Phung Kôranh Phat Dôih 9 - Nau Brah Ndu Ngơi 2023

Y-Abimêlek mĭn ŭch pĭt nau chiă uănh

¹ Y-Abimêlek, kon bu klâu Y-Jêrubaal, hăn văch ma phung kônh va păng jêh ri lĕ ndŭl mpôl mê̆ păng gŭ ƀon toyh Sichem:

² “Dăn khân may ôp nau mĭn lĕ rngôch phung bunuyh Sichem: ‘Mâu lah lĕ rngôch pơh jât nuyh kon bu klâu Y-Jêrubaal chiă uănh khân may mâu lah knŏng du huê kôranh chiă uănh ma khân may, moh nau jêng ueh lơn?’ Ăn khân may kah gĭt đŏng ma gâp jêng noi deh du mham ndrel ma khân may.”

³ Nôk phung kônh va păng djôt lĕ nau ngơi aơ nkoch tay ma lĕ rngôch phung ƀon lan Sichem tăng, jêh ri nuih n'hâm khân păng nkêng mpeh ma Y-Abimêlek, yorlah khân păng lah: “Păng jêng oh nâu he.”

⁴ Khân păng ăn ma Y-Abimêlek pơh jât rêl prăk sŏk tă bơh ngih brah Baal-Bêrit. Y-Abimêlek sŏk prăk nây păng nkhôm phung bu klâu djơh mhĭk, blă blơ tĭng ndô̆ păng.

⁵ Păng hăn tât ta ngih mbơ̆ păng ta Ôphra, nkhĭt phung oh nâu păng, tâm pơh jât nuyh phung kon bu klâu Y-Jêrubaal, ta klơ lŭ toyh. Knŏng du huê Y-Jôtham, kon mpŏt Y-Jêrubaal, hôm rêh, yorlah păng lĕ du krap jêh.

⁶ Nôk nây, lĕ rngôch kôranh chiă uănh ƀon toyh Sichem jêh ri Bet-Milô văch ndrel n'grŭp, ta meng tơm si guyh ntŭk plơp lŭ ta Sichem gay yơk Y-Abimêlek njêng hađăch.

⁷ Dôl gĭt nau nây, Y-Jôtham hăn gŭ ta klơ n'gơn yôk Gêrisim, păng nter huy pô aơ: “Hơi phung Sichem, iăt hom ma gâp gay Brah Ndu dơi iăt khân may:

⁸ Tơm si hŏ hăn tŏ dak ƀâu kah Ma du huê hađăch chiă uănh khân păng. Khân păng lah ma tơm ôlive pô aơ: ‘Chiă uănh hom hên.’

⁹ Ƀiălah tơm ôlive plơ̆ lah: ‘Ăn gâp chalơi lĕ dak ngi Tă bơh nĕ phung brah jêh ri bunuyh geh nau yơk Gay hăn ƀư mpât tơm si?’

¹⁰ Lĕ rngôch tơm si lah ma tơm rvi: ‘Văch hom, chiă uănh hên.’

¹¹ Ƀiălah tơm rvi plơ̆ lah: ‘Gâp mra chalơi lĕ play njŭng jêh ri play ueh Gay hăn ƀư mpât tơm si ƀơh?’

¹² Lĕ rngôch tơm si lah ma tơm krăk ƀâu: ‘Văch hom chiă uănh hên.’

¹³ Ƀiălah tơm krăk ƀâu plơ̆ lah: ‘Gâp mra chalơi lĕ ndrănh ueh Jêng ndơ ƀư maak ma phung brah jêh ri bunuyh Gay hăn ƀư mpât tơm si ƀơh?’

¹⁴ Nôk nây, lĕ rngôch tơm si lah ma rlô lok pô aơ: ‘Văch hom chiă uănh hên.’

¹⁵ Rlô lok plơ̆ lah ma tơm si: ‘Tơlah ma nuih n'hâm nanê̆ ngăn khân may ŭch tŏ dak ƀâu kah ăn gâp jêng hađăch khân may Văch hom nde tâm dâng gui n'hâm gâp; Lah mâu pônây, ăn geh ŭnh luh bơh rlô lok Jêh ri su tơm si sêdar n'gor Liban!’

