Phung Kôranh Phat Dôih 8 - Nau Brah Ndu Ngơi 2023

Y-Gidêôn dơi lơh phung Madian nglĕ dŭt

¹ Phung Êphraim lah đah Y-Gidêôn: “Mâm ƀư may ƀư ma hên nâm bu pô aơ? Mâm ƀư nôk may hăn tâm lơh đah phung Madian, may mâu kuăl hên hăn ndrel ma may?” Khân păng tâm djrel ma păng hâu ngăn ngên.

² Ƀiălah păng plơ̆ lah ma khân păng pô aơ: “Nau gâp dơi ƀư mâu geh khlay đah khân may ôh? Mâu di hĕ nau phung Êphraim dônh play krăk ƀâu jêng ueh lơn ma nau phung Abiêser pĕ play krăk ƀâu?

³ Brah Ndu jao jêh Y-Ôrep jêh ri Y-Sêep jêng bar phung kôranh Madian tâm ti khân may. Moh nau gâp dơi ƀư jêh tơlah tâm rđĭl đah khân may?” Tơlah khân păng tăng lĕ nau ngơi nây, khân păng roh jêh nau ji nuih.

⁴ Y-Gidêôn jêh ri phung pe rhiăng bunuyh hăn ndrel ma păng tât ta dak krong Yurdan jêh ri rgăn dak krong. Nđâp tơlah huăr jêh, khân păng ăt tĭng lơh phung tahan rlăng.

⁵ Păng lah ma phung ƀon Sukôt pô aơ: “Ăn phung tahan gâp djê̆ piăng let, yorlah khân păng huăr ngăn; gâp hăn tĭng Y-Sêba jêh ri Y-Salmuna, jêng bar phung hađăch Madian.”

⁶ Ƀiălah phung kôranh chiă uănh ƀon Sukôt plơ̆ lah: “Ơm ti may lĕ geh nhŭp Y-Sêba jêh ri Y-Salmuna dĭng may đă hên ăn piăng let ma phung tahan may?”

⁷ Y-Gidêôn plơ̆ lah: “Tơlah pôri, Brah Yêhôva jao jêh Y-Sêba jêh ri Y-Salmuna tâm ti gâp, gâp mra sŏk rlô lok tâm bri rdah dong hăch mlay săk khân may!”

⁸ Tă bơh nây, păng hăn hao tât ta ƀon Pênuel jêh ri ăt ngơi ma phung ƀon lan Pênuel tâm ban nây đŏng. Phung ƀon lan Pênuel plơ̆ lah đŏng ma păng nâm bu phung ƀon lan Sukôt plơ̆ lah jêh.

⁹ Yor ri, păng lah đŏng ma phung ƀon lan Pênuel pô aơ: “Tơlah gâp plơ̆ sĭt ma nau đăp mpăn, gâp mra ƀư rlâm ngih gung aơ.”

¹⁰ Nôk nây, Y-Sêba jêh ri Y-Salmuna gŭ ta Karkor ndrel ma phung tahan khân păng, geh klăp lah tâm du rmưn prăm rbăn nuyh, jêng rnoh phung tahan hôm klen bơh phung ƀon lan mpeh Luh Nar; yorlah du rsen bar rmưn bunuyh blau djôt đao hŏ khĭt jêh.

¹¹ Y-Gidêôn hăn hao rŏ trong phung gŭ tâm ngih bok mpeh luh nar ta ƀon toyh Nôba jêh ri Jôgbêha, hăn lơh ta pôih phung tahan, yorlah phung tahan mĭn khân păng nơm geh nau đăp mpăn.

¹² Y-Sêba jêh ri Y-Salmuna, bar hađăch Madian nchuăt du, ƀiălah Y-Gidêôn hăn tĭng jêh ri nhŭp khân păng, ƀư krit kir ma lĕ phung tahan khân păng.

¹³ Y-Gidêôn, kon bu klâu Y-Jôas, plơ̆ sĭt tă bơh ntŭk tâm lơh, rgăn sop Hêres.

¹⁴ Păng nhŭp du huê bu klâu ndăm ta Sukôt, ôp rgât păng jêh ri păng nchih amoh phung kôranh chiă uănh jêh ri amoh phung bu ranh Sukôt, jêng pơh jât ma pơh bunuyh.

¹⁵ Jêh nây păng tât ma phung ƀon lan ƀon toyh Sukôt, jêh ri lah: “Aơ jêng Y-Sêba jêh ri Y-Salmuna, khân may mưch ma gâp pô aơ: ‘Ơm ti may lĕ geh nhŭp Y-Sêba jêh ri Y-Salmuna dĭng may đă hên ăn piăng let ma phung tahan huăr may sa?’”

¹⁶ Pôri, păng nhŭp phung kôranh bu ranh ƀon toyh nây, sŏk rlô lok tâm bri rdah gay nti ma phung bunuyh Sukôt du nau nti.

¹⁷ Păng ƀư rlâm lơi đŏng ngih gung Pênuel jêh ri nkhĭt lơi lĕ phung ƀon toyh nây.

