Phung Kôranh Phat Dôih 19 - Nau Brah Ndu Ngơi 2023

Bunuyh Lêvi jêh ri ur yông păng

¹ Tâm nôk nây, mâu geh ôh hađăch tâm phung ƀon lan Israel. Geh du huê bunuyh Lêvi gŭ njưh ta n'gor klơ dor yôk ngai đah ƀon ta Êphraim jêh ri păng sŏk du huê ur yông ta Ƀêtlêhem, n'gor Yuđa.

² Ƀiălah ur yông păng ji nuih ma păng jêh ri chalơi păng, du sĭt ma ngih mbơ̆ păng ta Ƀêtlêhem, tâm n'gor Yuđa, jêh nây gŭ ta nây puăn khay.

³ Sai păng dâk hăn joi ur păng, jêh ri ngơi ueh bonh nuih n'hâm ur păng, gay ma leo ur sĭt rlet ma ngih vâl păng nơm. Păng geh leo ndrel du huê oh mon jêh ri bar mlâm seh bri. Bu ur nây jă sai păng lăp tâm ngih mbơ̆ păng jêh ri nôk mbơ̆ bu ur saơ klay păng, luh chuă vơt ma nau răm rhơn.

⁴ Po bu klâu păng, mbơ̆ bu ur nây, kân klay gŭ tay, păng gŭ ndrel ma păng pe nar. Khân păng sông sa nhêt jêh ri bê̆ch măng ta nây.

⁵ Ta nar tal puăn, khân păng dâk ơm ôi, jêh ri lah bunuyh Lêvi ndrăp hăn sĭt, mbơ̆ bu ur nây lah ma klay păng: “Khân may sa hom du glo piăng let gay bah ji ngot, jêh nây dơi dâk hăn.”

⁶ Pônây khân păng gŭ tay, sông nhêt sa ndrel. Mbơ̆ bu ur lah ma klay păng: “Ăn may bê̆ch tay măng aơ đŏng, gay ma nuih n'hâm may maak!”

⁷ Bunuyh Lêvi nây dâk ơm ôi gay hăn sĭt ƀiălah po bu klâu păng kân ngăn kŏ tât păng plơ̆ tay măng nây đŏng.

⁸ Nar tal prăm, păng kah rngăl ơm gay hăn sĭt pôri po bu klâu păng lah ma păng pô aơ: “Ăn may gŭ sông sa ƀât, nsrôih gŭ kâp tât nar vet.” Pônây lĕ bar hê ur sai khân păng sông sa.

⁹ Bunuyh Lêvi jêh ri ur yông păng ndrel ma oh mon păng dâk gay hăn, ƀiălah po bu klâu păng, mbơ̆ bu ur nây lah ma păng: “Aơ, nar lĕ nar vet dăch kêng măng jêh, dăn bar hê khân may plơ̆ bê̆ch tay ta aơ. Ngăn, nar lĕ dăch măng ngo jêh, bê̆ch hom jêh ri ăn nuih n'hâm may maak. Ôi taơ, bar hê khân may mra dâk ơm ôi jêh ri hăn trong plơ̆ sĭt ngih may.”

¹⁰ Ƀiălah bu klâu nây mâu ŭch bê̆ch ôh rĭ dĭng dâk jêh ri hăn. Bunuyh Lêvi tât ntŭk tâm tham đah Jêbus, jêng Yêrusalem, ndrel ma bar mlâm seh bri geh dăp ưn jêh ri geh đŏng ur yông.

¹¹ Tơlah khân păng tât êp Jêbus nar lĕ dăch kêng măng ngo jêh. Oh mon lah ma kôranh păng: “He veh lăp hom ta ƀon toyh phung ƀon lan Jêbus aơ, jêh ri bê̆ch măng ta nây.”

¹² Kôranh păng plơ̆ lah: “He mâu veh ôh lăp tâm ƀon toyh phung bu năch, jêng ntŭk mâu geh ôh phung ƀon lan Israel, ƀiălah he mra hăn tât ta Gibêa.”

¹³ Kôranh lah tay: “He srôih hăn tât ta Gibêa mâu lah ta Rama jêh ri bê̆ch măng ta du ntŭk tâm lĕ ntŭk nây.”

¹⁴ Pônây, khân păng ăt hăn jêh ri nôk hăn văch dăch Gibêa, jêng ƀon toyh tâm n'gor Benjamin, nôk nây nar nhâp jêh.

¹⁵ Khân păng veh lăp ta ƀon toyh Gibêa gay bê̆ch măng ta nây. Khân păng hăn lăp ƀon toyh ƀiălah gŭ ta padih trong yorlah mâu geh ôh bunuyh ran khân păng lăp tâm ngih gay bê̆ch măng.

