Phung Kôranh Phat Dôih 2 - Nau Brah Ndu Ngơi 2023

Tông mpăr Brah Yêhôva tâm mpơl ta Bôkim

¹ Tông mpăr Brah Yêhôva hăn hao bơh Gilgal tât ta Bôkim jêh ri lah pô aơ: “Gâp hŏ leo jêh khân may du luh bơh n'gor Êjipt, njŭn leo khân may lăp tâm n'gor Gâp sơm ton ăn ma phung chô yau khân may. Gâp hŏ lah: ‘Gâp mâu mra chalơi ôh nau tâm rnglăp Gâp hŏ rdâk jêh đah khân may,

² bi khân may, lơi ta ƀư ôh nau tâm rnglăp đah phung ƀon lan tâm n'gor aơ; ƀư chah hom nơng ƀư brah khân păng.’ Ƀiălah khân may mâu iăt tĭng nau Gâp ntĭnh. Mâm khân may hŏ ƀư nau nây?

³ Yor ri Gâp hŏ lah: ‘Gâp mâu mra mprơh ôh lĕ phung ƀon lan nây luh bơh khân may, ƀiălah khân păng mra nâm bu lok ntâp ta pŭng khân may, jêh ri phung brah khân păng mra jêng dăk sân ma khân may.’”

⁴ Nôk tông mpăr Brah Yêhôva lah lĕ jêh nau nây ma lĕ rngôch phung Israel, phung ƀon lan Israel nhĭm nhhiăng hâu ngăn.

⁵ Khân păng ntơ rnha ntŭk nây jêng Bôkim jêh ri nhhơr mpa ƀư brah ma Brah Yêhôva ta ntŭk nây.

Phung kôranh phat dôih

⁶ Jêh nây Y-Yôsuê ăn phung ƀon lan sĭt, lĕ rngôch phung ƀon lan Israel hăn dơn n'gor neh pă ma khân păng nơm jêng drăp ndơn.

⁷ Phung ƀon lan pah kan ma Brah Yêhôva dôl rnôk Y-Yôsuê hôm rêh jêh ri dôl rnôk phung bu ranh hôm rêh jŏ lơn ma Y-Yôsuê, jêng phung hŏ saơ lĕ rngôch nau kan toyh Brah Yêhôva hŏ ƀư jêh ma phung Israel.

⁸ Jêh ma nây, Y-Yôsuê, kon bu klâu Y-Nun, oh mon Brah Yêhôva, khĭt jêh, dơi rêh du rhiăng jât năm.

⁹ Bu tâp păng tâm kô̆ n'gor bơh drăp ndơn păng ta Timnat-Hêres ta n'gor klơ dor yôk Êphraim, mpeh pa lơ yôk Gas.

¹⁰ Jêh ri lĕ rngôch bunuyh rnôk rô̆ nây lĕ khĭt đŏng, jêh ri geh đŏng rnôk rô̆ phung êng pakơi khân păng; khân păng mâu gĭt năl ôh Brah Yêhôva mâu đŏng gĭt lĕ nau kan Păng ƀư jêh ma phung Israel.

¹¹ Nôk nây, phung ƀon lan Israel ƀư nau mhĭk tanăp măt Brah Yêhôva, pah kan ma phung rup brah Baal,

¹² chalơi Brah Yêhôva Brah Ndu phung chô yau, jêng Nơm hŏ njŭn leo du chô yau khân păng luh bơh n'gor Êjipt. Khân păng hăn tĭng phung brah êng, brah phung ƀon lan gŭ jŭm khân păng, jêh ri chon mbah ma phung brah nây ƀư ăn Brah Yêhôva ji nuih.

¹³ Khân păng chalơi jêh Brah Yêhôva gay pah kan ma brah Baal jêh ri ma brah Astarôt.

¹⁴ Pônây Brah Yêhôva ji nuih ngăn ma phung Israel. Păng jao khân păng tâm ti phung pit in gay phung nây sŏk lĕ ndơ khân păng. Păng tăch phung Israel ma phung rlăng gŭ văr jŭm khân păng jêh ri phung Israel mâu hôm dơi ôh tâm rđâng đah phung rlăng khân păng.

¹⁵ Ăp tơ̆ khân păng hăn tâm lơh, ti Brah Yêhôva ƀư mhĭk ma khân păng nâm Brah Yêhôva hŏ sơm ton jêh ma khân păng. Khân păng tŭp tâm nau rêh ni toyh ngăn ngên.

¹⁶ Nôk nây Brah Yêhôva n'hao phung kôranh phat dôih gay tâm rklaih khân păng bơh ti phung pit in drăp ndơn khân păng.

¹⁷ Ƀiălah khân păng mâu ŭch iăt đŏng nau ngơi phung kôranh phat dôih yorlah khân păng ƀư nau văng tĭr đah phung brah êng jêh ri chon mbah panăp phung brah nây. Khân păng gơnh chalơi trong phung chô yau khân păng hŏ hăn jêh, mâu kơt tĭng ôh phung chô yau khân păng djôt prăp lĕ nau vay Brah Yêhôva ntăm.

¹⁸ Ăp tơ̆ Brah Yêhôva n'hao phung kôranh phat dôih ăn phung Israel, Păng gŭ ndrel phung kôranh phat dôih nây. Dôl rnôk phung kôranh phat dôih hôm rêh, Brah Yêhôva rklaih phung Israel luh bơh ti phung rlăng khân păng, yorlah Păng yô̆ nđach ma lĕ nau nter vơl khân păng tâm nôk bu nkrit, tŭn jot ma khân păng.

¹⁹ Ƀiălah dôl phung kôranh phat dôih khĭt jêh, phung Israel ƀư tay nau mhĭk tih rlau lơn phung chô yau khân păng, hăn tĭng phung brah êng, pah kan jêh ri chon mbah phung brah nây. Khân păng mâu ŭch chalơi lĕ nau djơh ƀiălah ăt thoi đŏng nau dăng bôk.

²⁰ Yor ri, Brah Yêhôva hao ji nuih ma phung Israel, jêh ri Păng lah: “Yorlah phung ƀon lan mâu gŭ răp jăp ma nau tâm rnglăp Gâp hŏ ntăm ma phung chô yau khân păng, jêh ri yorlah khân păng mâu ŭch tông ôh bâr Gâp,

²¹ rĭ dĭng Gâp mâu mprơh ôh bơh khân păng phung mpôl băl hôm e Y-Yôsuê om êlor păng khĭt.

²² Gâp mra dŏng phung mpôl băl nây gay rlong uănh phung Israel, gay gĭt khân păng geh mât mray jêh ri hăn tĭng ndô̆ trong Brah Yêhôva nâm bu phung chô yau khân păng hŏ ƀư mâu lah mâu.”

²³ Yor ri, Brah Yêhôva om phung mpôl băl nây hôm e tâm n'gor, mâu mprơh ro ôh khân păng luh, jêh ri Păng mâu đŏng jao phung nây tâm ti Y-Yôsuê.