Yôsuê 7 - Nau Brah Ndu Ngơi 2023

Ƀon lan Israel roh nau dơi đah phung ƀon Ai

¹ Ƀiălah phung ƀon lan Israel hŏ ƀư tih, yor mâu răp jăp ma lĕ ndơ prăp ma nau ƀư rai, yorlah Y-Akan, kon bu klâu Y-Karmi, sau Y-Sapdi, se Y-Sêra, bơh ndŭl mpôl Yuđa, hŏ geh sŏk ndơ prăp ma nau ƀư rai, jêh ri Brah Yêhôva ji nuih ngăn đah phung ƀon lan Israel.

² Tă bơh Yêrikô, Y-Yôsuê njuăl bunuyh hăn tât ma Ai dăch Bet-Aven, ta mpeh luh nar Bêthel, ntăm pô aơ: “Hăn n'hut uănh hom ƀon Ai.” Pônây, khân păng hăn n'hut uănh ƀon Ai.

³ Jêh nây khân păng plơ̆ sĭt, mbơh ma Y-Yôsuê: “Mâu ŭch leo lĕ rngôch ƀon lan hăn hao ta nây ôh, ƀiălah knŏng ăn bar mâu lah pe rbăn nuyh hăn hao tâm lơh đah ƀon Ai. Lơi dĭng ƀư jâk jêr ma ƀon lan roh suan ta nây, yorlah phung ƀon lan Ai ƀhôi dơm.”

⁴ Pônây geh klăp lah tâm pe rbăn nuyh hăn hao ta nây ƀiălah khân păng nchuăt du panăp phung Ai.

⁵ Phung Ai nkhĭt klăp lah pe jât ma prao bunuyh, tĭng rgot khân păng ntơm bơh mpông ƀon tât ma Sêbarim, jêh ri lơh dôl khân păng nchuăt jŭr sop. Nuih n'hâm phung ƀon lan lĕ nchah rai nâm bu dak.

⁶ Y-Yôsuê nkhêk ao păng nơm jêh ri nđâp ma phung bu ranh Israel păn muh măt ta neh panăp Hip Nau Tâm Rnglăp Brah Yêhôva kŏ tât kêng măng jêh ri sui neh muy ta klơ bôk khân păng nơm.

⁷ Y-Yôsuê lah: “Ơ! Kôranh Brah Yêhôva, mâm ƀư May djôt leo phung ƀon lan aơ rgăn dak krong Yurdan, jêh ri jao hên tâm ti phung Amôrit gay ƀư rai lơi hên? Vư! Ueh lơn hên gŭ ta kơh tê̆ dak krong Yurdan?

⁸ Ơ! Brah Yêhôva! Moh nau gâp hôm dơi lah dôl phung Israel hŏ ndôn kơi jêh ri nchuăt du panăp phung rlăng khân păng nơm?

⁹ Phung Kanaan jêh ri lĕ rngôch phung gŭ tâm bri nây mra tăng nau nĕ, mra nchueng hên jêh ri jut lơi amoh hên bơh neh. Nôk nây, mâm May mra ƀư amoh May jêng toyh?”

Y-Akan ƀư tih jêh ri geh nau tâm rmal

¹⁰ Nôk nây, Brah Yêhôva lah ma Y-Yôsuê: “Dâk hăn hom! Mâm ƀư may păn muh măt ta neh tâm ban pônây?

¹¹ Phung Israel ƀư tih jêh, khân păng ƀư tih đah nau tâm rnglăp Gâp hŏ ntăm jêh: Khân păng sŏk jêh lĕ ndơ prăp ma nau ƀư rai, ntŭng, ndơm mƀruh, rlau lơn ma nĕ pôn ndơ nây nsum tâm ndơ dŏng păng nơm.

¹² Yor ri, phung ƀon lan Israel mâu dơi tâm rdâng đah phung rlăng khân păng ôh, khân păng nchuăt ndôn kơi panăp phung rlăng khân păng, yorlah phung Israel lĕ jêng ndơ bu prăp ma nau ƀư rai. Tơlah khân may mâu ntlơi lơi lĕ ndơ bu prăp ma nau ƀư rai nây, Gâp mâu hôm gŭ ndrel ma khân may đŏng ôh.

¹³ Dâk hom, ƀư kloh ueh phung ƀon lan jêh ri lah pô aơ: ‘Nar ôi taơ, khân may ƀư kloh hom khân may nơm yorlah Yêhôva Brah Ndu Israel lah: “Ơ Israel, khân may hôm mât lĕ ndơ prăp ma nau ƀư rai tâm nklang khân may! Khân may mâu dơi tâm rdâng đah phung rlăng khân may ôh kŏ tât rnôk khân may sŏk ngluh lơi lĕ ndơ prăp ma nau ƀư rai nây.”

