Phung Kôranh Phat Dôih 18 - Nau Brah Ndu Ngơi 2023

Ndŭl mpôl Dan ntŭng rup trah Y-Mika jêh ri gŭ ta ƀon toyh Lais

¹ Tâm rnôk nây, mâu geh ôh hađăch tâm n'gor Israel. Rnôk nây ndŭl mpôl Dan hăn joi du n'gor neh gay gŭ yorlah ntơm bơh saơm tât ma nar nây, tâm lĕ ndŭl mpôl Israel, ndŭl mpôl nây ê hŏ dơn ôh drăp ndơn tâm pă ăn ma khân păng.

² Pônây, phung Dan prơh prăm nuyh janh ktang tâm ndŭl mpôl khân păng hăn bơh Sôra jêh ri bơh Êstaôl gay hăn n'hut uănh n'gor, jêh ri ntĭnh ma khân păng pô aơ: “Hăn n'hut uănh hom n'gor nây.” Phung hăn n'hut uănh hăn tât ma n'gor klơ dor yôk Êphraim, tât ta ngih Y-Mika, jêh ri gŭ bê̆ch măng ta nây.

³ Tơlah khân păng gŭ tâm ngih Y-Mika, khân păng gĭt năl bâr ngơi bu klâu ndăm Lêvi nây, pôri khân păng hăn văch dăch jêh ri ôp: “Mbu njŭn may ta aơ? Moh kan may ƀư jêh ri mâm ƀư may gŭ ta aơ?”

⁴ Bunuyh Lêvi ăn ma khân păng gĭt Y-Mika ƀư ueh ma păng jêh ri lah: “Y-Mika nkhôm gâp, gay gâp jêng kôranh ƀư brah ma păng.”

⁵ Khân păng lah tay: “Pôri, ôp hom nau mĭn Brah Ndu gay gĭt nau hên nsong mra geh nau ueh mâu lah mâu.”

⁶ Kôranh ƀư brah lah: “Hăn hom đăp mpăn. Brah Yêhôva mra kâp kơl khân may tâm nau nsong.”

⁷ Pônây, prăm nuyh bu klâu nây dâk hăn tât ta ƀon toyh Lais, saơ phung ƀon lan gŭ ta nây hăn tĭng nâm nau vay phung Sidôn, gŭ rêh đăp mpăn, mâu rŭng răng ôh jêh ri mâu geh njrăng. Mâu geh nơm nduyh ma kôranh chiă uănh tâm ƀon toyh nây. Khân păng gŭ ngai đah phung Sidôn, jêh ri mâu geh tâm rnglăp đah bu ôh.

⁸ Tơlah prăm bunuyh plơ̆ sĭt ma phung oh nâu khân păng ta Sôra jêh ri Êstaôl, phung oh nâu ôp khân păng pô aơ: “Mâm nau khân may saơ?”

⁹ Prăm bunuyh nây plơ̆ lah: “He hăn hom tâm lơh đah khân păng, yorlah hên saơ bri nây ueh ngăn. Aơ! Mâm khân may gŭ dơm? Lơi mbrĕ mbrơi ôh, hăn hom pit sŏk bri nây.

¹⁰ Tơlah lăp n'gor bri nây, khân may mra saơ ma du phung ƀon lan ueh, bri aơ dĭ toyh ƀiălah Brah Ndu jao jêh păng tâm ti khân may. Nanê̆ ngăn jêng ntŭk mâu pưt ôh du ntil ndơ ta neh ntu.”

¹¹ Pônây, prao rhiăng nuyh bơh ndŭl mpôl Dan djôt ndơ tâm lơh gay tâm lơh. Khân păng hăn bơh Sôra jêh ri Êstaôl

¹² ƀư pôih rmlak ta Kiriat-Jêarim, tâm n'gor Yuđa. Yor nây ntŭk aơ bu ntơ amoh Rmlak Tahan Dan kŏ tât ta nar aơ. Ntŭk nây gŭ mpeh nhâp nar Kiriat-Jêarim.

¹³ Bơh nĕ, khân păng hăn găn tât ma n'gor klơ dor yôk Êphraim jêh ri tât ma ngih Y-Mika.

¹⁴ Pônây, prăm nuyh hăn n'hut uănh n'gor Lais lah ma phung oh nâu khân păng pô aơ: “Khân may gĭt lĕ tâm ngih aơ geh du êphôt, rup brah jê̆, jêh ri du mlâm rup trah? Pônây aƀaơ, khân may gĭt jêh moh nau khân may mra ƀư.”

¹⁵ Khân păng veh tât ma ngih bu klâu ndăm Lêvi, lăp ta ngih Y-Mika, jêh ri mbah ma păng.