¹⁸ Jêh nau nây, Y-Gidêôn ôp ma Y-Sêba jêh ri Y-Salmuna: “Moh nau geh phung bunuyh ri dĭng khân may nkhĭt ta Tabor?” Bar hê hađăch nĕ plơ̆ lah: “Khân păng tâm ban đŏng ma may, ăp nơm tâm ban ma kon bu klâu hađăch.”

¹⁹ Y-Gidêôn lah: “Khân păng jêng oh nâu gâp, phung kon bu klâu mê̆ gâp. Nanê̆, gâp sơm ton tanăp Brah Yêhôva gŭ rêh mro mrăng, tơlah khân may om oh nâu gâp gŭ rêh, nar aơ gâp mâu mra nkhĭt ôh khân may!”

²⁰ Jêh nây Y-Gidêôn lah ma Y-Jêther, kon bôk rah păng: “Dâk hom jêh ri nkhĭt khân păng!” Ƀiălah bu klâu ndăm nây klach, mâu nanh tŏk ôh đao păng yorlah păng klach yorlah păng hôm jêng ndăm.

²¹ Y-Sêba jêh ri Y-Salmuna lah: “May nơm nkhĭt hom hên, yorlah tĭng nâm bunuyh jêng, pônây đŏng nau ktang păng.” Y-Gidêôn dâk nkhĭt Y-Sêba jêh ri Y-Salmuna, jêh ri păng sŏk lĕ ndơ rvang ta trô ko seh samô bar hê hađăch.

Y-Gidêôn ndâk rup Êphôt

²² Nôk nây, phung ƀon lan Israel lah ma Y-Gidêôn: “Dăn may, phung kon bu klâu, jêh ri phung kon sau may chiă uănh hên, yorlah may tâm rklaih jêh hên bơh ti phung Madian.”

²³ Y-Gidêôn plơ̆ lah: “Gâp mâu mra chiă uănh ôh khân may, phung kon bu klâu gâp mâu đŏng chiă uănh khân may, ƀiălah Brah Yêhôva mra chiă uănh khân may.”

²⁴ Y-Gidêôn lah ma khân păng: “Ăn gâp dăn ma khân may du nau, jêng ăp nơm tâm khân may jao hom ma gâp lĕ rvang mblo tôr khân may pit in nây.” (Yorlah phung Ismaêl geh nau vay mblo rvang mah ta tôr.)

²⁵ Khân păng plơ̆ lah: “Hên maak nuih n'hâm jao ndơ nây ma may.” Khân păng lăk du mlâm ao, jêh nây lĕ rngôch bunuyh klŭp ta ao nây lĕ rvang mblo tôr tă bơh ndơ khân păng pit in jêh.

²⁶ Lĕ rvang mblo tôr mah Y-Gidêôn dăn jêh, njing geh bar jât kilô mah, mâu kơp lĕ ndơ rvang ta trô ko seh, rse mah rhên, jêh ri ao chăng phung hađăch Madian vay nsoh, nđâp ma lĕ rvang văn ta trô ko seh samô khân păng.

²⁷ Y-Gidêôn sŏk mah nây ƀư du rup êphôt jêh ri dơm tâm ƀon toyh păng nơm ta Ôphra. Lĕ rngôch phung Israel ƀư nau văng tĭr nôk khân păng nhhơr mbah êphôt nây; păng jêng du mlâm dăk sân ma Y-Gidêôn jêh ri lĕ rngôch vâl păng.

²⁸ Phung Madian gŭ chŭn tâm dâng nau chiă uănh phung ƀon lan Israel, mâu hôm n'gơr bôk hao ôh. Tâm nau rêh Y-Gidêôn, n'gor bri geh nau đăp mpăn tâm puăn jât năm.

²⁹ Y-Jêrubaal, kon bu klâu Y-Jôas, plơ̆ sĭt jêh ri gŭ tâm ngih păng nơm.

³⁰ Y-Gidêôn geh pơh jât kon bu klâu, yorlah păng geh âk ur.

³¹ Ur yông păng gŭ ta Sichem deh đŏng du huê kon bu klâu ăn ma păng, jêh ri păng ntơ amoh Y-Abimêlek.

Y-Gidêôn khĭt

³² Y-Gidêôn, kon bu klâu Y-Jôas, khĭt dôl năm păng lĕ âk, bu tâp păng tâm môch mbơ̆ păng jêng Y-Jôas, ta Ôphra, tâm ndŭl mpôl Abiêser.

³³ Jêh Y-Gidêôn khĭt, phung ƀon lan Israel plơ̆ tay ƀư tih văng tĭr ma phung brah Baal jêh ri yơk mbah ma Baal-Bêrit jêng brah khân păng.

³⁴ Tâm ban pônây phung ƀon lan Israel mâu hôm kah gĭt ôh ma Yêhôva Brah Ndu khân păng, jêng Nơm tâm rklaih jêh khân păng bơh lĕ rngôch phung rlăng khân păng gŭ văr jŭm păng.

³⁵ Khân păng mâu đŏng mpơl nau sĭt lah ueh ma ngih Y-Jêrubaal, jêng Y-Gidêôn, ma lĕ rngôch nau kan ueh păng hŏ ƀư jêh ma phung Israel.