¹⁶ Aƀaơ, di lĕ khân may gŭ ngao ma nuih n'hâm nanê̆ ngăn jêh ri sŏng srăng dôl khân may njêng Y-Abimêlek jêng hađăch? Khân may ƀư ueh jêh ma Y-Jêrubaal jêh ri ngih păng? Mâu lah khân may gĭt yô̆ nau păng ƀư jêh ma khân may?

¹⁷ Yorlah mbơ̆ gâp tâm lơh an jêh ma khân may, păng hŏ sân săk jăn gay tâm rklaih khân may tă bơh ti phung ƀon lan Madian.

¹⁸ Ƀiălah nar aơ khân may dâk tâm rdâng đah ngih mbơ̆ gâp, hŏ nkhĭt jêh pơh jât nuyh kon bu klâu păng ta klơ lŭ toyh, jêh ri yơk Y-Abimêlek, kon bu klâu oh mon bu ur, njêng hađăch chiă uănh ƀon Sichem, yorlah păng jêng oh nâu khân may.

¹⁹ Pônây, tơlah nar aơ khân may sŏk nau nuih n'hâm nanê̆ ngăn jêh ri sŏng srăng ma nau yơk ma Y-Jêrubaal jêh ri ngih păng, pôri Y-Abimêlek ăt răm maak ta ntŭk khân may jêh ri khân may tâm ban đŏng răm maak ndrel păng!

²⁰ Bi tơlah mâu di ôh pônây, ăn ŭnh luh bơh Y-Abimêlek su lơi phung kôranh chiă uănh ƀon toyh Sichem jêh ri Bet-Milô; jêh ri ăn ŭnh luh bơh phung bunuyh Sichem jêh ri Bet-Milô su lơi Y-Abimêlek!”

²¹ Jêh nau nây, Y-Jôtham nchuăt du jêh ri tât gŭ ta Bêr yor klach Y-Abimêlek, nâu păng nơm.

²² Y-Abimêlek chiă uănh phung Israel pe năm.

²³ Brah Ndu prơh du huê brah mhĭk ƀư nau ƀlăch ƀlêr ta nklang Y-Abimêlek jêh ri bunuyh Sichem, ƀư ăn phung ƀon lan Sichem tâm rdâng đah Y-Abimêlek.

²⁴ Nau aơ dơi tât gay plơng har nau tih nkhĭt bunuyh yor păng hŏ ƀư tih jêh đah pơh jât nuyh kon bu klâu Y-Jêrubaal, jêh ri ƀư ăn mham khân păng tŏ ta klơ Y-Abimêlek, jêng bunuyh hŏ nkhĭt oh nâu khân păng, jêh ri tŏ mham ndrel ta klơ phung kôranh chiă uănh ƀon toyh Sichem yorlah hŏ kơl păng tâm nkhĭt ndrăng oh nâu khân păng nơm.

²⁵ Phung bunuyh Sichem prơh bunuyh hăn kâp ƀư ma Y-Abimêlek ta klơ n'gơn yôk jêh ri khân păng pit lĕ rngôch ndơ phung hăn găn rŏ trong. Bu mbơh nau nây ma Y-Abimêlek.

²⁶ Nôk nây, Y-Gaal, kon bu klâu Y-Êbet, nđâp ma oh nâu păng hăn tât ta Sichem jêh ri phung bunuyh Sichem rnơm nsing ma păng.

²⁷ Khân păng hăn luh ta mir, pĕ krăk ƀâu tâm n'gar trao, kĭn păt ndrănh krăk ƀâu jêh ri ƀư nau nhêt sa. Khân păng lăp tâm ngih brah mhĭk sông sa nhêt, jêh nây rak rtăp ma Y-Abimêlek.

²⁸ Y-Gaal, kon bu klâu Y-Êbet, lah: “Mbu moh Y-Abimêlek? Phung ƀon lan ƀon toyh Sichem he mbu nơm jêng dĭng ma he pah kan ma păng? Păng mâu di hĕ kon bu klâu Y-Jêrubaal? Bi Y-Sêbul jêng bunuyh kơl ma păng? Pah kan hom ma phung kon sau Y-Hamôr, jêng chô yau Y-Sichem! Mâm ƀư he pah kan ma Y-Abimêlek?

