Phung Kôranh Phat Dôih 7 - Nau Brah Ndu Ngơi 2023

Y-Gidêôn dơi lơh phung tahan Madian

¹ Y-Jêrubaal, jêng Y-Gidêôn, jêh ri lĕ rngôch phung tahan păng kah rngăl ơm ôi, hăn ndâk ngih bok êp dak n'hor Harôt. Bi phung tahan Madian ndâk ngih bok ta mpeh dor rmlak tahan Y-Gidêôn, tâm rlŭng êp dor Môrê.

² Brah Yêhôva lah ma Y-Gidêôn: “Rnoh bunuyh hăn tĭng may âk ir, gâp mâu jao phung Madian tâm ti khân păng ôh, klach lah phung Israel mra tâm rnê ma khân păng nơm, jêh ri lah: ‘Ti gâp nơm hŏ tâm rklaih gâp.’

³ Pônây aƀaơ, mbơh hom ma phung ƀon lan gĭt: ‘Mbu moh klach jêh ri râm sâr, ăn păng du tă bơh yôk Gilêat ro jêh ri plơ̆ sĭt ma ngih!’” Pôri geh bar rmưn bar rbăn nuyh plơ̆ sĭt, hôm e du rmưn nuyh gŭ ta aơ.

⁴ Brah Yêhôva lah ma Y-Gidêôn: “Rnoh bunuyh ăt hôm e âk ir. Njŭn leo hom khân păng hăn trŭnh ta n'hor dak, jêh nây Gâp mra rlong uănh khân păng ta nây. Tơlah mbu nơm Gâp lah ma may pô aơ: ‘Ăn păng hăn ndrel may,’ pôri păng mra hăn ndrel may. Bi mbu moh Gâp lah ma may pô aơ: ‘Păng lơi hăn ndrel may,’ pôri păng mra mâu dơi hăn ôh.”

⁵ Pôri, păng leo phung tahan hăn trŭnh ta n'hor dak. Brah Yêhôva lah ma Y-Gidêôn: “Lĕ rngôch phung ƀlăk dak ma mpiăt păng nâm bu so ƀlăk, jêh ri phung chon kômâk kŭnh nhêt dak, pôri păng ăn gŭ êng.”

⁶ Rnoh bunuyh chuah dak tâm ti jêh nây sŏk trôm mbung huch geh pe rhiăng nuyh; ƀiălah lĕ phung ƀon lan êng chon kômâk kŭnh gay nhêt dak.

⁷ Nôk nây, Brah Yêhôva lah ma Y-Gidêôn: “Gâp mra dŏng pe rhiăng nuyh hŏ huch dak nây gay rklaih khân may, jêh ri Gâp mra jao phung Madian tâm ti may. Bi lĕ rngôch phung êng, plơ̆ sĭt hom ma ngih păng nơm!”

⁸ Y-Gidêôn ăn lĕ rngôch phung Israel plơ̆ sĭt, ƀiălah păng mât mray pe rhiăng phung nây. Khân păng sŏk ndơ sông sa jêh ri nŭng tâm ti tă bơh phung plơ̆ sĭt jêh. Phung tahan Madian ndâk ngih bok tâm rlŭng, gŭ pa dâng ngih bok Gidêôn.

⁹ Tâm măng nây, Brah Yêhôva lah ma Y-Gidêôn: “Dâk hom, hăn trŭnh rduh lơh rmlak tahan Madian, yorlah Gâp jao jêh khân păng tâm ti may.

¹⁰ Ƀiălah tơlah may klach mâu nănh rduh lơh, ăn may hăn trŭnh ta pôih tahan ndrel ma oh mon may jêng Y-Pura.

¹¹ May mra iăt lĕ nau khân păng lah, jêh nau nây may mra dăng janh gay rduh lơh khân păng.” Pônây, Y-Gidêôn hăn trŭnh ndrel ma oh mon păng jêng Y-Pura, hăn văch dăch ma ntŭk gak ta bôl rmlak tahan.

¹² Phung Madian, phung Amalek, jêh ri lĕ rngôch phung ƀon lan tâm ntŭk Luh Nar ndâk ngih bok bêng tâm rlŭng, âk nâm bu krah ndrach; bi seh samô khân păng âk kŏ tât mâu dơi kơp ôh, nâm bu choih ta kơh dak mƀŭt.

