Phung Kôranh Phat Dôih 5 - Nau Brah Ndu Ngơi 2023

Nau mprơ H'Dêbôra

¹ Tâm nar nây, H'Dêbôra mprơ nau mprơ nây ndrel ma Y-Barak, kon bu klâu Y-Abinôam:

² “Tâm rnê hom ma Brah Yêhôva! Nôk phung kôranh chiă uănh Israel leo phung tahan hăn tâm lơh Ri mơ phung ƀon lan ŭch sân săk khân păng nơm!

³ Hơi phung hađăch, iăt hom! Hơi phung kôranh chiă uănh, rkêng tôr iăt hom! Gâp mra mprơ ma Brah Yêhôva, Gâp mra tâm rnê Brah Yêhôva, Brah Ndu phung Israel.

⁴ Hơi Brah Yêhôva! Dôl May hăn luh bơh Sêir, Dôl May hăn găn neh lâng Êđôm, Ri mơ neh ntu n'găr mpât, Jêh ri trôk nkhŭt dak mih, Ndâr tŭk ăn tŭp dak mih.

⁵ Lĕ yôk lêk tanăp măt Brah Yêhôva, Nơm gŭ ta klơ yôk Sinai, Tanăp măt Yêhôva Brah Ndu Israel.

⁶ Tâm nar Y-Samgar, kon bu klâu Y-Anat, Tâm rnôk H'Jael, bu chalơi lĕ trong toyh, Bu năch hăn jâng ƀoi lĕ rlong kue.

⁷ Lĕ ƀon jê̆ phung Israel jêng rngot njăp Kŏ tât gâp jêng H'Dêbôra, dâk, Nâm bu du huê me tâm n'gor Israel.

⁸ Nôk bu hŏ săch jêh phung brah mhe, Ri mơ nau tâm lơh tât ta mpông ƀon. Tâm puăn jât rbăn nuyh tâm phung Israel Mbu moh saơ khêl mâu lah đao?

⁹ Nuih n'hâm gâp rŏng ma phung kôranh chiă uănh Israel, Nđâp ma lĕ nơm tâm phung ƀon lan ŭch sân săk khân păng nơm. Tâm rnê ngăn ma Brah Yêhôva!

¹⁰ Hơi phung ncho seh bri nglang, Gŭ ta klơ ưn nkŭm ma bok ueh, Jêh ri phung hăn jâng ta trong toyh, mprơ hom răm maak!

¹¹ Bâr phung tâm pă dak nhêt ta meng ntu dak, Tâm rnê nau dơi Brah Yêhôva, Jêh ri nau dơi tâm lơh phung ƀon lan Israel! Nôk nây, phung ƀon lan Brah Yêhôva hăn trŭnh ta mpông ƀon.

¹² Hơi H'Dêbôra! Kah rngăl hom, kah rngăl hom! Kah rngăl hom, kah rngăl hom, mprơ du nau mprơ! Hơi Y-Barak, dâk hom! Hơi kon bu klâu Y-Abinôam! Njŭn leo hom phung bu nă may!

¹³ Nôk nây, phung hôm e hăn trŭnh ma phung kôranh chiă uănh; Phung ƀon lan Brah Yêhôva văch ma gâp nâm phung tahan janh ktang.

¹⁴ Tă bơh Êphraim geh bunuyh tơm Amalek; Tĭng pakơi may, geh Benjamin jêng phung mpôl băl ma may. Phung kôranh chiă hăn trŭnh tă bơh Makir, Jêh ri phung djôt leo mâng chiă uănh hăn văch tă bơh Sabulôn.

¹⁵ Phung kôranh chiă uănh Isakar hăn tĭng ndrel ma H'Dêbôra, Isakar gŭ n'hêl nanê̆ đah Y-Barak. Khân păng rduh lăp tâm rlŭng. Ƀiălah phung kon sau Ruben, Hôm geh nau vĭ vĕ tâm nuih n'hâm!

