Samƀŭt Pôl Njuăl Ăn Ma Phung Nsing Ta Ƀon Rôm 3 - Nau Brah Ndu Ngơi 2023

¹ Pôri moh khlay phung Yuđa geh? Mâu lah moh khlay nau koh ntâu?

² Nau khlay tâm lĕ rngôch ntil. Lor lơn, nau ngơi Brah Ndu ăn ma phung Yuđa

³ Ƀiălah moh nau kan tât geh tơlah bar pe nuyh tâm phung khân păng mâu chroh? Di lĕ nau khân păng mâu chroh dơi ƀư rai nau răp jăp Brah Ndu lĕ bơh?

⁴ Mâu mâp tâm ban pônây ôh! Brah Ndu jêng nanê̆ ngăn, nđâp tơlah lĕ rngôch bunuyh mƀruh da dê, nâm bu nchih jêh: “Gay ma Kôranh Brah uănh dơn may sŏng srăng tâm nau Păng ngơi, Jêh ri geh nau dơi tơlah bu phat dôih may.”

⁵ Ƀiălah tơlah nau mâu sŏng srăng he tâm mpơl nau sŏng srăng Brah Ndu, mâm he mra lah? Di lĕ Brah Ndu mâu sŏng tơlah Păng nkhŭt nau ji nuih klơ he mâu lah mâu? (Gâp ngơi tĭng nâm bunuyh ngơi).

⁶ Mâu mâp tâm ban pônây! Yorlah tơlah pônây, mâm ƀư Brah Ndu dơi phat dôih neh ntu?

⁷ Bi tơlah nau gâp mƀruh ƀư ma nau ngăn Brah Ndu ntop nau chrêk rmah, mâm ƀư bu hôm phat dôih gâp tâm ban ma bunuyh tih?

⁸ Pôri mâm ƀư he mâu “ƀư nau mhĭk gay geh nau ueh”? — tâm ban ma ƀaƀă bunuyh ngơi nchơt ma hên nti jêh nau nây — Khân păng geh nau phat dôih jêng di ngăn.

Mâu geh bunuyh sŏng srăng ôh

⁹ Mâm ƀư? He jêng moh nau ueh lơn lĕ? Lĕ rngôch mâu ôh; yorlah he gĭt nanê̆ jêh ma lĕ rngôch phung Yuđa jêh ri phung Grek gŭ tâm dâng nau dơi ktang nau tih da dê,

¹⁰ mâm bu nchih jêh pô aơ: Mâu geh du huê bunuyh sŏng srăng ôh, Nđâp tơlah du huê mâu geh đŏng.

¹¹ Mâu geh du huê gĭt rbăng ôh, Mâu geh du huê joi Brah Ndu ôh.

¹² Lĕ rngôch vĭ nhhơt, plơ̆ jêng dơm dam da dê; Mâu geh du huê bunuyh ƀư nau ueh ôh, Nđâp tơlah du huê mâu geh đŏng.

¹³ “Rmlông khân păng nâm bu trôm môch pơk huy;” “Khân păng dŏng mpiăt khân păng nơm mƀruh nchơt bu; Kăch bêh khih pôn tâm dâng ndôi khân păng.”

¹⁴ “Trôm mbung khân păng bêng ma lĕ nau rtăp rak jêh ri nau rngot ngăn ngên.”

¹⁵ “Khân păng ngăch jâng gay ma ƀư nkhŭt mham,

¹⁶ Khân păng srih nau ƀư rai jêh ri nau rêh ni,

¹⁷ Khân păng mâu mâp gĭt trong nau đăp mpăn ôh.”

¹⁸ “Nau klach yơk ma Brah Ndu mâu gŭ tanăp khân păng ôh.”

¹⁹ He gĭt lĕ nau vay lah, jêng lah ma phung gŭ tâm dâng nau vay gay ma lĕ rngôch trôm mbung gŭ rklăk da dê, jêh ri lĕ rngôch bunuyh ta neh ntu dơn nau tih tanăp Brah Ndu;

²⁰ yorlah mâu geh du huê yor kan nau vay gay ma dơi kơp jêng sŏng srăng tanăp Brah Ndu, yorlah nau vay ăn bu gĭt nau tih.

Nau sŏng srăng Brah Ndu. – Kơp sŏng srăng bơh nau chroh ( 3:21 – 5:21 ) Nau sŏng srăng Brah Ndu

²¹ Ƀiălah aƀaơ, nau sŏng srăng Brah Ndu tâm mpơl jêh padih nau vay. Nau vay jêh ri phung nơm mbơh lor mbơh nkoch ma nau nây.

²² Nây jêng nau sŏng srăng Brah Ndu, yor ma nau chroh ma Yêsu Krist, ăn ma lĕ rngôch bunuyh geh nuih n'hâm chroh, mâu tâm nkhah bu ôh;

²³ yorlah lĕ rngôch bunuyh ƀư tih da dê jêh, kƀah nau chrêk rmah Brah Ndu;

²⁴ yor nau yô̆ Brah Ndu, yor nau tâm chuai tâm Brah Yêsu Krist, khân păng dơi kơp sŏng srăng ƀiălah mâu hôm mplơ̆ moh rnoh lĕ.

²⁵ Brah Ndu hŏ rdâk jêh Păng jêng mpa ƀư brah chuai nau tih ma mbu nơm geh nau chroh tâm mham Păng. Nau aơ mpơl nau sŏng srăng Brah Ndu, yorlah Păng sŏk nuih n'hâm srôih sŏk lơi lĕ nau tih tâm rnôk kăl e.

²⁶ Tâm rnôk nây, Păng tâm mpơl ma Păng yơh jêng nau sŏng srăng păng jêh ri kơp sŏng srăng ma mbu nơm geh nuih n'hâm chroh ma Brah Yêsu.

²⁷ Pônây moh nau gay ma ngơi ntưih? Mâu geh moh nau gay ma ngơi ntưih lĕ. Moh nau vay bu nsing? Ma nau vay kan bu ƀư ƀơh? Mâu di ôh, ƀiălah nsing ma nau vay nau chroh.

²⁸ Yor he chroh ma du huê bunuyh dơi kơp sŏng srăng ma nau chroh mâu di ma kan tĭng nau vay ôh.

²⁹ Mâu lah Brah Ndu knŏng jêng Brah Ndu ma phung Yuđa dơm? Mâu di hĕ Păng jêng Brah Ndu ma phung bu năch tâm ban lĕ? Di ngăn, Păng ăt jêng Brah Ndu phung bu năch lĕ;

³⁰ yorlah Brah Ndu jêng nguay, jêng Nơm mra ƀư ma phung koh ntâu dơi kơp sŏng srăng ma nau chroh, ƀư đŏng ma phung mâu koh ntâu dơi kơp sŏng srăng ma nau chroh.

³¹ Pôri, he yor nau chroh he mƀăr lơi nau vay lĕ? Mâu mâp tâm ban pônây! Ƀiălah, he ƀư ăn nâp ngăn ngên nau vay.