Phung Kôranh Phat Dôih 20 - Nau Brah Ndu Ngơi 2023

Nau rmal ndŭl mpôl Benjamin

¹ Rnôk nây, lĕ rngôch phung ƀon lan Israel du luh ntơm bơh Dan tât ma Bêr-Sêba, nđâp lĕ n'gor Gilêat; hăn nâm bu du huê bunuyh jêh ri tâm rƀŭn tanăp Brah Yêhôva ta Mispa.

² Phung kôranh chiă uănh ma lĕ rngôch ndŭl mpôl Israel geh măt da dê tâm rƀŭn phung ƀon lan Brah Ndu. Geh puăn rsen tahan, blau djôt đao.

³ Phung Benjamin lĕ tăng jêh nau phung ƀon lan Israel hăn tât ma Mispa. Phung ƀon lan Israel lah: “Nkoch hom ma hên, mâm dĭng geh nau tih toyh aơ tât?”

⁴ Bu klâu Lêvi, sai bu ur nơm bu nkhĭt nây, lah: “Gâp hăn tât ta Gibêa, jêng ƀon toyh ndŭl mpôl Benjamin, nđâp ma ur yông gâp, gay bê̆ch măng ta nây.

⁵ Ƀiălah phung Gibêa dâk tâm rdâng đah gâp, dôl măng khân păng nchueng jŭm ngih gâp gŭ jêh ri mĭn ŭch nkhĭt gâp. Khân păng tom ur yông gâp jêh ri păng khĭt jêh.

⁶ Gâp sŏk săk jăn ur yông gâp, koh săk jăn păng âk gâl jêh ri njuăl lam nkual jêng drăp ndơn Israel, yorlah khân păng ƀư jêh nau tih toyh jêh ri ƀư bêk prêng tâm phung Israel.

⁷ Aơ, lĕ rngôch phung ƀon lan Israel geh măt ta aơ. Khân may nchră hom ndrăng khân may gay ma gĭt mâm nau mra plơng.”

⁸ Lĕ rngôch phung ƀon lan Israel dâk nâm bu du huê bunuyh jêh ri lah: “Mâu geh du huê tâm phung hên dơi sĭt ma ngih bok păng, mâu đŏng geh du huê plơ̆ sĭt ma ngih vâl păng.

⁹ Aƀaơ ri, aơ jêng nau he mra ƀư ma Gibêa: He mra nchroh n'hôr gay gĭt mbu mra hăn gay lơh ƀon toyh nây.

¹⁰ Tâm du rhiăng nuyh tâm ăp ndŭl mpôl Israel sŏk jât bunuyh, du rbăn bunuyh sŏk du rhiăng bunuyh, jêh ri jât rbăn bunuyh sŏk du rbăn bunuyh gay khân păng joi ndơ sông sa ma phung ƀon lan. Bi lĕ phung êng mra hăn rmal ma phung Gêba bơh noi deh Benjamin tĭng nâm nau ƀai phung ƀon lan ƀon toyh nây hŏ ƀư tih jêh tâm Israel.”

¹¹ Pônây lĕ rngôch phung Israel tâm rƀŭn ndrel du ai gay hăn lơh ƀon toyh nây.

¹² Phung ndŭl mpôl Israel njuăl phung mbơh hăn tât ma ndŭl mpôl Benjamin jêh ri lah: “Moh ntil nau djơh tâm phung khân may hŏ ƀư?

¹³ Aƀaơ, jao hom ma hên phung bunuyh mhĭk tâm Gibêa gay ma hên nkhĭt lơi khân păng, jêh ri ƀư rai lơi nau mhĭk luh bơh phung Israel.” Ƀiălah ndŭl mpôl Benjamin mâu ŭch iăt ôh nau oh nâu khân păng jêng phung Israel.

¹⁴ Khân păng hăn luh bơh ƀon toyh khân jêh ri rgum băl ta Gibêa gay tâm lơh đah phung ƀon lan Israel.

¹⁵ Tâm nar nây, ndŭl mpôl Benjamin dơi săch bar rmưn prao rbăn nuyh bu klâu blau djôt đao tă bơh lĕ ƀon toyh, ntop đah pơh rhiăng tahan ngăch prăl gŭ tâm Gibêa.

¹⁶ Tâm lĕ rngôch phung tahan nây hôm geh pơh rhiăng tahan ngăch prăl tâm Israel vay mơng dŏng ti chiau, blau pănh na, pănh song du rse sŏk ƀiălah mâu dơi tih ôh.

