ttupa patsuye ronda'je'fa'cho. Zimri Elama fi'tti'choma pañamba tse'faei'ccuyi tise'pa sundaro na'su Omrima ca'nia'fa na'suve.

¹⁷ Tsonsi Omri mandasi pa'cco sundaro bo'fa'cho Gibetónma anttepa Tirsani ja'fa Zimri'ccu geraeñe.

¹⁸ Ji'fasi Zimrija “Tayo canqquema patsu'fa” qquen in'jamba na'su tsa'o enttinge'su cuartonga ca'nimba si'ngema setsaen pa'cco na'su tsa'oma oque catiye. Tsa'o tsa'caen ju'rusi tise'qque pa.

Omri israendeccuma manda'cho

²¹ Tsonsi tsu israendeccuja dos in'jan'chove in'jamba dos naccuve attufa'fa. Enttinge tsu Omrima na'suve tsoñe in'jan'fa. Toya'caen faesu enttinge tsu Ginat dutssi'ye Tibnima na'suve tsoñe in'jan'fa.

²² Tsa'caen tsomba tsu Omrima in'jan'chondeccu Tibnima in'jan'chondeccuma patsu'fa. Patsu'fasi Tibni pasi tsu Omrija na'suve dapa manda.

²³ Nane Asa treinta y uno canqque'fa Judáma manda'je'ni tsu Omrija israendeccuma mandaye ashaen. Doce canqque'faveyi tsu manda. Tsa'su'ye Tirsani tsu seis canqque'fave manda.

²⁵ Omri'qque egae tsinconsi Na'su Chigaja tisema in'jambi. Nane tisema o'tien'su nasundeccuma ti'tsse egave tsu tsincon.

²⁸ Tise pasi Samariani tisema a'tusi tise dutssi'ye Acabja tise manda'je'chonga ca'nimba manda.

Acab mandaye ashaen'cho

³⁰ Tsa'ma Acab'qque egae tsinconsi Na'su Chigaja attepa tisema in'jambi. Acabja tisema o'tien'su nasundeccuma ti'tsse egae tsincon.

³¹ Nane tiseja tsa Nabat dutssi'ye Jeroboam tsonqquia'caen egae tsincomba ti'tsse tsu egae tsincon Jezabelma pushepa. Tsa Jezabel tsu sidóni'su pushesu, tsa andeni'su na'su Et-baal onque'nge. Tisema pushepa tsu Acabja chiga Baalma iñajamba avu'jaen.

³² Toya'caen tsu Baalma iñajan'jen'cho tsa'ove Samariani tsao'ñamba Baalma iñajan'su oque'je'chove tseni ccutsian.

³³ Toya'caen tsu Aserama ñoña'cho chigama ccutsian. Tsa'caen tsomba Acabja poiyi'cco tisema otien'su Israel nasundeccuma ti'tsse egae tsincomba ti'tsse Na'su Chiga Quitsama iyicca'yean.