²⁹ Ô! Tơlah phung ƀon lan aơ gŭ tâm dâng ti gâp, gâp mra mprơh Y-Abimêlek hăn luh!” Y-Gaal rlong uănh: “Y-Abimêlek! Ntop đŏng ăn âk tahan may gay hăn luh tâm lơh!”

³⁰ Y-Sêbul, kôranh chiă uănh ma ƀon nây, tăng lĕ nau ngơi Y-Gaal, kon bu klâu Y-Êbet, păng hao ji nuih.

³¹ Păng ndâp prơh bunuyh hăn ma Y-Abimêlek, jêh ri lah: “Aơ, Y-Gaal, kon bu klâu Y-Êbet, jêh ri oh nâu păng văch jêh ma Sichem, nsŭk nsôr phung ƀon lan tâm rdâng đah may.

³² Pônây, măng aơ, ăn may jêh ri phung bunuyh hăn tĭng may dâk hom, gŭ kâp tâm mir.

³³ Ôi taơ kêng luh nar, ăn may kah rngăl ơm ôi, rduh lơh ma ƀon. Tơlah Y-Gaal jêh ri phung tahan păng hăn lơh may, may dơi ƀư ma khân păng tĭng nâm găl.”

³⁴ Pônây, Y-Abimêlek jêh ri lĕ rngôch phung tahan ndrel ma păng kah rngăl dôl măng, tâm pă phung tahan jêng puăn phung, jêh ri gŭ kâp dăch ta Sichem.

³⁵ Y-Gaal, kon bu klâu Y-Êbet, hăn luh jêh ri gŭ ta ntŭk lăp mpông ƀon toyh. Y-Abimêlek jêh ri lĕ rngôch phung tahan ndrel ma păng hăn luh bơh ntŭk kâp dâp.

³⁶ Tơlah Y-Gaal saơ phung tahan păng lah ma Y-Sêbul pô aơ: “Ri, gâp saơ phung tahan hăn trŭnh tă bơh klơ yôk.” Y-Sêbul lah: “May saơ gui n'hâm yôk ƀiălah mĭn jêng bu bunuyh!”

³⁷ Ƀiălah Y-Gaal ngơi đŏng: “Ri, geh du phung tahan hăn trŭnh tă bơh ta nklang n'gor jêh ri geh du phung tahan văch găn tât tă bơh ntŭk tơm si guyh Phung N'hŭm.”

³⁸ Y-Sêbul lah: “Trôm mbung may nơm lah: ‘Mbu moh Y-Abimêlek gay ma hên pah kan ma păng!’ Pônây, lĕ nau ngơi ntưih may aƀaơ ta ntŭk gŭ? Mâu di hĕ phung tahan aơ jêng phung may tâm rmot? Hăn luh hom tâm lơh đah khân păng!”

³⁹ Y-Gaal njŭn leo phung bunuyh Sichem hăn luh jêh ri tâm lơh đah Y-Abimêlek.

⁴⁰ Y-Abimêlek hăn tĭng Y-Gaal jêh ri păng nchuăt du panăp Y-Abimêlek. Âk bunuyh sôt rmanh chôt khĭt rŏ trong, kŏ tât ta ntŭk lăp mpông ƀon toyh.

⁴¹ Y-Abimêlek gŭ ta Aruma; bi Y-Sêbul mprơh Y-Gaal jêh ri oh nâu păng hăn luh, mâu ăn ma khân păng gŭ ta Sichem đŏng ôh.

⁴² Ôi taơ, phung ƀon lan Sichem hăn luh ta mir jêh ri bu mbơh nau nây ma Y-Abimêlek gĭt.

⁴³ Păng njŭn leo phung tahan păng, tâm pă jêng pe phung jêh ri gŭ kâp dâp ta mir. Dôl saơ phung ƀon lan hăn luh tă bơh ƀon toyh, păng dâk ro jêh ri rduh lơh khân păng.