¹⁷ Phung ƀon lan Israel, mâu kơp ôh ndŭl mpôl Benjamin, tâm ban đŏng săch geh puăn rsen bunuyh bu klâu blau djôt đao, jêh ri lĕ rngôch phung nây jêng phung tahan.

¹⁸ Pônây, phung ƀon lan Israel dâk hăn hao ma Bêthel jêh ri ôp ma Brah Ndu pô aơ: “Mbu nơm tâm hên mra hăn tâm lơh đah ndŭl mpôl Benjamin?” Brah Yêhôva plơ̆ lah: “Phung Yuđa mra hăn lor.”

¹⁹ Ang ôi taơ, phung ƀon lan Israel dâk hăn ƀư pôih rmlak êp Gibêa.

²⁰ Phung ƀon lan Israel hăn tâm lơh đah ndŭl mpôl Benjamin jêh ri phung bu klâu Israel dăp tahan tâm lơh đah khân păng ta Gibêa.

²¹ Phung Benjamin du luh bơh Gibêa, jêh ri tâm nar nây khân păng nkhĭt bar rmưn bar rbăn phung Israel.

²² Phung ƀon lan Israel tâm ntrôl tay jêh ri du tơ̆ tay nkrĭp dăp tahan ta ntŭk khân păng hŏ nkrĭp dăp tahan jêh nar lor.

²³ Phung ƀon lan Israel hăn hao jêh ri nhĭm panăp Brah Yêhôva kŏ tât kêng măng. Khân păng ôp ma Brah Yêhôva pô aơ: “Hên dơi lĕ plơ̆ tâm lơh tay đah phung Benjamin, jêng phung oh nâu ma hên?” Brah Yêhôva plơ̆ lah: “Hăn hao lơh hom khân păng!”

²⁴ Nar tal bar phung ƀon lan Israel hăn văch tâm lơh đah ndŭl mpôl Benjamin.

²⁵ Phung Benjamin tâm ban đŏng du luh bơh Gibêa jêh ri tâm nar nây, khân păng tâm lơh nkhĭt du rmưn pham rbăn nuyh phung Israel, jêh ri lĕ rngôch phung nây geh blau djôt đao da dê.

²⁶ Rnôk nây, lĕ rngôch phung ƀon lan Israel hăn hao ma Bêthel, gŭ dâk ta nây jêh ri nhĭm tanăp Brah Yêhôva. Khân păng ât sông sa tâm nar nây kŏ tât kêng măng jêh ri nhhơr ndơ ƀư brah gŭch jêh ri ndơ ƀư brah ma nau đăp mpăn tanăp măt Brah Yêhôva.

^27-28 Rnôk nây, Hip Nau Tâm Rnglăp Brah Yêhôva gŭ ta nây, geh Y-Phinêas, kon bu klâu Y-Êlêasar, sau Y-Arôn, pah kan tanăp măt Brah Yêhôva. Pônây, Phung ƀon lan Israel ôp ma Brah Yêhôva pô aơ: “Mâm hên mra plơ̆ tay hăn lơh đŏng đah phung oh nâu hên jêng phung Benjamin, mâu lah hên mra rlu?” Brah Yêhôva lah: “Hăn hao hom, yorlah ôi taơ Gâp mra jao khân păng tâm ti may.”

²⁹ Phung Israel đă phung tahan gŭ kâp jŭm Gibêa.

³⁰ Nar tơ̆ pe, phung ƀon lan Israel hăn hao tâm lơh đah phung Benjamin jêh ri nkrĭp dăp tahan tra năp đah Gibêa nâm bu saơm.

³¹ Ndŭl mpôl Benjamin luh chuă tâm lơh đah phung ƀon lan Israel jêh ri bu ndơm du ngai bơh ƀon toyh. Nâm bar tơ̆ saơm, khân păng ntơm lơh jêh ri nkhĭt klăp lah pe jât nuyh Israel ta rdjŭm bar trong toyh hăn rlet bri neh lâng, du trong hăn hao ƀon Bêthel jêh ri du trong êng leo ma ƀon Gibêa.

³² Ndŭl mpôl Benjamin lah: “Aơ, he dơi lơh đah khân păng nâm alor.” Ƀiălah phung ƀon lan Israel lah ndrăng khân păng: “Ăn he nchuăt du jêh ri ndơm khân păng du luh bơh ƀon toyh kŏ tât ta trong toyh.”

