Phung Kôranh Phat Dôih 16 - Nau Brah Ndu Ngơi 2023

Y-Samsôn jêh ri H'Dêlila

¹ Y-Samsôn hăn tât ma Gaxa, ta nây păng saơ du huê bu ur văng tĭr jêh ri hăn lăp ngih păng.

² Bu mbơh ma phung Gaxa: “Y-Samsôn văch jêh ta aơ.” Khân păng nchueng jŭm păng jêh ri gŭ kâp njrăng du măng ta mpông ƀon toyh. Tâm du măng ang, khân păng gŭ rklăk jêh ri lah: “Ang ôi, he mra nkhĭt păng.”

³ Y-Samsôn bê̆ch ta nây kŏ tât klong măng. Ta klong măng, păng kah rngăl, păng kuăn ta mpông ƀon jêh ri ta bar mlâm meh mpông, rôk ndrel rnăng nđăng jêh nây tuy ta klơ săng nglik, hăn hao ta n'gơn yôk tâm tra đah ƀon Hêbron.

⁴ Jêh nau nây mâu jŏ, păng rŏng ma du huê bu ur tâm rlŭng Sôrek, amoh păng jêng H'Dêlila.

⁵ Phung kôranh chiă uănh Philistin hăn tât ta ngih bu ur nây jêh ri lah: “Ndơm hom păng gay ngơi ma hên gĭt ntŭk păng geh nau ktang toyh kơt nĕ jêh ri mâm hên mra dơi đah păng, dơi chăp păng jêh ri ƀư ăn păng iăt tông ma hên. Ăp nơm hên mra ăn ma ay du rbăn du rhiăng glo prăk.”

⁶ H'Dêlila lah ma Y-Samsôn: “Gâp dăn ma may lah ma gâp gĭt mbah tă may geh nau ktang toyh kơt nĕ, jêh ri mâm bu dơi chăp may kŏ tât bu dơi đah may?”

⁷ Y-Samsôn lah: “Tơlah khân păng chăp gâp ma pơh njăr rse na mhe, ê hŏ ih kro ôh, pônây gâp mra jêng ra-ai nâm bu bunuyh êng.”

⁸ Phung kôranh phung Philistin njŭn ma H'Dêlila pơh njăr rse na mhe, ê hŏ ih kro ôh jêh ri păng chăp păng ma rse nây.

⁹ Nôk nây taơ, phung tahan dôl gŭ kâp tâm jrô păng. Păng lah: “Hơi Y-Samsôn, phung Philistin văch nhŭp may!” Ƀiălah păng tôch lơi lĕ rse nây nâm bu du rse brai mhay mâp ŭnh. Pônây, bu mâu gĭt ôh mbah tă luh nau ktang păng.

¹⁰ H'Dêlila lah ma Y-Samsôn: “Aơ, may mưch ma gâp, ngơi mƀruh ma gâp. Aƀaơ gâp dăn ma may lah ma gâp gĭt mâm ƀư bu dơi chăp may?”

¹¹ Păng plơ̆ lah: “Tơlah bu chăp gâp ma rse ndrăn mhe, ê hŏ geh bu dŏng ôh, nôk nây gâp mra jêng huơi nâm bu bunuyh êng.”

¹² Pônây H'Dêlila sŏk rse ndrăn mhe, chăp Y-Samsôn ma rse nây. Dôl phung tahan gŭ kâp tâm jrô, păng lah: “Hơi Y-Samsôn, phung Philistin văch nhŭp may!” Ƀiălah păng tôch lơi lĕ rse ndrăn nây bơh ti păng nâm du rse brai.

¹³ H'Dêlila lah ma Y-Samsôn: “Kŏ tât aƀaơ ri may ndơm ma gâp jêh ri ngơi mƀruh gâp. Gâp dăn ma may lah ma gâp gĭt mâm ƀư bu dơi chăp may.” Păng lah: “Tơlah ay păch pơh pha sŏk ta klơ bôk gâp ndrel ma brai ta vâng jêh ri kât đah n'gâng nglŏk, pônây gâp mra jêng huơi nâm bu bunuyh êng.”