⁴⁴ Y-Abimêlek jêh ri phung tahan ndrel păng nchuăt ngăch tât dâk panăp mpông ƀon toyh; bi bar phung tahan ri rduh lơh lĕ rngôch phung gŭ tâm mir jêh ri nkhĭt khân păng.

⁴⁵ Y-Abimêlek hăn tâm lơh ƀon toyh nây lôch du nar, sŏk ƀon toyh jêh ri nkhĭt lĕ rngôch bunuyh gŭ tâm ƀon toyh. Păng ƀư rai lơi lĕ ƀon toyh jêh ri srih boh klơ nây.

⁴⁶ Tăng nau nây, lĕ rngôch phung ƀon lan gŭ tâm ngih gung Sichem lăp rgum gŭ tâm pôih ngih brah Êl-Bêrit.

⁴⁷ Bu mbơh nau nây ma Y-Abimêlek gĭt pô aơ lĕ rngôch phung ƀon lan gŭ tâm ngih gung Sichem lĕ rgum băl ndrel jêh tâm pôih.

⁴⁸ Y-Abimêlek jêh ri lĕ rngôch phung tahan hăn hao klơ yôk Salmôn. Păng djôt ta ti du mlâm sung jêh ri kăt du mlâm n'gĭng tơm si, tuy ta klơ săng nglik. Păng lah ma phung tahan ndrel păng pô aơ: “Moh ndơ khân may saơ gâp ƀư? Ƀư hom gơnh oi kơt gâp!”

⁴⁹ Pônây, ăp nơm kăt du mlâm n'gĭng tơm si jêh ri hăn tĭng Y-Abimêlek. Khân păng dơm lĕ n'gĭng tơm si nây jŭm tâm pôih jêh ri su lơi pôih nđâp phung bunuyh gŭ ta nây ma ŭnh. Pônây, lĕ rngôch bunuyh gŭ tâm ngih gung Sichem, lĕ phung bu klâu nđâp phung bu ur klăp lah du rbăn nuyh, khĭt yor ŭnh sa da dê.

⁵⁰ Jêh nau nây, Y-Abimêlek hăn tâm lơh Thêbes, nchueng jŭm jêh ri pit sŏk ƀon toyh.

⁵¹ Ta nklang ƀon geh du mlâm ngih tŭm dŭt nâp ngăn, lĕ rngôch phung ƀon lan gŭ tâm ƀon, lĕ phung bu ur jêh ri bu klâu jêh ri lĕ kôranh chiă uănh gŭ tâm ƀon nchuăt du lăp tâm ngih tŭm nây da dê jêh ri nchăng mpông, jêh nây hao klơ n'gơn ngih tŭm.

⁵² Y-Abimêlek rduh lơh, ŭch pit sŏk ngih gung. Ƀiălah dôl hăn tât ta mpông ngih gung gay su ma ŭnh,

⁵³ geh du huê bu ur klŭp ma mpăl ta bôk Y-Abimêlek ƀư ma păng nchah nting bôk.

⁵⁴ Păng kuăl ma nau ndal du huê bu klâu ndăm nơm djôt khêl păng jêh ri lah: “Tŏk hom đao jêh ri nkhĭt lơi hom gâp, klach bu lah: ‘Du huê bu ur nkhĭt jêh gâp!’” Pônây, bu klâu ndăm nây ntâp păng jêh ri păng khĭt.

⁵⁵ Tơlah Phung ƀon lan Israel saơ Y-Abimêlek lĕ khĭt jêh ăp nơm sĭt ngih păng nơm.

⁵⁶ Pônây, Brah Ndu mplơ̆ plơng nau mhĭk ma Y-Abimêlek hŏ ƀư tih jêh ma mbơ̆ păng nôk păng nkhĭt pơh jât nuyh oh nâu păng.

⁵⁷ Brah Ndu tâm ban đŏng mplơ̆ plơng ma phung ƀon lan ƀon toyh Sichem yor lĕ rngôch nau djơh khân păng ƀư jêh. Nau mhĭk ăn tât klơ bôk khân păng di nâm nau rak rtăp Y-Jôtham, kon bu klâu Y-Jêrubaal.