Nau Ntơm 21 - Bunongនាវទែស អីឆាក់ 1 ឞ្រាសយេហោវាជានតឹងនាវពាង់លែៈលាសនើស ពាង់អ៝ន់ឆារាគែសក៝នងាន់កើតនាវពាង់លែៈត៝ន។ 2 ឆារានត្រែវងាន់ ត៝ត់តាទីនារកោរាញឞ្រាសលាស ពាង់គុអ៝សទូហ្វេក៝នឞូក្លោអ៝ន់មាអាឞ្រាហាម់ នោកអាឞ្រាហាម់លែៈរាញងាន់ជេស។ 3 ក៝នឆារាទែសមាអាឞ្រាហាម់ នៃ ជេសរីអាឞ្រាហាម់តេៈរាញា «អីឆាក់»។ 4 ត៝ត់អីឆាក់លែៈគែសផាមនារជេសទែស អាឞ្រាហាម់ ជានក៝សនតោមាពាង់ កើតនាវកោរាញឞ្រាសទែដាៈមាពាង់រីនើស។ 5 នោកទែសអីឆាក់នៃ អាឞ្រាហាម់ លែៈគែស ១០០ នាម់ជេស។ 6 នោកនៃឆារាលាស៖ “កោរាញឞ្រាសជានអ៝ន់គ៝ប់ជេងគើម នទ្រែលមាឞូម៝សអីតាង់នាវអ្យា ឞូជេងគើមនទ្រែលមាគ៝ប់ដ៝ង់”។ 7 ឆារាងើយជឹត៖ “ឞូម៝សឞាញ់មឞើសងក៝ចមាអាឞ្រាហាម់ ៖ «គែសទូនារអូរមៃមពូត៝សក៝ន»? ល៝ង់អាបៃរីគ៝ប់ឞាៈទូហ្វេក៝នឞូក្លោអ៝ន់មាអាឞ្រាហាម់ ទោលពាង់លែៈរាញងាន់”។ ហាការ នទ្រែលមា អីសមាអែល ទូគុតាឞ្រីរាទាស 8 ត៝ត់អីឆាក់លែៈក្វ៝ង់អ៝យ ពាង់ឞាសពូត៝ស ជេសរីអាឞ្រាហាម់ នទ្រាប់ញេតទុតក្វ៝ង់ នារក៝នឆែនៃឞាសពូត៝ស។ 9 ឆារាឆៃអីសមាអែលអីក៝នហាការផូងអេឆីប ទែសអ៝ន់មាអាឞ្រាហាម់ គើមមឺចមាអីឆាក់អីក៝នពាង់នើម 10 ជេសរីពាង់លាសមាអាឞ្រាហាម់ ៖ “មព្រើសលើយទឹកឞូអូរនៃ នទ្រែលមាក៝នពាង់ទូលោសឞើសនតុកអ្យា អ្យាត់មាក៝នទឹកឞូអូរអីនៃមោអោសទើនឆ៝ៈទ្រាប់នទើខ្លៃនទ្រែលក៝នគ៝ប់អីឆាក់អ្យា”។ 11 នាវងើយនៃជានអ៝ន់អាឞ្រាហាម់ ហោងាន់រាង៝តតានូយ្សនហ៝ម់ពាង់រី យ៝រលាសអីសមាអែលនៃក៝នពាង់ដ៝ង់។ 12 យើនមាកោរាញឞ្រាសលាសមាពាង់៖ “មៃលើយតារាង៝តអោស យ៝រមាក៝នឆែនទ្រែលមាអីមែពាង់នៃ។ អ៝ន់មៃអ្យាត់ម៝សនាវឆារាទែលាស យ៝រលាសរាន៝យទែសអីគ៝ប់ត៝នមាមៃកើបតាអីឆាក់។ 13 យើនមាក៝នអូរចោងមៃនៃ តៃគ៝ប់អ៝ន់ពាង់ជេងទូផូងគែសឞ្រីទាកដ៝ង់ យ៝រលាសពាង់នើសរាន៝យទែសមៃដ៝ង់”។ 14 ត៝ត់អោយតៃរីអាឞ្រាហាម់ ទ៝ក់អើមអោយ ពាង់ឆ៝ៈនទើឆោងឆា នទ្រែលមានោងទាកអ៝ន់មាហាការ ពឺទឹងលែៈនទើអីនៃអ៝ន់តាត៝ងក៝អីមេៈរី ដាៈពាង់ហាន់នទ្រែលមាអីក៝នពាង់។ ជេសរីហាការទូលោសឞើសនតុកនៃហាន់ញហើតត្រ៝ងតាឞ្រីរាទាសតឹមទាច់ដាសប៝នបេរឆេបារី។ 15 ត៝ត់លែៈទាកតានោងរី ហាការនត្លើយអីក៝នពាង់គុតាន៝ម់ទូពុមរាលោ 16 ជេសរីពាង់នើមគុបាសមាក៝នពាង់រី ក្លាប់លាសងាយត្រុយ្សពាញ់មានា យ៝រលាសពាង់លាស៖ “លើយអ៝ន់គ៝ប់ឆៃខឹតក៝នគ៝ប់”។ ជេសរីពាង់គុបាសមាក៝ន នទ្រីទឹងពាង់ញុមនតែរ។ 17 កោរាញឞ្រាសតាង់អ្យាត់មាក៝នឞូក្លោនៃញុម ជេសរីតោងពារ់កោរាញឞ្រាសក្វាល់ហាការឞើសកាលើត្រោកនតុកពាង់នើម៖ “ហើយហាការ មើមជានអៃរុងរាង់ងាន់នៃហែស? អៃលើយអោសរាវៃ យ៝រលាសកោរាញឞ្រាសលែៈតាង់អ្យាត់ក៝នអីនៃញុមនតែរឞើសនតុកពាង់គុនៃ។ 18 អៃទ៝ក់ហ៝ម់ ហាន់តេកតីក៝នអៃនៃ យ៝រលាសតៃគ៝ប់ជានអ៝ន់ពាង់ជេងទូផូងក្វ៝ង់គែសឞ្រីទាក”។ 19 កោរាញឞ្រាសជានអ៝ន់មាត់ហាការឆៃទូមល៝ម់នតូទាកគែសទាក ពាង់ទ៝ក់ហាន់ឞុកទាកអីនៃឞេងនោង ជេសរីអ៝ន់ក៝នពាង់ញេត។ 20 កោរាញឞ្រាសគុនទ្រែលមាក៝នឞូក្លោអីនៃ ពាង់គុរេសតាឞ្រីរាទាសរីនហ៝មាត៝ត់ក្វ៝ង់ត៝ត់នទាម់ ពាង់ជេងឞូនុយ្សឞ្លាវពាញ់នាទុតឞ្លាវងាន់។ 21 ពាង់គុតាឞ្រីរាទាសពារាន ជេសរីអីមេៈរីកើយ្សឞូអូរផូងអេឆីប ទូហ្វេមាជេងអូរពាង់។ អាឞ្រាហាម់ តឹមរាង្លាប់នទ្រែលកាដាច់ អាបីមាលិច 22 នោកនៃកាដាច់អាបីមាលិច នទ្រែលមាផីកុលអីកោរាញតាហែនក្វ៝ង់ពាង់ ពាង់លាសមាអាឞ្រាហាម់ ៖ “កោរាញឞ្រាសគុនទ្រែលមៃ ទឹងលែៈនតីលនទើមៃជាន។ 23 លាសនទ្រីអ៝ន់មៃត៝នមាគ៝ប់តាអ្យា អ៝ន់កោរាញឞ្រាសគឹតឆៃ មៃលាសមោនទើមគ៝ប់ ក៝នគ៝ប់ នទ្រែលមាក៝នឆៅគ៝ប់។ យ៝រលាសគ៝ប់លែៈជានអ្វែសជេសមាមៃ លាសនទ្រីអ៝ន់មៃជានអ្វែសមាគ៝ប់ នទ្រែលមាឞ្រីទាកគ៝ប់អីមៃគុអ្យាអ៝ន់កើតនៃដ៝ង់”។ 24 អាឞ្រាហាម់ អើសមាកាដាច់៖ “អើ គ៝ប់ត៝ន”។ 25 ជេសរីអាឞ្រាហាម់ លាសមាពាង់ទូមល៝ម់នតូទាកអីផូងប៝នលានពាង់អីននៃនើស។ 26 កាដាច់អាបីមាលិចអើសមាពាង់៖ “គ៝ប់មោគឹតអោសឞូម៝សអីជានកើតនៃ យ៝រលាសមៃមោព្រ៝តងក៝ចមាគ៝ប់ដ៝ង់ ត៝ត់នារអ្យាមើទឹងគ៝ប់គឹតនាវអីនៃ”។ 27 អាឞ្រាហាម់ ឆ៝ៈឞែឞ្យាប់អាបាៈ នទ្រែលមានទ្រោកអាបាៈអ៝ន់មាកាដាច់អាបីមាលិច ជេសរីលែៈឞារហៃខាន់ពាង់រីតឹមរាង្លាប់នទ្រែល។ 28 អាឞ្រាហាម់ ឆ៝ៈពើសអឹឞែឞ្យាប់អីទ្រោសៗអ៝ន់គុអេង។ 29 កាដាច់អាបីមាលិចអោបអាឞ្រាហាម់ ៖ “ពើសអឹឞែឞ្យាប់អីទ្រោសៗមៃអ៝ន់គុអេងនៃម៝សជាន?” 30 អាឞ្រាហាម់ មឞើសមាពាង់៖ “ពើសអឹឞែឞ្យាប់អីអ្យា គ៝ប់អ៝ន់មាមៃមាតីគ៝ប់នើម នទើអ្យាគៃមាមឞើសនហេលនានេៈលាស នតូទាកនៃលែៈគ៝ប់កុយ្សងាន់”។ 31 កើតនទ្រីទឹងឞូក្វាល់នតុកនៃរាញា«បេរឆេបា» គែសនាវខ្លៃជេង«នតូទាកពើសនទើ» មោលាស៖ «នតូទាកត៝ន» យ៝រលាសនតុកនៃជេងនតុកខាន់ពាង់លែៈជេសតឹមត៝នឞាល់។ 32 កើតនទ្រីនាវខាន់ពាង់លែៈតឹមរាង្លាប់ឞាល់តាបេរឆេបារី។ ជេសរីកាដាច់អាបីមាលិច នទ្រែលមាកោរាញតាហែនក្វ៝ង់ពាង់រី ព្លឹឆឹតតៃតាឞ្រីផាលីសតីន។ 33 ជេសរីអាឞ្រាហាម់ តាម់ទូមល៝ម់តើមឆីតាបេរឆេបានៃ តានតុកនៃដ៝ង់នហ៝មាពាង់យើកមឞាសឞ្រាសយេហោវាអីកោរាញឞ្រាសអីហោមគុរេសនហ៝រ៝។ 34 អាឞ្រាហាម់ គុតាឞ្រីផាលីសតីនរីជ៝ៈនារ។ |
© (Active) Wycliffe Bible Translators, Inc. All rights reserved.
Wycliffe Bible Translators, Inc.