Sôphôni 3 - Nau Brah Ndu Ngơi 2023

Nau tâm rmal ma ƀon Yêrusalem

¹ Rêh ni ngăn ma ƀon tâm rdâng jêh ri ƀơ̆ ƀơch, Jêng ƀon toyh ƀư nau tŭn jot!

² Păng mâu tông ôh bâr bu, Mâu dơn nau nkra ntĭm; Mâu rnơm nsing ma Brah Yêhôva, Mâu hăn dăch ôh Brah Ndu păng.

³ Phung kôranh tâm ƀon toyh Nâm bu yau mŭr ngrông huy; Phung kôranh phat dôih păng nâm bu so bri dôl măng, Khân păng mâu têm om ôh tât kêng ôi.

⁴ Phung nơm mbơh lor păng Sưr rlau da dê, mƀruh ndơm; Phung kôranh ƀư brah păng ƀư ƀơ̆ ntŭk kloh ueh, Jêh ri ƀư kue lơi nau vay.

⁵ Brah Yêhôva gŭ ta nklang ƀon, jêng Nơm sŏng srăng, Păng mâu prot ƀư nau mhĭk ôh. Ăp ôi, Păng ƀư nau di tâm dâng nau ang, Mâu mâp roh hêng ôh; Ƀiălah bunuyh kue mâu gĭt prêng ôh.

⁶ “Gâp hŏ ƀư rai jêh phung ntil mpôl bunuyh, Ƀư lĕ vâl tŭm gak ta njônh mpêr ƀon jêng rlâm rai. Gâp ƀư ma trong sâng păng jêng bri hŏng, Kŏ tât mâu geh ôh bunuyh hăn rgăn ta nây. Lĕ ƀon khân păng bu hŏ ƀư rai jêh, Mâu hôm geh du huê bunuyh, jêh ri kŏ mâu geh lĕ bunuyh gŭ ta nây.

⁷ Gâp hŏ lah jêh: ‘May knŏng klach yơk ma Gâp, Dơn nau bu nkra ntĭm!’ Pôri ntŭk păng gŭ bu mâu mra ƀư rai ôh Tĭng ăp ntil nau Gâp hŏ nal jêh ma păng. Ƀiălah khân păng dâk ơm ôi Gay ƀư lĕ nau ƀai.”

Nau tâm rmal jêh ri tâm rgâl lĕ bri dak

⁸ Yor nây, Brah Yêhôva lah: “Gŭ kâp hom Gâp, Kŏ tât nar Gâp mra dâk mbơh ăn jêng nanê̆; Yorlah Gâp hŏ mĭn jêh tâm rgum lĕ mpôl băl bunuyh Jêh ri plơ̆ rgum tay lĕ bri hađăch, Gay nkhŭt ta khân păng nau ji nuih, Nây jêng lĕ rngôch nau Gâp ji nuih hâu ngăn, Yorlah lĕ rngôch bri dak mra rai lôch. Ma ŭnh nau Gâp ntôn.

⁹ Rnôk nây, Gâp mra rgâl phung ƀon lan, Ƀư kloh trôm mbung, Gay lĕ rngôch kuăl amoh Brah Yêhôva da dê, Du ai pah kan ma Păng ndrel n'grŭp.

¹⁰ Tă bơh đah ri kơh dak krong n'gor Kus, Phung yơk mbah ma Gâp, Nây jêng phung Gâp hŏ ƀư du pru, Mra leo ndơ nhhơr ma Gâp.

¹¹ Tâm nar nây, may mâu mra hôm bêk prêng ôh Ma lĕ nau may hŏ ƀư jêh gay tâm rdâng đah Gâp; Yorlah nôk nây, Gâp sŏk lơi tă bơh may Phung sưr ir ta nklang may; Jêh ri may mâu mra hôm ôh nau sưr Tâm yôk kloh ueh Gâp đŏng.

¹² Gâp mra chalơi ta nklang may Du phung ƀon lan o ach jêh ri dêh rhêt, Khân păng mra gŭ krap tâm amoh Brah Yêhôva.

¹³ Phung Israel hôm e klen mâu ôh mra ƀư mhĭk, Mâu ngơi mƀruh, jêh ri mbung mpiăt mâu hôm ngơi ndơm ôh; Yorlah khân păng mra sông sa nhêt jêh ri rlu lâng bê̆ch, Ƀiălah mâu geh ôh bunuyh ƀư nkrit khân păng.”

Nau mprơ răm maak

¹⁴ Hơi kon bu ur Siôn, mprơ huy hom! Hơi Israel, nter bâr ngơi huy! Hơi kon bu ur ƀon Yêrusalem, Răm rhơn hom ma lĕ nuih n'hâm!

¹⁵ Brah Yêhôva hŏ sŏk lơi jêh nau phat dôih bơh ay, Păng nsot lĕ nơm rlăng ay. Hađăch Israel jêng Brah Yêhôva gŭ ta nklang ay, Ay mâu mra hôm klach nau mhĭk đŏng ôh.

¹⁶ Tâm nar nây, bu mra lah ma ƀon Yêrusalem: “Hơi Siôn, lơi klach ôh! Lơi ăn ti may ra ai ôh!

¹⁷ Yêhôva Brah Ndu may gŭ ta nklang may, Păng jêng Nơm geh nau brah mra tâm rklaih may; Păng mra rhơn răm ngăn yor ma may, Yor nuih n'hâm rŏng, Păng mra gŭ rklăk, Jêh ri yor ma may, Păng mra mprơ ma nau rhơn răm.”

Nau ton ma phung ƀon lan Kôranh Brah

¹⁸ “Gâp mra tâm rgum phung dôl geh nau rngot, Yorlah mâu geh văch râng nau sông sa tâm nar rƀŭn toyh; Khân păng luh bơh may, ƀư anh jâk ma nau bêk prêng.

¹⁹ Aơ, tâm nôk nây, Gâp mra tâm rdâng đah lĕ rngôch phung tŭn jot may; Gâp mra tâm rklaih ƀư bah phung kuet rvĕn, Kuăl rgum phung tă bu mprơh du, Gâp mra ƀư ma khân păng geh nau tâm rnê jêh ri nau lư n'găr Tâm ăp ntŭk bu hŏ ƀư bêk prêng jêh khân păng.

²⁰ Tâm nôk nây, Gâp mra djôt leo khân may plơ̆ sĭt, Nây jêng nôk Gâp tâm rgum tay khân may; Yorlah Gâp mra ƀư ma khân may lư n'găr Jêh ri geh nau tâm rnê ta nklang lĕ rngôch phung ƀon lan tâm neh ntu, Lah Gâp leo phung tă ƀư bu nă bơh phung khân may plơ̆ sĭt Tanăp măt khân may ro,” Brah Yêhôva lah pônây.