¹⁶ Mâm ƀư may gŭ kâp ta meng ndrung biăp, Gay ŭch tăng bâr n'hôm bu kuăl biăp? Tâm phung kon sau Ruben, Geh nơm hôm vĭ vĕ tâm nuih n'hâm!

¹⁷ Gilêat gŭ mpeh kơh tê̆ dak krong Yurdan, Bi Dan, mâm ƀư gŭ tâm kumpăn? Aser gŭ ta kơh dak mƀŭt, Gŭ rlu tâm ntŭk njưh kumpăn păng nơm.

¹⁸ Sabulôn jêng phung janh sân săk nau rêh; Naptali ăt sân săk jăn ta ntŭk mbon, tâm mir.

¹⁹ Phung hađăch văch tât, khân păng hăn luh tâm lơh; Phung hađăch Kanaan tâm lơh Ta ƀon Tanak, dăch n'hong dak Mêgidô; Ƀiălah khân păng mâu sŏk pit ôh prăk hên!

²⁰ Lĕ ndâr trôk văch đŏng nau tâm lơh, Phung mănh mbing tĭng trong khân păng dâk tâm lơh đah Y-Sisêra.

²¹ Dak n'hor Kisôn bŭk rdu phung rlăng, Jêng dak n'hor Kisôn nar kăl e. Hơi huêng gâp! hăn hom ma nau ktang!

²² Nôk nây, lĕ rngôch nchop seh n'gôr nteh ktang, Lĕ seh khân păng nchuăt ngăch ngăn.

²³ Phung mbơh Brah Yêhôva lah: ‘Rak rtăp hom ƀon Mêros; Rak rtăp hom ma phung ƀon lan păng! Yorlah khân păng mâu văch kơl ôh Brah Yêhôva, Mâu kơl Brah Yêhôva tâm lơh đah phung ktang nây!’

²⁴ Mbơh sơm ma H'Jael, ur Y-Hêber, phung Kênit, Geh nau ueh uĭn lơn tâm phung bu ur! Mbơh sơm ma păng geh nau ueh uĭn lơn tâm phung bu ur gŭ tâm ngih bok!

²⁵ Y-Sisêra dăn dak ƀiălah păng ăn dak toh ndrôk, Bu ur nây sŏk ngan chrêk geh dak toh ndrôk ăn ma păng.

²⁶ Du đah ti bu ur nây djôt du mlâm n'gâng ngih bok, Bi ti ma djôt me nôp nơm chiăr. Bu ur nây dong jêh Y-Sisêra, Dong nchah bôk păng, Ƀư nchah bôk jêh ri ntâp bluh rho ndăr kleng păng.

²⁷ Păng prah, cha lôt, Mplâng ta jâng bu ur nây. Ta jâng bu ur nây păng huăr, păng prah sơmok. Ta ntŭk păng huăr nây, păng khĭt.

²⁸ Mê̆ Y-Sisêra n'gơr saơ tă bơh mpông bloh, Tă bơh pakơi bok mpông bloh, păng nter: ‘Mâm dĭng ndeh seh kon gâp băt tât? Mâm ƀư ê tăng ôh nteh nchop seh păng?’

²⁹ Phung bu ur kơl kan blau mĭn lơn plơ̆ lah, Jêh ri mê̆ păng tâm ban đŏng lah mĭn êng tâm nuih n'hâm:

³⁰ ‘Mâu di hĕ khân păng joi saơ jêh ri tâm pă ndơ pit sŏk? Du huê mâu lah bar hê bu ur druh ăn ăp nơm tahan, Ndơ pit sŏk ma bok nhom prăp ma Y-Sisêra. Ndơ pit sŏk ma bok nhom bu jĭm jêh, du pŏk bok nhom, Bar pŏk bok jĭm, ta trô ko bu nă.’

³¹ Ơ Brah Yêhôva, mbơh sơm ma lĕ rngôch phung rlăng May rai lôch tâm ban pônây. Bi phung rŏng yơk ma May tâm ban ma luh nar chrat ral!” Jêh nau nây, n'gor geh nau đăp mpăn tâm puăn jât năm.