Phung Kôranh Phat Dôih 21 - Nau Brah Ndu Ngơi 2023

Ndâk tay ndŭl mpôl Benjamin

¹ Ta Mispa, phung ƀon lan Israel geh nau ton pô aơ: “Mâu geh ôh du huê tâm phung he mra ăn kon bu ur he ma phung Benjamin.”

² Phung ƀon lan văch ma Bêthel, gŭ ta nây tanăp Brah Ndu kŏ tât măng jêh ri khân păng nter huy jêh ri nhĭm hâu ngăn ngên.

³ Khân păng lung nter: “Hơi Yêhôva Brah Ndu Israel, nar aơ pưt du ndŭl mpôl tâm phung Israel. Mâm ƀư nau mhĭk aơ tât ma hên?”

⁴ Nar ôi taơ, phung ƀon lan kah rngăl ơm, rdâk du mlâm nơng ƀư brah, jêh nây nhhơr ndơ ƀư brah gŭch jêh ri ndơ ƀư brah ma nau đăp mpăn.

⁵ Phung ƀon lan Israel ôp: “Mbu tâm lĕ rngôch băl mpôl Israel mâu hăn ôh ma nau tâm rƀŭn tanăp Brah Yêhôva?” Yorlah khân păng ƀư jêh nau ton pô aơ: “Mbu moh mâu tâm mpơl măt ôh tanăp Brah Yêhôva ta Mispa bu mra nkhĭt păng!”

⁶ Phung ƀon lan Israel geh nau rêh ni ma nau hŏ tât ma ndŭl mpôl Benjamin, oh nâu khân păng, jêh ri lah: “Nar aơ, phung Israel roh jêh du ndŭl mpôl.

⁷ Mâm he mra ƀư gay joi ur ma phung bu klâu khân păng hôm e rêh, yorlah he sŏk jêh amoh Brah Yêhôva gay ton mâu mra ăn ôh kon bu ur he jêng ur khân păng?”

⁸ Pônây, khân păng lah: “Mbu nơm tâm phung ndŭl mpôl Israel mâu tâm mpơl măt ôh tanăp Brah Yêhôva ta Mispa?” Khân păng saơ mâu geh du huê bơh Jabes ta Gilêat văch tât ma ntŭk gay tâm rƀŭn.

⁹ Yorlah tơlah bu kơp phung tahan, mâu saơ ôh du huê bunuyh gŭ ta Jabes n'gor Gilêat.

¹⁰ Pônây, phung tâm rƀŭn đă du rmưn bar rbăn bu klâu dăng janh lơn hăn tât ta Jabes jêh ri ntăm: “Hăn hom, dŏng đao nkhĭt phung ƀon lan gŭ tâm Jabes n'gor Gilêat, nđâp bu ur jêh ri nđâp phung kon se.”

¹¹ Aơ jêng nau khân may mra ƀư: “Nkhĭt hom lĕ rngôch bu klâu jêh ri phung bu ur hŏ geh sai.”

¹² Khân păng joi tâm phung ƀon lan gŭ tâm Jabes ta Gilêat puăn rhiăng nuyh bu ur druh, ê hŏ gŭ nsum đah bu klâu, jêh ri leo khân păng sĭt ma rmlak tahan ta Silô, tâm n'gor Kanaan.

¹³ Lĕ rngôch phung tâm rƀŭn njuăl phung mbơh văch ma phung Benjamin gŭ ta klêr lŭ Rimôn gay mbơh nau đăp mpăn ma khân păng.

¹⁴ Phung Benjamin plơ̆ sĭt jêh ri phung ƀon lan Israel nđăp phung bu ur ta Jabes tâm n'gor Gilêat hôm rêh jêng ur ma khân păng. Ƀiălah mâu tŏng ôh ma lĕ rngôch bunuyh.

¹⁵ Pônây phung ƀon lan nduyh tôr ma nau hŏ tât jêh ma phung Benjamin, yorlah Brah Yêhôva ƀư pưt jêh du phung tâm ndŭl mpôl Israel.

¹⁶ Pônây phung kôranh bu ranh tâm phung tâm rƀŭn lah: “Mâm he mra ƀư gay ăn geh ur ma phung hôm e, yorlah bu ur phung Benjamin bu hŏ nkhĭt lĕ jêh?”

¹⁷ Khân păng lah ntop: “Đơ phung hôm e rêh klen ăn geh bunuyh ndơn drăp Benjamin gay phung Israel mâu roh ôh du ndŭl mpôl.

¹⁸ Ƀiălah, he mâu dơi ăn ôh kon bu ur he jêng ur ma khân păng, yorlah phung ƀon lan Israel ton jêh: ‘Rak rtăp ma nơm ăn du huê ur ma phung Benjamin!’ ”

¹⁹ Yor ri, khân păng lah: “Aơ, ăp năm geh ƀư du nau rƀŭn ma Brah Yêhôva ta Silô, mpeh dor Bêthel, mpeh luh nar ta trong hăn bơh Bêthel tât ta Sichem jêh ri mpeh rđŭng Lêbôna.”

²⁰ Pônây khân păng ntĭnh ma phung Benjamin: “Hăn hom, gŭ kâp tâm lĕ đang krăk ƀâu

²¹ jêh ri dôl uănh tơlah phung kon bu ur Silô luh hăn pâl ntalơ̆ ma ndrăng khân păng, nôk nây khân may nchuăt luh bơh lĕ đang krăk ƀâu, ăp nơm tâm khân may sŏk du huê ur bơh phung kon bu ur tâm phung bu ur druh ndăm Silô, jêh nây hăn rlet ma n'gor Benjamin.

²² Tơlah mbơ̆ mâu lah nâu khân păng văch tât lah ma he, he mra plơ̆ lah: ‘Yor ma hên dăn khân may yô̆ an ma khân păng, yorlah nôk tâm lơh, hên mâu nhŭp ôh phung bu ur bu nă ƀư ur ma hên. Rlau lơn ma nĕ, mâu di ôh khân may ŭch ăn kon bu ur ma khân păng, yorlah tơlah ƀư pônây, n'hêl nanê̆ khân may mra jêng tih.’”

²³ Phung Benjamin ƀư tĭng pônây. Tâm nôk phung bu ur druh dôl pâl ntalơ̆, khân păng nhŭp phung nây leo sĭt ƀư ur, jêh ri plơ̆ sĭt ma drăp ndơn khân păng. Khân păng ndâk njêng tay ƀon toyh jêh ri gŭ ta nây.

²⁴ Nôk nây, phung ƀon lan Israel plơ̆ sĭt tâm ndŭl mpôl jêh ri ngih vâl khân păng nơm, ăp nơm bu klâu plơ̆ sĭt ma ntŭk drăp ndơn păng.

²⁵ Nôk nây, phung Israel mâu geh hađăch ôh. Ăp nơm ƀư tĭng nâm păng mĭn di.