¹⁶ Prao rhiăng nuyh bơh ndŭl mpôl Dan djôt ndơ tâm lơh gay tâm lơh gŭ padih mpông pêr.

¹⁷ Ƀiălah prăm nuyh lĕ hăn jêh gay n'hut uănh n'gor nây lăp tâm ngih, jêh ri sŏk rup trah, êphôt, lĕ rup brah jê̆, jêh ri rup tŏ nôk kôranh ƀư brah gŭ dâk êp ntŭk lăp mpông pêr ndrel ma prao rhiăng nuyh djôt ndơ tâm lơh gay tâm lơh.

¹⁸ Tơlah prăm bunuyh nây lăp tâm ngih Y-Mika sŏk rup trah, êphôt, lĕ rup brah jê̆, jêh ri rup tŏ, kôranh ƀư brah ôp ma khân păng: “Ndơ khân may ƀư?”

¹⁹ Khân păng plơ̆ lah: “Gŭ rklăk hom, rdêp trôm mbung may ma mpang ti may, văch ndrel ma hên, jêng mbơ̆ jêh ri kôranh ƀư brah ma hên. Jêng kôranh ƀư brah ma du rnăk vâl jêh ri jêng kôranh ƀư brah ma lĕ du ndŭl mpôl, du ndŭl mpôl Israel, moh nau ueh lơn?”

²⁰ Kôranh ƀư brah răm maak tâm nuih n'hâm, păng sŏk êphôt, lĕ rup brah jê̆, rup trah, jêh ri tâm rnglăp đah phung nây.

²¹ Khân păng rle hăn luh, ăn phung kon se, mpô mpa rong, jêh ri ndô ndơ hăn lor, jêh nây khân păng hăn.

²² Nôk phung Dan hŏ hăn ngai jêh bơh ngih Y-Mika, phung bunuyh gŭ dăch ngih Y-Mika rgum băl gay hăn tĭng phung Dan.

²³ Khân păng dat kuăl pakơi rĭ dĭng phung Dan rle n'gĭl ôp ma Y-Mika: “Moh nau may geh kŏ tât may rgum băl hăn ndrel ma phung âk nây?”

²⁴ Y-Mika plơ̆ lah: “Khân may ntŭng phung brah gâp hŏ ƀư ndrel kôranh ƀư brah, jêh ri leo hăn du. Moh ndơ hôm e ma gâp nơm? Mâm khân may hôm ôp đŏng ma gâp ‘moh ndơ ƀư?’”

²⁵ Phung Dan lah ma Y-Mika: “Lơi ăn hên tăng ôh bâr may ta nklang hên, klach lah geh phung ji nuih ma may, jêh nây may jêh ri phung bunuyh tâm ngih may mra roh nau rêh.”

²⁶ Jêh nây phung Dan dâk hăn đŏng, bi Y-Mika saơ khân păng ktang lơn ma păng rĭ dĭng plơ̆ sĭt ma ngih păng nơm.

²⁷ Jêh sŏk lĕ rup Y-Mika hŏ ƀư jêh ri nhŭp kôranh ƀư brah păng, jêh ri lăp ndal tâm ƀon toyh Lais, jêng du phung ƀon lan gŭ păn thơ, đăp mpăn, mâu geh njrăng, jêh ri sŏk đao nkhĭt phung ƀon lan nây, jêh nây su ƀon toyh khân păng ma ŭnh.

²⁸ Mâu geh ôh nơm sâm rklaih an ma phung ƀon lan ta ƀon toyh Lais, yorlah ƀon toyh nây gŭ ngai đah Sidôn, jêh ri khân păng mâu geh ôh nau tâm rnglăp đah phung êng. Ƀon toyh nây gŭ tâm rlŭng mpeh Bet-Rêhôp. Ndŭl mpôl Dan ndâk njêng tay ƀon toyh nây jêh ri gŭ tâm nây.

²⁹ Khân păng ntơ ƀon nây Dan, kon bu klâu Y-Israel, jêng chô yau khân păng gay ma ntơ ma ƀon toyh nây; bi ntơ amoh saơm jêng Lais.

³⁰ Ndŭl mpôl Dan ndâk rup trah, gay mbah, jêh nây Y-Jônathan, kon bu klâu Y-Gersôm, sau Y-Môis, jêh ri phung kon sau păng jêng phung kôranh ƀư brah ma phung ndŭl mpôl Dan kŏ tât nar bri khân păng jêng bu nă.

³¹ Khân păng mât mray rup trah Y-Mika hŏ ƀư jêh dôl rnôk ngih Brah Ndu gŭ ta Silô.