Yôhan 14 - Nau Brah Ndu Ngơi 2023

Ngih Mbơ̆

¹ “Lơi dĭng ăn nuih n'hâm khân may uh ah ôh. Chroh hom ma Brah Ndu jêh ri chroh hom ma Gâp tâm ban lĕ.

² Tâm ngih Mbơ̆ Gâp geh âk ntŭk gŭ; lah mâu di pônây, mâm Gâp lŏ lah ma khân may kơt aơ, Gâp hăn nkra ntŭk ma khân may tâm du ntŭk?

³ Lah Gâp hăn nkra ntŭk ma khân may jêh, Gâp mra plơ̆ tay, sŏk leo khân may gŭ ndrel Gâp, gay ta ntŭk Gâp gŭ khân may gŭ ta nây lĕ.

⁴ Khân may gĭt ta ntŭk Gâp hăn, jêh ri gĭt trong hăn đŏng.”

Lĕ nau phung oh mon ôp

⁵ Y-Thômas lah: “Ơ Kôranh Brah, hên mâu gĭt ôh ntŭk May hăn, mâm hên dơi gĭt trong?”

⁶ Brah Yêsu lah: “Gâp jêng trong, nau ngăn jêh ri nau rêh. Lah mâu geh Gâp pôri mâu geh bunuyh dơi hăn tât ta Mbơ̆ ôh

⁷ Lah khân may gĭt năl Gâp, khân may mra gĭt năl Mbơ̆ Gâp tâm ban lĕ; ntơm bơh aƀaơ khân may gĭt năl jêh ri hŏ saơ jêh Păng.”

⁸ Y-Philip lah: “Ơ Kôranh Brah, ntĭm an Mbơ̆ ma hên ƀă, pôri lĕ găp jêh.”

⁹ Brah Yêsu lah: “Hơi Y-Philip, Gâp gŭ ndrel ma khân may hŏ jŏ jêh, ƀiălah khân may mâu gĭt năl Gâp! Mbu nơm hŏ saơ Gâp jêng saơ jêh Mbơ̆. Mâm ƀư may lah: ‘Ntĭm Mbơ̆ ma hên ƀă’?

¹⁰ Di lĕ nau may mâu chroh pô aơ Gâp gŭ tâm Mbơ̆ jêh ri Mbơ̆ gŭ tâm Gâp ƀơh? Lĕ nau Gâp lah ma khân may lĕ rngôch mâu di tă bơh nau mĭn Gâp ôh, ƀiălah Mbơ̆ gŭ tâm Gâp dôl ƀư lĕ nau kan Păng.

¹¹ Nôk Gâp lah Gâp gŭ tâm Mbơ̆ jêh ri Mbơ̆ gŭ tâm Gâp, khân may chroh hom ma Gâp; tơlah mâu, chroh hom lĕ nau kan Gâp pah nây.

¹² Nanê̆, Gâp lah ngăn ma khân may, mbu nơm chroh ma Gâp mra ƀư tâm ban lĕ kan Gâp hŏ ƀư jêh, jêh ri păng mra ƀư lĕ kan toyh lơn, yorlah Gâp hăn plơ̆ sĭt ta Mbơ̆.

¹³ Moh ndơ khân may dăn tâm amoh Gâp, Gâp mra ƀư, gay ma Mbơ̆ dơi geh nau tâm rnê tâm Kon.

¹⁴ Lah khân may dăn moh ndơ khân may ŭch tâm amoh Gâp, Gâp mra ƀư an.”

Brah Yêsu ngơi ton ăn Brah Huêng Ueh

¹⁵ “Lah khân may rŏng ma Gâp, khân may mra djôt prăp lĕ nau vay Gâp.