¹⁶ Kêng măng, geh du huê bu klâu bu ranh pah kan mir păng plơ̆ sĭt. Bu klâu nây jêng bunuyh bơh n'gor klơ dor yôk Êphraim, ƀiălah dôl gŭ njưh ta Gibêa, jêng ntŭk ndŭl mpôl Benjamin gŭ rêh.

¹⁷ Bu klâu bu ranh n'gơr măt saơ phung bu năch gŭ padih trong, păng ôp: “Ta ntŭk may hăn jêh ri mbah tă may?”

¹⁸ Bunuyh Lêvi plơ̆ lah: “Hên dôl hăn trong tă bơh Ƀêtlêhem tâm n'gor Yuđa, hăn tât ta n'gor klơ dor yôk ngai bơh Êphraim, jêng ntŭk gâp gŭ. Gâp hăn jêh tât ta Ƀêtlêhem tâm n'gor Yuđa, jêh ri nar aơ gâp pah kan tâm ngih Brah Yêhôva, ƀiălah mâu geh ôh bunuyh ran gâp lăp tâm ngih păng!

¹⁹ Hên geh rhe jêh ri gơ̆ kro ma seh bri hên, nđâp ma ndrănh jêh ri piăng let ma gâp nơm, jêng oh mon may, ma ur yông jêh ri bu klâu ndăm hăn tĭng gâp. Hên mâu pưt du ntil ndơ ôh.”

²⁰ Bu klâu bu ranh lah: “Gŭ đăp mpăn hom! Gâp mra râng an lĕ ntil may ŭch, may mâu bê̆ch măng padih trong ôh.”

²¹ Bu ranh nây jă păng lăp tâm ngih, ăn seh bri sa jêh nây khân păng rao jâng jêh ri sông sa nhêt ndrel.

²² Nôk khân păng dôl răm maak ndrăng khân păng, geh phung bunuyh tâm ƀon toyh, jêng phung janh mhĭk, nchueng jŭm ngih nây, dong ta bôk mpông jêh ri lah ma bu klâu bu ranh, jêng kôranh vâl, pô aơ: “Leo hom bu klâu hŏ lăp tâm ngih may ăn păng văch ta aơ gay ma hên gĭt năl păng.”

²³ Bu klâu bu ranh, kôranh vâl nây hăn luh gay lah ma khân păng: “Aơ hơi phung oh nâu, dăn lơi ƀư nau djơh pônây ôh, yorlah bu klâu aơ lăp jêh tâm vâl gâp, lơi ƀư nau djơh nây ôh.

²⁴ Gâp geh kon bu ur hôm druh, jêh ri bunuyh ri geh đŏng ur yông păng; gâp mra njŭn khân păng padih ma khân may bê̆ch ndrel đah khân păng, ƀư bêk ma khân păng tĭng nâm khân may ŭch, ƀiălah lơi ta ƀư nau mhĭk tâm ban pônây ma bu klâu aơ.”

²⁵ Ƀiălah phung bu klâu mhĭk nây mâu ŭch iăt ôh. Yor ri, bu klâu Lêvi nây leo ur yông păng luh padih ma khân păng jêh ri khân păng bê̆ch ndrel đah păng, ƀư bêk păng tâm du măng ang kŏ tât ang ôi, jêh nây mprơh păng sĭt nôk ƀhit rvi ang.

²⁶ Tât kêng ôi, bu ur nây plơ̆ sĭt jêh ri cha lôt ta mpông ngih bu klâu bu ranh ntŭk kôranh vâl păng gŭ njưh, jêh ri bê̆ch ta aơ kŏ tât ang trôk.

²⁷ Sai păng dâk bê̆ch dôl ơm ôi jêh ri pơk mpông ngih gay hăn trong jêh ri saơ ur yông păng gŭ lâng bê̆ch ta mpông ngih, bar ti păng ta klơ kađar lăp mpông sâng.

²⁸ Sai păng lah ma păng: “Dâk hom, he mra hăn.” Ƀiălah păng mâu hôm ngơi đŏng ôh. Jêh nây sai păng ăn păng ta klơ seh bri păng, dâk hăn trong sĭt rlet ma ngih.

²⁹ Tơlah păng lăp jêh tâm ngih, păng sŏk du mlâm pêh koh săk jăn ur yông păng jêng âk gâl jêh ri tâm pă geh jât ma bar gâl njuăl lam nkual Israel.

³⁰ Lĕ rngôch phung saơ jêh nau nây lah: “Ntơm bơh nar phung ƀon lan Israel du luh bơh Êjipt kŏ tât ma nar aơ mâu prot saơ ôh nau tât kơt nĕ? Dăn khân may mĭn hom ma nau aơ, tâm nchră jêh ri moh nau mra ƀư.”