Phung Kôranh Phat Dôih 6 - Nau Brah Ndu Ngơi 2023

Y-Gidêôn rklaih phung ƀon lan Israel

¹ Phung ƀon lan Israel ƀư nau mhĭk tanăp măt Brah Yêhôva rĭ dĭng Brah Yêhôva jao khân păng tâm ti phung Madian tâm pơh năm.

² Ti phung Madian tŭn jot phung Israel. Yor klach ma phung Madian rĭ dĭng phung ƀon lan Israel hŏ ƀư ntŭk du krap tâm trôm yôk, trôm ntu, jêh ri ƀư pôih.

³ Ăp tơ̆ phung Israel srih ntil, phung Madian, phung Amalek, jêh ri phung mpeh Luh Nar hăn hao rduh lơh phung Israel.

⁴ Khân păng ƀư ntŭk rmlak tâm rdâng đah phung ƀon lan Israel jêh ri ƀư rai mir ba tâm n'gor kŏ tât Gaxa, mâu hôm ôh om du ntil ndơ sông sa ma phung Israel, biăp, ndrôk mâu lah seh bri.

⁵ Khân păng văch hao djôt leo lĕ mpô mpa rong jêh ri ndâk ngih bok dŭt âk nâm krah ndrach, mâu dơi kơp ôh bunuyh nđâp ma seh samô. Khân păng pit in jêh ri ƀư rai ntŭk gŭ.

⁶ Yor ma phung Madian, dĭng phung Israel o ach, rêh ni. Yor ri khân păng nhĭm vơl ma Brah Yêhôva.

⁷ Lah phung ƀon lan Israel nhĭm vơl ma Brah Yêhôva yor ma phung Madian,

⁸ ri mơ Brah Yêhôva prơh du huê nơm mbơh lor hăn tât gay lah ma phung ƀon lan Israel pô aơ: “Yêhôva Brah Ndu ma phung Israel lah: ‘Gâp hŏ leo khân may du luh bơh n'gor Êjipt, ngluh jêh khân may luh bơh ngih dĭk bu.

⁹ Gâp rklaih jêh khân may bơh ti phung Êjipt, jêh ri lĕ rngôch phung tŭn jot khân may. Gâp mprơh jêh khân păng luh bơh khân may jêh ri ăn ma khân may n'gor khân păng.’

¹⁰ Gâp lah ma khân may: ‘Gâp jêng Yêhôva Brah Ndu ma khân may, lơi ta klach yơk ôh ma brah phung Amôrit tâm n'gor khân păng ntŭk khân may dôl gŭ.’ Ƀiălah khân may mâu ŭch iăt ôh bâr Gâp!”

¹¹ Dôl nôk nây tông mpăr Brah Yêhôva tât gŭ tâm dâng tơm n'ho ta ƀon Ôphra, tơm si nây jêng ndơ Y-Jôas, phung Abiêser. Dôl nây kon bu klâu Y-Jôas jêng Y-Gidêôn gŭ mprah ba ôrgơ ta ntŭk bu păt ndrănh gay der ma phung Madian.

¹² Tông mpăr Brah Yêhôva tâm mpơl ma Y-Gidêôn jêh ri lah: “Hơi nơm janh ktang! Brah Yêhôva gŭ ndrel ma may.”

¹³ Y-Gidêôn lah: “Hơi kôranh, tơlah Brah Yêhôva gŭ ndrel ma hên, mâm ƀư lĕ rngôch nau aơ dơi tât ma hên? Phung chô yau hên nkoch tay ma hên pô aơ: ‘Brah Yêhôva hŏ njŭn jêh hên du luh bơh Êjipt’. Aƀaơ lĕ rngôch nau khlay ngăn ri mbah ntŭk gŭ? Ƀiălah Brah Yêhôva chalơi hên jêh ri jao hên tâm ti phung Madian.”

¹⁴ Brah Yêhôva n'gĭl jêh ri lah ma păng: “Dŏng hom nau ktang may geh jêh gay rklaih phung Israel bơh ti phung Madian. Mâu di hĕ Gâp prơh may hăn?”