¹⁶ Gâp mra dăn ma Mbơ̆, Păng mra ăn ma khân may du huê Nơm Bonh Leng êng gŭ ndrel ma khân may n'ho ro,

¹⁷ nâm bu ntĭt Brah Nau Ngăn, ƀiălah neh ntu aơ mâu dơi dơn ôh, yorlah mâu gĭt saơ jêh ri mâu gĭt năl Păng. Ƀiălah khân may gĭt năl Păng yorlah Păng gŭ ndrel ma khân may, jêh ri mra gŭ tâm khân may.

¹⁸ Gâp mâu chalơi khân may jêng kon đơi ôh, Gâp mra plơ̆ đŏng ma khân may.

¹⁹ Hôm ƀât lât, neh ntu mâu hôm saơ Gâp ôh, ƀiălah khân may mra saơ Gâp. Yorlah Gâp rêh, khân may mra gŭ rêh tâm ban lĕ.

²⁰ Tâm nar nây, khân may mra gĭt ma Gâp gŭ tâm Mbơ̆ Gâp; khân may gŭ tâm Gâp, jêh ri Gâp gŭ tâm khân may.

²¹ Mbu nơm geh nau vay Gâp jêh ri djôt prăp, nơm nây yơh rŏng ma Gâp. Mbu nơm rŏng ma Gâp Mbơ̆ Gâp mra rŏng ma păng, Gâp mra rŏng ma păng lĕ, jêh ri tâm mpơl Gâp nơm ma păng.”

²² Y-Yuđas mâu di ôh Y-Yuđas Iskariôt nây, ôp Brah Yêsu: “Ơ Kôranh Brah, mâm ƀư May mra tâm mpơl may ma hên ƀiălah mâu tâm mpơl ôh ma neh ntu?”

²³ Brah Yêsu plơ̆ lah: “Lah mbu nơm rŏng ma Gâp, păng mra djôt prăp nau Gâp ngơi, Mbơ̆ Gâp mra rŏng ma păng, Mbơ̆ Gâp ndrel ma Gâp mra văch ma păng jêh ri gŭ ndrel ma păng.

²⁴ Mbu nơm mâu rŏng ma Gâp, mâu djôt prăp nau Gâp ngơi ôh. Lĕ nau khân may gŭ iăt aƀaơ aơ, mâu di nau Gâp nti ôh, ƀiălah jêng nau Mbơ̆ nti jêng Nơm hŏ njuăl Gâp văch.

²⁵ Gâp lah lĕ nau aơ ma khân may dôl Gâp gŭ ndrel ma khân may.

²⁶ Ƀiălah Nơm Bonh Leng, nâm bu ntĭt Brah Huêng Ueh, Mbơ̆ mra njuăl văch tâm amoh Gâp, Păng mra nti lĕ rngôch ndơ ma khân may, jêh ri nkah ma khân may kah gĭt lĕ rngôch lĕ nau Gâp lah jêh ma khân may.

²⁷ Gâp lơi nau đăp mpăn ma khân may. Gâp ăn nau đăp mpăn ma khân may. Nau đăp mpăn Gâp ăn ma khân may mâu geh kơt neh ntu ăn ôh. Lơi dĭng ăn nuih n'hâm khân may uh ah jêh ri lơi klach ôh.

²⁸ Khân may iăt nau Gâp lah jêh: ‘Gâp hăn, jêh ri Gâp mra plơ̆ đŏng ma khân may.’ Lah khân may rŏng ma Gâp, khân may mra răm maak, yor nau Gâp hăn sĭt ma Mbơ̆, yorlah Mbơ̆ toyh lơn ma Gâp.

²⁹ Aƀaơ Gâp mbơh nau nây ma khân may êlor nau nây tât, pôri lah păng tât khân may mra chroh.

³⁰ Gâp mâu mra hôm ngơi âk ma khân may ôh, yorlah nơm chiă uănh neh ntu aơ văch. Păng mâu geh nau dơi đah Gâp ôh,

³¹ ƀiălah Gâp ƀư tĭng nau Mbơ̆ ntăm jêh ma Gâp gay ma neh ntu gĭt Gâp rŏng ma Mbơ̆. Dâk hăn hom, he luh du bơh aơ.”