¹³ Dôl Y-Gidêôn tât, geh du huê nkoch tay du nau mbơi ma băl păng, pô aơ: “Aơ, gâp geh du nau mbơi, saơ du mpơng piăng let ma rnih ba ôrgơ rlă tâm rmlak tahan Madian. Păng rlă tât tom rmlak tahan, ƀư ma rmlak tahan chôt, plĕch tâm dâng klơ jêh ri rlâm.”

¹⁴ Băl păng plơ̆ lah: “Nau aơ jêng đao Y-Gidêôn, kon bu klâu Y-Jôas, du huê Israel. Brah Ndu jao jêh phung Madian jêh ri lĕ rmlak tahan tâm ti păng.”

¹⁵ Tơlah Y-Gidêôn tăng bu nkoch tay nau mbơi nây jêh ri nau rblang ma nau mbơi nây, păng chon mon yơk mbah ma Brah Ndu. Păng plơ̆ sĭt ma rmlak tahan phung Israel jêh ri lah: “Dâk hom, yorlah Brah Yêhôva jao jêh phung tahan Madian tâm ti khân may!”

¹⁶ Păng tâm pă pe rhiăng nuyh nây jêng pe phung, păng ăn nŭng, jêh ri yăng nsoih ndrel ma ŭnh chai tâm yăng ma ăp nơm.

¹⁷ Păng lah ma khân păng: “Uănh hom jêh ri ƀư tĭng nâm bu gâp ƀư. Tơlah gâp hăn tât ta bôk rmlak tahan, ăn khân may ƀư tĭng nâm gâp ƀư.

¹⁸ Tơlah gâp jêh ri lĕ phung ndrel ma gâp uh nŭng, pôri khân may ăt uh nŭng hom gŭ jŭm rmlak tahan, jêh ri troh pô aơ: ‘Yorlah Brah Yêhôva jêh ri yor Y-Gidêôn!’”

¹⁹ Y-Gidêôn jêh ri du rhiăng tahan hăn ndrel ma păng tât ta bôk rmlak tahan dôl klong măng, nôk tâm rgâl phung gak. Khân păng uh nŭng, jêh nây mbang nchah yăng khân păng djôt tâm ti.

²⁰ Nôk nây, pe phung tahan uh nŭng, jêh ri mbang nchah yăng. Ti chiau djôt ŭnh chai, ti ma djôt nŭng gay uh, khân păng troh: “Tŏk hom đao yor Brah Yêhôva jêh ri yor Y-Gidêôn!”

²¹ Ăp nơm gŭ tâm ntŭk păng nơm, jŭm rmlak tahan phung rlăng. Lĕ rngôch phung tahan Madian nchuăt, nter jêh ri du.

²² Tâm nôk pe rhiăng phung uh nŭng, Brah Yêhôva ƀư ăn phung rlăng tâm lam rmlak tahan ăn đao ăp nơm tâm ntâp nkhĭt ndrăng băl păng nơm, jêh nây nchuăt du tât ta ƀon Bet-Sita, mpeh n'gor Sêrêra, kŏ tât ta n'har Abel-Mêhôla dăch Tabat.

²³ Phung tahan Israel bơh phung Naptali, phung Aser, jêh ri lĕ phung Manasê, bu rgum hăn tĭng phung Madian.

²⁴ Nôk nây, Y-Gidêôn prơh phung mbơh hăn lam n'gor klơ dor yôk Êphraim, ntrŭnh nau ntăm: “Hăn trŭnh hom tâm lơh ma phung tahan Madian, pit sŏk dak krong Yurdan jêh ri lĕ dak n'hor kŏ tât ta Bet-Bara.” Yor nây phung tahan Êphraim rgum pit sŏk dak krong Yurdan jêh ri lĕ dak n'hor kŏ tât ta Bet-Bara

²⁵ Khân păng ăt nhŭp bar hê kôranh chiă uănh phung Madian jêng Y-Ôrep jêh ri Y-Sêep. Khân păng nkhĭt Y-Ôrep ta klêr lŭ Ôrep, jêh ri khân păng khĭt Y-Sêep ta ntŭk păt ndrănh Sêep. Khân păng hăn tĭng đŏng phung Madian, djôt leo bôk Y-Ôrep jêh ri Y-Sêep tât ma Y-Gidêôn ta mpeh kơh tê̆ dak krong Yurdan.