¹⁵ Y-Gidêôn ơh: “Hơi Kôranh Brah, mâm gâp dơi tâm rklaih phung Israel nây? Aơ, ndŭl mpôl gâp o ach lơn tâm phung Manasê, jêh ri gâp jêng nơm jê̆ lơn tâm ngih gâp.”

¹⁶ Brah Yêhôva lah: “Gâp mra gŭ ndrel ma may, jêh ri may mra dơi lơh phung Madian nâm bu lơh du huê bunuyh.”

¹⁷ Y-Gidêôn ơh: “Tơlah gâp geh nau yô̆ tanăp măt Kôranh Brah, dăn ăn ma gâp du nau tâm mbên gay tâm mpơl nau Kôranh Brah hŏ ngơi jêh ma gâp.

¹⁸ Dăn ma May lơi ta du ôh tă bơh ntŭk aơ kŏ tât gâp plơ̆ tay jêh ri djôt leo du ndơ ƀư brah tanăp măt May.” Păng lah: “Gâp mra gŭ ta aơ kŏ tât nôk may plơ̆ tay.”

¹⁹ Y-Gidêôn hăn nhŭp du mlâm be kon ƀư puăch jêh ri sŏk klăp lah bar jât ma bar lit rnih ƀư piăng let mâu geh ndrui. Păng dơm puăch nây tâm du bĭ jêh ri nkhŭt dak puăch tâm du glah, jêh nây djôt leo nhhơr lĕ ndơ nây ma Păng gŭ tâm dâng tơm n'ho.

²⁰ Tông mpăr Brah Ndu lah pô aơ: “Sŏk puăch jêh ri piăng let mâu geh ndrui dơm ta klơ lŭ aơ jêh ri nkhŭt dak puăch ta klơ ndơ nây.” Y-Gidêôn ƀư di pônây.

²¹ Nôk nây, tông mpăr Brah Yêhôva djôt mâng jra ta ti, nđĭl chiông mâng ta puăch jêh ri ta piăng let mâu geh ndrui. Geh ŭnh hit tă bơh lŭ su puăch jêh ri piăng let mâu geh ndrui. Jêh nây tông mpăr Brah Yêhôva du roh tanăp măt păng.

²² Y-Gidêôn gĭt năl nây jêng tông mpăr Brah Yêhôva, păng nter: “Hơi Yêhôva Brah Ndu! Vơ rêh ni ngăn, yorlah gâp hŏ saơ tra năp măt tông mpăr Brah Yêhôva!”

²³ Ƀiălah Brah Yêhôva lah ma păng: “Gŭ đăp hom, lơi klach ôh, may mâu mra khĭt ôh!”

²⁴ Y-Gidêôn ndâk ta nây du nơng ƀư brah ma Brah Yêhôva jêh ri ntơ amoh jêng Brah Yêhôva Salôm. Nơng ƀư brah nây hôm e ta Ôphra, jêng ndơ phung Abiêser, kŏ tât ta nar aơ.

²⁵ Tâm măng nây đŏng, Brah Yêhôva lah ma Y-Gidêôn: “Sŏk hom ndrôk nkuăng rah mbơ̆ may, nây jêng ndrôk nkuăng rơh bar geh jêh pơh năm, jêh nây ƀư rlâm lơi nơng brah Baal jêng ndơ mbơ̆ may hŏ rdâk jêh jêh ri kăl lơi rup brah Asêrah êp meng nơng.

²⁶ Jêh nây, ndâk hom du nơng ƀư brah ma Yêhôva Brah Ndu may ta klơ n'gơn yôk aơ. Jêh nau nây, sŏk tơm si bơh rup brah Asêrah jêng ndơ may hŏ kăl lơi gay nhhơr ndrôk nkuăng rơh bar nây ƀư ndơ ƀư brah gŭch.”

²⁷ Y-Gidêôn săch jât nuyh tâm phung oh mon păng jêh ri ƀư tĭng nau Brah Yêhôva hŏ lah ma păng. Yorlah păng klach ma phung bunuyh tâm ngih păng jêh ri ma phung bunuyh tâm ƀon nây rĭ dĭng păng mâu nănh ƀư dôl nôk nar ƀiălah ƀư dôl măng.

