SALMOS 147 - El Nuevo Testamento y Salmos

Capu juxaꞌaj naꞌaj huóꞌruuj ɨ maj séej chuéj japua joꞌcháatɨmee

¹ ¡Alelúuyaj! ¡Naa pu xáꞌpuɨꞌ tyaj tyuꞌtáchuiicaj ɨ Dios jimi! ¡Aꞌyaa pu tyúuxɨeꞌveꞌ tyaj aꞌɨ́j jimi tyámuaꞌ naa tyuꞌtáchuiicaj!

² Tavástaraꞌ pu ajtáhuaꞌaj jaatyátaahuaj ɨ chájtaꞌnaj Jerusalén ajta huaꞌajsɨɨreꞌej aꞌɨ́ɨjma ɨ Israel maj jitze ajtyámaꞌcan ɨ maj joꞌvátzɨj.

³ Aꞌɨ́ɨ pu tyihuáꞌhuaatyeꞌen ɨ maj quee tyámuaꞌ een ɨ juxɨéjnyuꞌcaa tzajtaꞌ, ajta tyihuaꞌhuáatyeꞌej joꞌmaj tyajáꞌpuejtyiꞌhuaj.

⁴ Aꞌɨ́ɨ pu jamuaꞌreej aꞌchu maj aráꞌasej ɨ xúꞌraꞌvetyee, ajta jeꞌen séej ajta séej huataxájta jeꞌej tɨ ántyapuaj.

⁵ Vaꞌcán pu jɨn antyúumuaꞌreej ɨ taj Dios, ajta néijmiꞌi putyíꞌuurej, capu muꞌ jóoꞌasej ɨ tɨ jɨn tyuꞌyíꞌtɨn.

⁶ Tavástaraꞌ pu caꞌnyíjraꞌaj huaꞌtáꞌcaa aꞌɨ́ɨjma ɨ maj quee óotzaahuatyeꞌ, ajta jéehua pu huápuɨꞌɨj huoꞌtyáxaahuataj aꞌɨ́ɨjma ɨ maj jeꞌej puaꞌaj tyityetyúuchaꞌɨj.

⁷ Setyuꞌtáchuiicaj ɨ Tavástaraꞌ jimi setyeꞌtyóotziꞌreꞌej; siajta tyuꞌtáchuiicaj ɨ taj Dios jimi, aꞌɨ́jcɨ jitze ɨ canárij.

⁸ Aꞌɨ́ɨ pu joꞌtánaamuaj ɨ tajapuá tɨ séejreꞌ aꞌɨ́jcɨ jɨmeꞌ ɨ jéetɨrij, ajta tyámuaꞌ huáꞌuurej ɨ víityee mej mij huatyéviiyej ɨ cháanacaj japua, ajta tyiꞌtáꞌcaa tɨ ɨ ɨxáj ajnyéj a ɨtzitáj,

⁹ tyihuáꞌcueꞌtyej ɨ tyiꞌtyán maj tyityaacɨ́ꞌɨj ajta aꞌɨ́ɨjma ɨ huaꞌyojmuaꞌ ɨ cuaꞌtzáaj matɨꞌɨj ajaꞌcɨꞌxɨj.

¹⁰ Capu ɨ tɨ jɨn uhuájcaꞌnyej ɨ cahuáayuꞌ nusu ɨ tyáatɨꞌ tɨ jéehua uhuájcaꞌnyej capu aꞌɨ́ɨn jitzán juxɨeꞌveꞌ ɨ Tavástaraꞌ,

¹¹ aꞌɨ́ɨ mu jitzán juxɨeꞌveꞌ ɨ maj tzáahuatyiꞌraꞌaj jimi tyíchaꞌɨj, ɨ maj jitzán tyíꞌcaꞌnyej ɨ tɨ jɨn huaꞌxɨeꞌveꞌ.

¹² Muaꞌaj mu siaj Jerusalén huacháatɨmee, setyuꞌtatyójtziꞌreꞌ ɨ Tavástaraꞌ; siajta mu siaj Sión jaꞌchej, setyuꞌtatyójtziꞌreꞌ ɨ ju Dios.

¹³ Jiꞌnye aꞌɨ́ɨ pu tyámuaꞌ tyeꞌtyáacajtye joꞌtɨj jaꞌpueertaj ajta tyámuaꞌ tyihuoꞌtyájtoo aꞌyóojmuaꞌ aꞌájna a chájtaꞌ.

¹⁴ Aꞌɨ́ɨ pu tyuꞌtáꞌsij paj axáahuaj séjriaꞌaj aꞌ chuéj japua ajta aꞌɨ́j muaatáꞌsij ɨ tyeríicuj tɨ jéetzeꞌ jɨ́ꞌreꞌen.

¹⁵ Aꞌɨ́ɨ pu junyúucaa ujoꞌtaꞌítyij ɨ cháanacaj japua, ajta ɨ nyúucariaꞌraꞌ pu jiyeꞌtzín yaráꞌastij.

¹⁶ Aꞌɨ́ɨ pu jataahuaj ɨ séerij cuxáa tɨ muxáj tɨ puéꞌeenyeꞌ, ajta séerij ajnyésij néijmiꞌqueꞌ ɨ chuéj japua tɨꞌɨj ɨ chuéj tɨ muɨɨnyíj.

¹⁷ Aꞌɨ́ɨ pu ajta ɨ séerij ujoꞌtaꞌítyij aꞌyájna matɨꞌɨj ɨ tyéetyee; ajta aꞌɨ́jcɨ jɨmeꞌ ɨ cɨmuájrij tɨ ujoꞌtaꞌítyij, aꞌɨ́j pu jɨn ɨ jáj séerij huatyóotaahuaj.

¹⁸ Ajta jeꞌen ɨ junyúucaa mujoꞌtaꞌítyij, aj puꞌij ɨ séerij huatóopuaꞌrij; aꞌɨ́ɨ pu tyuꞌtáꞌsij tɨ huatáꞌaacarej, aj puꞌij ɨ jájtyij huatámuɨꞌyij.

¹⁹ Aꞌɨ́ɨ pu tyuꞌtáꞌ tɨ jáamuaꞌtyij ɨ Jacob, ɨ Israel, ɨ junyúucaa, ɨ nyúucarij tɨ jɨn tyíꞌijta ajta jeꞌej tɨ tyeetyájtoo.

²⁰ Capu aꞌyan huóꞌruuj ɨ maj séej chuéj japua jáꞌmaꞌcan, ɨ maj quee aꞌnáj jaamuaꞌaj jeꞌej tɨ aꞌɨ́ɨn tyuꞌtaꞌíjtacaꞌ. ¡Alelúuyaj!