¹⁴ Kah ôi taơ, khân may mra văch tĭng ăp ndŭl mpôl; moh ndŭl mpôl Brah Yêhôva nchŏng, mra văch tĭng ăp ndŭl mpôl khân păng; moh ndŭl mpôl Brah Yêhôva nchŏng, mra văch tĭng ăp rnăk vâl khân păng; moh rnăk vâl Brah Yêhôva nchŏng, mra văch tĭng bunuyh.

¹⁵ Mbu nơm Gâp nchŏng jêng nơm sŏk jêh lĕ ndơ prăp ma nau ƀư rai nây, bu mra su păng ma ŭnh ndrel ma lĕ rngôch ndơ păng geh, yorlah păng ƀư tih jêh nau tâm rnglăp Brah Yêhôva jêh ri ƀư nau bêk prêng tâm phung Israel.’”

¹⁶ Kah kêng ang nar pakơi, Y-Yôsuê kah rngăl ơm ôi, đă phung ƀon lan Israel văch dăch tĭng ăp ndŭl mpôl khân păng jêh ri Brah Yêhôva nchŏng ma ndŭl mpôl Yuđa.

¹⁷ Păng ăn ma rnăk vâl phung Yuđa văch dăch jêh ri Brah Yêhôva nchŏng ma rnăk vâl Y-Sêra; păng ăn ma rnăk vâl Y-Sêra văch dăch tĭng ăp rnăk vâl jêh ri Brah Yêhôva nchŏng ma Y-Sapdi.

¹⁸ Păng ăn ma rnăk vâl Y-Sapdi văch dăch tĭng du huê nuyh, Brah Yêhôva nchŏng ma Y-Akan, kon bu klâu Y-Karmi, sau Y-Sapdi, se Y-Sêra bơh ndŭl mpôl Yuđa.

¹⁹ Y-Yôsuê lah ma Y-Akan “Aơ kon, tâm rnê hom ma Yêhôva Brah Ndu Israel jêh ri tâm rnê ma Păng. Mbơh ngăn hom ma gâp nau may ƀư jêh, lơi mo du ntil ndơ ôh.”

²⁰ Y-Akan plơ̆ lah ma Y-Yôsuê: “Nanê̆, gâp ƀư tih jêh đah Brah Yêhôva, Brah Ndu phung Israel, jêh ri aơ nau gâp ƀư jêh:

²¹ Nôk Gâp saơ tâm ndơ pit in geh du blah ao rjai Sinar, ueh ngăn, prăk klăp lah bar kilô, jêh ri mah klăp lah prao rhiăng gram, gâp hŏ kơnh ir jêh ri lĕ sŏk ndơ nây. Ta ri, gâp pôn jêh lĕ ndơ nây tâm trôm neh tâm ngih bok gâp jêh ri prăk ăn tâm dâng.”

²² Y-Yôsuê đă bunuyh nchuăt tât ta ngih bok, saơ blah ao rjai lĕ pôn jêh ta nây, jêh ri prăk ăn tâm dâng.

²³ Khân păng sŏk lĕ ndơ nây tă bơh rmlak, djôt leo ma Y-Yôsuê jêh ri ma lĕ rngôch phung ƀon lan Israel, jêh nây khân păng dơm lĕ ndơ nây panăp Brah Yêhôva.

²⁴ Rnôk nây, Y-Yôsuê jêh ri lĕ rngôch phung Israel nhŭp Y-Akan, kon sau Y-Sêra, nđâp ma prăk, blah ao rjai, rplay mah, phung kon bu klâu, phung kon bu ur păng, ndrôk, seh bri, biăp, rmlak, jêh ri lĕ rngôch ndô ndơ păng geh, jêh nây khân păng djôt leo lĕ ndô ndơ nây tât ta rlŭng Akôr.

²⁵ Y-Yôsuê lah: “Mâm ƀư may ăn nau uh ah ma phung he? Brah Yêhôva mra ăn tât nau uh ah ma may nar aơ.” Jêh nây lĕ rngôch phung Israel klŭp păng ma lŭ; khân păng su phung nây ma ŭnh jêh ri brôi lơi ma lŭ.

²⁶ Jêh nĕ, khân păng bun du mbŭch lŭ toyh ta klơ Y-Akan, ăt hôm kŏ tât ta nar aơ. Brah Yêhôva lĕ bah jêh nau ji nuih. Yor ri, bu ntơ ntŭk nây jêng rlŭng Akôr kŏ tât ta nar aơ.