²⁸ Ơm ôi taơ, nôk phung ƀon lan tâm ƀon nây kah rngăl, khân păng saơ nơng brah Baal rlâm chah jêh, êp meng rup brah Asêrah bu kăl lơi jêh, jêh ri ndrôk nkuăng rơh bar hŏ nhhơr jêng ndơ ƀư brah gŭch ta klơ nơng ƀư brah bu mhe ndâk nây.

²⁹ Khân păng ôp ndrăng khân păng: “Mbu nơm ƀư nau aơ?” Jêh khân păng ôp sek jêh ri joi gĭt, khân păng gĭt pô aơ Y-Gidêôn, kon bu klâu Y-Jôas ro ƀư nau aơ.

³⁰ Phung ƀon lan lah ma Y-Jôas: “Njŭn hom kon may văch ta aơ, ăn păng khĭt, yorlah păng ƀư rlâm jêh nơng brah Baal, jêh ri kăl lơi rup brah Asêrah êp meng nây.”

³¹ Y-Jôas plơ̆ lah ma lĕ rngôch phung tâm rdâng đah păng pô aơ: “Khân may ŭch koh dŏng ma brah Baal lĕ? Mâu lah khân may ŭch king n'gang păng? Mbu moh koh dŏng ma brah Baal bu mra nkhĭt ntơm bơh ôi taơ. Tơlah păng jêng brah ngăn, ăn păng king n'gang êng păng nơm, yorlah bu lĕ ƀư rlâm jêh nơng ƀư brah păng!”

³² Yor ri, tâm nar nây bu ntơ amoh Y-Gidêôn jêng Y-Jêrubaal, nâm bu ntĭt: “Ăn brah Baal tâm rlăch đah păng” yorlah Y-Gidêôn ƀư rlâm lơi jêh nơng ƀư brah păng.

³³ Lĕ rngôch phung Madian, phung Amalek, jêh ri phung mpeh Luh Nar tâm rnglăp ndrel, rgăn dak krong Yurdan jêh ri ƀư ntŭk rmlak tâm rlŭng Jesrêel.

³⁴ Huêng Brah Yêhôva nkŭm Y-Gidêôn; păng uh nŭng, kuăl lĕ phung Abiêser hăn tĭng ndô̆ păng.

³⁵ Păng prơh phung mbơh hăn lam tâm phung Manasê jêh ri kuăl rgum băl gay tĭng ndô̆ păng. Păng prơh đŏng phung mbơh hăn tât ma lĕ ndŭl mpôl Aser, Sabulôn, Naptali, jêh ri khân păng hăn hao tâm rnglăp ndrel ma păng.

³⁶ Y-Gidêôn ngơi đah Brah Ndu: “Tơlah Kôranh Brah ŭch dŏng ti gâp gay rklaih phung Israel, di nâm nau Kôranh Brah hŏ lah jêh,

³⁷ gâp mra dơm du mpư rsau biăp ta ntŭk bu mprah ba. Tơlah dak ngom knŏng geh ta klơ rsau biăp nây, bi ta neh ăt jêng sơh, pôri gâp mra gĭt năl ma Kôranh Brah mra sŏk ti gâp tâm rklaih phung Israel tĭng nâm Kôranh Brah lah jêh.”

³⁸ Nau tât geh di nâm pônây. Ôi taơ, Y-Gidêôn dâk ơm, păt rsau biăp, pôri dak ngom hoch luh bơh rsau biăp bêng du ngan dak.

³⁹ Y-Gidêôn lah tay ma Brah Ndu pô aơ: “Dăn Kôranh Brah lơi hao ji nuih ma gâp ôh, ăn gâp knŏng ngơi du tơ̆ đŏng. Dăn Kôranh Brah ăn gâp rlong uănh du tơ̆ đŏng ma du mpư rsau biăp: Dăn May ăn knŏng du mpư rsau biăp jêng sơh, bi ma dak ngom geh lam ta klơ neh.”

⁴⁰ Tâm măng nây, Brah Ndu ƀư di pônây: Knŏng du mpư rsau biăp dơm jêng sơh, bi ma lam neh geh dak ngom nkŭm.