Phung Kôranh Phat Dôih 17 - Nau Brah Ndu Ngơi 2023

KÔ̆ GROI NTOP ( 17:1 – 21:25 ) Y-Mika Mbah Rup

¹ Tâm n'gor klơ dor yôk Êphraim, geh du huê bu klâu amoh Y-Mika.

² Păng lah ma mê̆ păng: “Yorlah du rbăn du rhiăng glo prăk bu sŏk tă bơh ay jêh ri yor ndơ nây ay ngơi jêh nau rak rtăp, jêh ri tôr gâp hŏ tăng jêh. Aơ, prăk nây gŭ ndrel ma gâp, gâp yơh sŏk păng.” Mê̆ păng lah: “Dăn ma Brah Yêhôva ăn nau ueh lăng ma kon!”

³ Y-Mika mplơ̆ sĭt du rbăn du rhiăng glo prăk nây ma mê̆ păng. Mê̆ păng lah: “Gâp nhhơr prăk ma Brah Yêhôva gay kon bu klâu gâp tŏ du mlâm rup trah. Pôri aƀaơ gâp mra mplơ̆ sĭt păng ma may.”

⁴ Ƀiălah Y-Mika mplơ̆ sĭt prăk nây ma mê̆ păng. Mê̆ păng sŏk bar rhiăng glo prăk jao ma nơm chiăr gay tŏ du rup trah, n'gân tâm ngih Y-Mika.

⁵ Pônây, ngih Y-Mika jêng du ntŭk jay rhŏ brah. Păng ƀư du mlâm êphôt, jêh ri rup brah jê̆, jêh nây njêng du huê kon bu klâu păng ƀư kôranh ƀư brah.

⁶ Tâm rnôk nây, tâm n'gor Israel mâu geh ôh hađăch, lĕ rngôch bunuyh ăt ƀư tĭng nâm păng mĭn di.

⁷ Nôk nây, ta Ƀêtlêhem tâm n'gor Yuđa, geh du huê bu klâu ndăm jêng du huê Lêvi, bơh ndŭl mpôl Yuđa, gŭ njưh ta nây.

⁸ Bu klâu nây du luh bơh Ƀêtlêhem tâm n'gor Yuđa gay joi ntŭk păng dơi gŭ. Tâm trong hăn, păng hăn tât ma n'gor klơ dor yôk Êphraim, veh lăp ma ngih Y-Mika.

⁹ Y-Mika lah ma păng, “Mbah tă may?” Păng plơ̆ lah: “Gâp jêng du huê Lêvi gŭ ta Ƀêtlêhem tâm n'gor Yuđa. Gâp joi du ntŭk gay gŭ.”

¹⁰ Y-Mika lah: “Gŭ hom ndrel ma gâp, ăn may jêng mbơ̆ jêh ri kôranh ƀư brah ma gâp; gâp mra ăn ma may jât glo prăk tâm du năm, du kôp kho ao, jêh ri ndơ may sông sa.” Bu klâu Lêvi hăn luh du.

¹¹ Jêh nau nây, bu klâu Lêvi nây dơn gŭ ndrel ma Y-Mika, jêh ri Y-Mika uănh bu klâu ndăm Lêvi nây nâm bu du huê tâm phung kon bu klâu păng.

¹² Y-Mika njêng bu klâu Lêvi nây jêng kôranh ƀư brah ma păng, jêh ri bu klâu nây gŭ tâm ngih Y-Mika.

¹³ Y-Mika lah: “Aƀaơ gâp gĭt ma Brah Yêhôva mra ăn nau ueh uĭn ma gâp, yorlah gâp geh du huê bunuyh Lêvi jêng kôranh ƀư brah.”