³³ Lĕ rngôch phung Israel dâk bơh tâm ntŭk khân păng gŭ, nkrĭp dăp tahan ta Baal-Tamar; bi phung tahan khân păng gŭ kâp văch rduh lơh ta ntŭk dŭt huơi ta Gêba, jêng ntŭk mâu geh phung tahan gak.

³⁴ Nôk nây, du rmưn tahan prăl ngăn Israel hăn rduh lơh panăp Gibêa jêh ri nau tâm lơh nây ktang ngăn. Ƀiălah phung Benjamin mâu gĭt ôh nau mhĭk dăch tât ma khân păng.

³⁵ Brah Yêhôva dơi lơh phung Benjamin tanăp phung ƀon lan Israel; jêh ri tâm nar nây, phung ƀon lan Israel nkhĭt bar rmưn prăm rbăn bunuyh Benjamin, lĕ rngôch phung nây blau djôt đao da dê.

³⁶ Phung Benjamin saơ rah vah ma khân păng nơm mâu hôm dơi ôh. Phung ƀon lan Israel mƀơk đê̆ ma phung Benjamin, yorlah khân păng nsing ma phung tahan gŭ kâp dâp dăch Gibêa.

³⁷ Phung tahan gŭ kâp rduh lơh gơnh ngăn ma ƀon Gibêa, sŏk đao nkhĭt lĕ rngôch bunuyh tâm ƀon toyh.

³⁸ Phung ƀon lan Israel tâm nal jêh đah phung gŭ kâp tơlah khân păng saơ thŭl nhhŭk ŭnh hao ta klơ ƀon toyh, gay ƀư nau mbên,

³⁹ pônây phung ƀon lan Israel plơ̆ lơh tay. Phung Benjamin ntơm lơh jêh ri nkhĭt klăp lah pe jât nuyh Israel jêh ri lah: “N'hêl nanê̆ he dơi lơh phung nây nâm tơ̆ lor!”

⁴⁰ Ƀiălah tơlah nhhŭk ŭnh ntơm hao bơh ƀon toyh, phung Benjamin n'gĭl uănh pakơi saơ lam ƀon geh nhhŭk ŭnh hao klơ trôk.

⁴¹ Nôk nây, phung ƀon lan Israel plơ̆ tay, jêh ri phung Benjamin geh nau phit phơr yorlah khân păng saơ nau mhĭk dăch tât jêh ma khân păng.

⁴² Khân păng ndôn kơi panăp phung bu klâu Israel, nchuăt du ma mpeh bri rdah, ƀiălah khân păng mâu dơi klaih bơh nau tâm lơh. Phung tahan Benjamin hăn luh tă bơh lĕ ƀon toyh êng, tâm phung tahan khân păng nơm, rduh nkhĭt khân păng.

⁴³ Khân păng nchueng jŭm phung Benjamin, tĭng lơh jêh ri ƀư rai khân păng kŏ tât mpeh luh nar ƀon toyh Gibêa.

⁴⁴ Pônây, geh du rmưn pham rbăn bunuyh Benjamin cha lôt khĭt, lĕ rngôch khân păng jêng phung tahan janh ktang.

⁴⁵ Nôk khân păng ndôn kơi nchuăt du ma mpeh bri rdah, kŏ tât klêr lŭ Rimôn, phung ƀon lan Israel nkhĭt rŏ trong prăm rbăn nuyh. Khân păng tĭng đŏng tĭng kŏ tât dơi nkhĭt khân păng ta ƀon Gidôm jêh ri nkhĭt tay bar rbăn nuyh đŏng.

⁴⁶ Pônây, lĕ rngôch phung Benjamin cha lôt khĭt tâm nar nây jêng bar rmưn prăm rbăn bunuyh blau djôt đao jêh ri lĕ rngôch jêng phung tahan janh ktang.

⁴⁷ Ƀiălah geh prao rhiăng nuyh ndôn kơi nchuăt du ma mpeh bri rdah kŏ tât ta klêr lŭ Rimôn jêh ri gŭ ta nây puăn khay.

⁴⁸ Phung ƀon lan Israel plơ̆ lơh phung Benjamin, sŏk đao ƀư rai lĕ rngôch phung tâm ƀon toyh, mpô mpa rong, jêh ri lĕ rngôch mbu nơm khân păng mâp. Lĕ rngôch ƀon khân păng tât khân păng su lĕ ma ŭnh.