Yêrêmi 28 - Nau Brah Ndu Ngơi 2023

Y-Yêrêmi jêh ri Y-Hanania mbơh lor nklă

¹ Tâm năm nây lĕ, rnôk Y-Sêdêkia, hađăch bri Yuđa, ntơm chiă uănh tâm khay prăm ta năm rơh puăn, nơm mbơh lor Y-Hanania, kon bu klâu Y-Asur, tă bơh Gibêôn, ngơi ma gâp tâm ngih Brah Yêhôva, tanăp phung kôranh ƀư brah jêh ri lĕ rngôch phung ƀon lan pô aơ:

² “Brah Yêhôva ma phung tahan, Brah Ndu Israel, lah: ‘Gâp hŏ nkê̆ch lơi mâng mbăk hađăch Babilôn.

³ Tâm bar năm nĕ, Gâp mra djôt plơ̆ sĭt ma ntŭk aơ lĕ rngôch ndơ dŏng tâm ngih Brah Yêhôva, ndơ Y-Nêbukatnetsar, hađăch Babilôn, hŏ sŏk rdu jêh bơh ntŭk aơ jêh ri leo ma ƀon Babilôn.’

⁴ Brah Yêhôva lah: ‘Gâp mra njŭn sĭt Y-Jêkônia, kon bu klâu Y-Jêhôjakim, hađăch Yuđa, jêh ri lĕ rngôch phung Yuđa jêng bu nă hăn gŭ jêh tâm bri Babilôn, ăt plơ̆ sĭt tâm ntŭk aơ, yorlah Gâp nkê̆ch lơi mâng mbăk hađăch Babilôn.’”

⁵ Nôk aơ, tanăp phung kôranh ƀư brah jêh ri lĕ rngôch phung ƀon lan gŭ dâk tâm ngih Brah Yêhôva, nơm mbơh lor Y-Yêrêmi sĭt lah ma nơm mbơh lor Y-Hanania.

⁶ Nơm mbơh lor Y-Yêrêmi, lah: “Amen! Dăn Brah Yêhôva ƀư nâm bu pônây! Dăn Brah Yêhôva ăn tât ngăn nau may hŏ mbơh lor jêh, jêh ri djôt lĕ ndơ dŏng tâm ngih Yêhôva ndrel ma lĕ rngôch phung bu nă plơ̆ sĭt ta ntŭk aơ tă bơh bri Babilôn!

⁷ Nđâp lah, iăt hom nau gâp ngơi lăp ta tôr may jêh ri lĕ rngôch phung ƀon lan.

⁸ Ntơm bơh rnôk kăl e, lĕ rngôch phung nơm mbơh lor rnôk gâp jêh ri may hŏ mbơh lor ma nau tâm lơh, nau mhĭk tât, jêh ri nau ji tưp mra tât ma âk n'gor bri jêh ri ma lĕ bri dak toyh ktang.

⁹ Bi ma nơm mbơh lor mbơh nau đăp mpăn, nau mbơh lor nây mbơh tât di ngăn, pôri mra gĭt nau mbơh lor nây n'hêl nanê̆ ngăn bơh Brah Yêhôva ăn tât!”

¹⁰ Nơm mbơh lor Y-Hanania doh mâng mbăk bơh trô ko nơm mbơh lor Y-Yêrêmi, nkê̆ch pă lơi mâng mbăk,

¹¹ jêh ri Y-Hanania mbơh tanăp lĕ rngôch phung ƀon lan pô aơ: “Brah Yêhôva lah: ‘Tâm bar năm nĕ, Gâp mra nkê̆ch pă lơi mâng mbăk Y-Nêbukatnetsar, hađăch Babilôn, ta trô ko lĕ rngôch phung mpôl băl bunuyh tâm ban pônây.’” Nơm mbơh lor Y-Yêrêmi du hăn.

¹² Jêh nơm mbơh lor Y-Hanania nkê̆ch mâng mbăk bơh trô ko Y-Yêrêmi, pôri geh nau Brah Yêhôva lah ma Y-Yêrêmi:

¹³ “May hăn mbơh hom ma Y-Hanania pô aơ Brah Yêhôva lah pô aơ: ‘May hŏ nkê̆ch jêh mâng mbăk ma tơm si ƀiălah ntrok hom ta nây du mlâm mâng mbăk đah loih.

¹⁴ Yorlah Brah Yêhôva ma phung tahan, Brah Ndu Israel, lah: Gâp hŏ dơm jêh mâng mbăk loih ta trô ko lĕ rngôch bri dak aơ, gay ma khân pah kan Y-Nêbukatnetsar, hađăch Babilôn jêh ri khân păng hŏ pah kan ma hađăch nây. Nđâp ma mpô mpa bri tâm ndrêch Gâp ăt jao ăn ma hađăch nây.’”

¹⁵ Nơm mbơh lor Y-Yêrêmi lah ma Y-Hanania: “Ơ Hanania, iăt hom! Brah Yêhôva mâu mâp prơh may hăn ôh, ƀiălah may ăn phung ƀon lan aơ rnơm nsing ma nau mƀruh.

¹⁶ Yor nây, Brah Yêhôva lah: ‘Aơ, Gâp mra mprơh may bơh klơ neh ntu. Năm aơ yơh may mra khĭt yorlah may hŏ ƀư nau uh ah tâm rdâng đah Brah Yêhôva.’”

¹⁷ Tâm khay pơh năm nây lĕ, nơm mbơh lor Y-Hanania hŏ khĭt.