SALMOS 124 - El Nuevo Testamento y Salmos

Dios pu aꞌɨ́ɨn puéꞌeen ɨ tɨ japuan huatányuusij ɨ Israel

Cuíinarij ɨ maj jɨn huatyáajuꞌun, David tɨ jaꞌaꞌrij

¹ Tɨpuaꞌaj ɨ Tavástaraꞌ quee tajamuán yésejriaꞌaj micheꞌ aꞌɨ́ɨmaj jaataxáj ɨ maj Israel jitze ajtyámaꞌcan,

² tɨpuaꞌaj ɨ Tavástaraꞌ quee tajamuán yésejriaꞌaj matɨꞌɨj ɨ tyétyacaa ájhuiixɨj mej mij taatanyoꞌsiꞌtyeꞌen,

³ aꞌɨ́ɨ mu néijmiꞌcaa taꞌantyipuáꞌrityeꞌnyijcheꞌen matɨꞌɨj aꞌɨ́ɨmaj tajimí jéehua huatanyínyuꞌcacucaꞌ.

⁴ Aj puꞌij ɨ jájtyij caꞌnyíin jɨn taꞌantɨnyíicheꞌen; játyaꞌnaj pu tajapuá huatamuɨꞌyéenyijcheꞌen.

⁵ ¡Ajta ɨ jájtyij tɨ caꞌnyíin jɨn tyájujhuaꞌnaj aꞌɨ́ɨ pu ajta tajapuá huatamuɨꞌyéenyijcheꞌen!

⁶ ¡Cheꞌ tyámuaꞌ éenyeꞌej séjreꞌej ɨ Tavástaraꞌ, ɨ tɨ quee tyuꞌtáꞌ mej mij taatyátzaanaxɨꞌɨn ɨ jutaméj jɨmeꞌ!

⁷ Tuꞌríj huatátaꞌuj mej mij quee taavíviꞌ tɨꞌɨj ɨ pínaꞌaj tɨ huatóoꞌuj mej mij quee jáameꞌnyij, aꞌɨ́ɨ pu huatyátzaanyixɨj ɨ maj jɨn jaxɨeꞌvaꞌcaꞌaj maj taavíviꞌ, ityáj tu tyij huatátaꞌuj.

⁸ Aꞌɨ́jna ɨ tɨ taatyáhuɨɨreꞌej Tavástaraꞌ jimi pu joꞌvéꞌyiꞌij, aꞌɨ́jna ɨ tɨ jaatyátaahuacaꞌ ɨ tajapuá tɨ séejreꞌ ajta ɨ cháanacaj.