Phung Kôranh Phat Dôih 4 - Nau Brah Ndu Ngơi 2023

H'Dêbôra jêh ri Y-Barak

¹ Jêh Y-Êhut khĭt, phung Israel ƀư đŏng nau mhĭk tanăp măt Brah Yêhôva,

² Yor ri, Brah Yêhôva tăch khân păng ma Y-Jabin, jêng hađăch Kanaan, nơm chiă uănh ta Hasôr. Kôranh chiă uănh toyh tahan Y-Jabin jêng Y-Sisêra gŭ ta Harôset phung bu năch.

³ Yorlah Y-Jabin geh jêh sĭn rhiăng ndeh seh ma loih jêh ri păng tŭn jot phung Israel ma nau djơh tâm bar jât năm, pônây, phung ƀon lan Israel nter dăn ma Brah Yêhôva.

⁴ Tâm nôk nây, bu ur mbơh lor H'Dêbôra, ur Y-Lapidôt, jêng kôranh phat dôih ma phung ƀon lan Israel.

⁵ Păng gŭ tâm dâng tơm đung Dêbôra, tâm n'gor klơ dor yôk Êphraim, ta vah vang Rama jêh ri Bêthel, jêh ri phung ƀon lan Israel văch tât ma păng gay ŭch iăt nau păng phat dôih.

⁶ Păng prơh bu kuăl Y-Barak, kon bu klâu Y-Abinôam, bơh Kêdês, tâm n'gor Naptali tât jêh ri lah ma păng pô aơ: “Yêhôva Brah Ndu phung Israel hŏ ntĭnh ma may: ‘Hăn hom, djôt leo jât rbăn bunuyh bơh phung kon sau Naptali jêh ri phung Sabulôn jêh ri dăp tâm lơh ta klơ yôk Tabor.

⁷ Gâp mra ƀư ăn Y-Sisêra, kôranh chiă uănh toyh tahan hađăch Jabin, djôt leo ndeh seh jêh ri phung tahan văch tâm lơh đah may ta dak n'hor Kisôn, jêh ri Gâp mra jao păng tâm ti may.’”

⁸ Y-Barak lah: “Tơlah ay hăn ndrel ma gâp, gâp mra hăn, ƀiălah tơlah ay mâu hăn ôh ndrel gâp, gâp mâu mra hăn.”

⁹ Bu ur nây lah: “N'hêl nanê̆ gâp mra hăn ndrel ma may; ƀiălah nau chrêk rmah nau tâm lơh nây mâu mra prăp ma păng ôh, yorlah Brah Yêhôva mra jao Y-Sisêra tâm ti du huê bu ur.” Pôri, H'Dêbôra dâk hăn ndrel ma Y-Barak ta Kêdês.

¹⁰ Y-Barak tâm rƀŭn phung Sabulôn jêh ri phung Naptali văch ta Kêdês; geh jât rbăn bunuyh hăn tĭng păng jêh ri H'Dêbôra ăt hăn ndrel ma păng.

¹¹ Dôl nây Y-Hêber, bunuyh Kênit tâm nkhah jêh păng nơm bơh phung ƀon lan Kênit, jêng phung kon sau Y-Hôbap, nâu ur Y-Môis, jêh ri păng ndâk ngih bok păng mpeh tơm si guyh Sananim, dăch đah Kêdês.

¹² Geh nơm mbơh ma Y-Sisêra gĭt pô aơ Y-Barak, kon bu klâu Y-Abinôam, hăn hao jêh êp yôk Tabor.

¹³ Y-Sisêra rƀŭn rgum lĕ ndeh seh geh sĭn rhiăng ndeh seh ma loih, jêh ri lĕ rngôch phung tahan păng, bơh Harôset phung bu năch kŏ tât ta dak n'hor Kisôn.

¹⁴ H'Dêbôra lah ma Y-Barak: “Dâk hom! Yorlah aơ jêng nar Brah Yêhôva jao jêh Y-Sisêra tâm ti may. Mâu di hĕ Brah Yêhôva hăn panăp may?” Pônây Y-Barak hăn trŭnh tă bơh yôk Tabor ndrel ma jât rbăn bunuyh tĭng ndô̆ păng.

¹⁵ Brah Yêhôva ƀư ma Y-Sisêra jêh ri lĕ rngôch ndeh seh loih nđâp ma lĕ phung tahan păng du nchuăt rŭng răng panăp măt đao Y-Barak. Y-Sisêra jŭr tă bơh ndeh seh jêh ri nchuăt du.

¹⁶ Y-Barak hăn tĭng ndeh seh jêh ri phung tahan rlăng kŏ tât ta Harôset phung bu năch. Lĕ rngôch phung tahan Y-Sisêra khĭt ma đao, mâu hôm klen du huê dơi rêh.

¹⁷ Y-Sisêra nchuăt du tât ta ngih bok H'Jael, ur Y-Hêber, bunuyh Kênit, yorlah Y-Jabin, hađăch ƀon Hasôr jêh ri ngih Y-Hêber, bunuyh Kênit, geh nau đăp mpăn ndrel.

¹⁸ H'Jael hăn luh tâm mâp đah Y-Sisêra jêh ri lah: “Hơi kôranh, veh hom ta ngih gâp, lơi klach ôh!” Pôri, păng veh lăp tâm ngih bok bu ur nây, jêh ri bu ur nây sŏk phôi ntâk ma păng.

¹⁹ Păng lah ma bu ur nây: “Dăn ay ăn gâp dak nhêt yorlah gâp ji hir.” Păng pơk nông ntâu dơm dak toh ndrôk ăn ma Y-Sisêra nhêt, jêh nây nkŭm păng tay ma phôi.

²⁰ Păng lah tay ma bu ur nây: “Gŭ hom ta mpông ngih bok, tơlah mbu văch tât ôp pô aơ: ‘Geh bunuyh lăp ta aơ lĕ?’ ay plơ̆ lah: ‘Mâu geh ôh.’”

²¹ Dôl nây Y-Sisêra lêt bê̆ch yorlah rgănh ngăn. H'Jael, ur Y-Hêber, sŏk du mlâm mâng n'gâng ngih, ti păng djôt me nôp, hăn djoch tât êp păng jêh ri pâng mâng n'gâng nây rho ndăr kleng păng, tât ta neh jêh ri păng khĭt.

²² Nôk Y-Barak dôl tĭng lơh Y-Sisêra, H'Jael luh chuă vơt păng jêh ri lah: “Jă may lăp ta aơ, gâp mra ntĭm ma may saơ bunuyh may dôl tĭng joi.” Y-Barak hăn lăp tâm ngih H'Jael, saơ Y-Sisêra khĭt jêh tâm ntŭk bê̆ch, geh mâng n'gâng ntâp bluh rho ndăr kleng păng.

²³ Tâm nar nây, Brah Ndu ƀư ăn Y-Jabin, hađăch Kanaan, chŭn panăp phung ƀon lan Israel.

²⁴ Ti phung ƀon lan Israel ƀư jêr mro ma Y-Jabin, hađăch n'gor Kanaan, kŏ tât nôk khân păng ƀư rai lơi hađăch nĕ.