¹⁴ Nôk păng hăk bê̆ch, H'Dêlila sŏk pơh pha sŏk ta klơ bôk păng jêh ri tanh ndrel ma brai vâng, jêh ri păng kât đah n'gâng nglŏk, jêh nây lah: “Hơi Y-Samsôn, phung Philistin văch nhŭp may!” Ƀiălah păng kah rngăl, rôk lĕ n'gâng nglŏk jêh ri brai vâng.

¹⁵ Rnôk nây, păng lah ma Y-Samsôn: “Mâm may dơi lah ‘gâp rŏng ma ay,’ tâm nôk nuih n'hâm may mâu geh ndrel ma gâp? May ndơm ma gâp pe tơ̆, jêh ri may mâu lah ôh ma gâp gĭt mbah tă may geh nau ktang toyh kơt nĕ.”

¹⁶ Ăp nar H'Dêlila ăt gŭ rklăk ƀư ăn Y-Samsôn rŭng răng jêh ri ji nuih kŏ tât păng ŭch khĭt.

¹⁷ Yor ri, păng nkoch lĕ ma bu ur nây gĭt. Păng lah: “Pêh hơr mâu mâp poih ôh sŏk ta klơ bôk gâp; yorlah gâp jêng du huê Nasirit prăp mra Brah Ndu ntơm bơh ndŭl me gâp. Tơlah jêh bu poih sŏk gâp, nôk nây nau ktang gâp mra luh du, gâp mra jêng huơi jêh ri jêng nâm bu bunuyh êng.”

¹⁸ Tơlah H'Dêlila saơ păng mbơh lĕ rngôch jêh ndơ ndâp tâm nuih n'hâm păng, bu ur prơh bu hăn kuăl phung kôranh chiă uănh Philistin jêh ri lah: “Văch hom, yorlah păng mbơh jêh lĕ ma gâp.” Pônây, phung kôranh chiă uănh Philistin văch ma ngih păng, djôt leo ndrel ma prăk tâm ti.

¹⁹ Păng ƀư ma Y-Samsôn lâng săk bê̆ch ta kômâk păng, jêh ri păng kuăl du huê bu klâu poih pơh pha sŏk ta klơ bôk păng. Pônây, păng ntơm nkân păng, yorlah nau ktang păng lĕ luh du jêh bơh păng.

²⁰ Rnôk nây păng kuăl: “Hơi Y-Samsôn, phung Philistin văch nhŭp may!” Păng kah rngăl jêh ri lah tâm nuih n'hâm: “Gâp mra nchuăt du nâm bu kănđai, jêh ri rklaih bơh ti păng nơm!” Ƀiălah păng mâu gĭt ôh ma Brah Yêhôva luh du jêh bơh păng nơm.

²¹ Phung Philistin nhŭp păng, rloch măt păng, jêh ri leo păng trŭnh ma Gaxa. Khân păng chăp păng ma rse rvăk kông jêh ri păng kĭn mpăl peh tâm ndrung bu nă.

²² Ƀiălah sŏk ta klơ bôk păng jêh bu poih ntơm plơ̆ jong tay.

Nau Y-Samsôn Khĭt

²³ Rnôk nây, phung kôranh chiă uănh Philistin tâm rƀŭn gay nhhơr ndơ ƀư brah nau yơk ma brah Dagôn khân păng jêh ri ƀư nau răm maak. Khân păng lah pô aơ: “Brah he jao jêh Y-Samsôn, nơm rlăng he, tâm ti he.”

²⁴ Tơlah saơ Y-Samsôn, phung ƀon lan saơ tâm rnê ma brah khân păng, jêh ri lah: “Brah he jao jêh nơm rlăng he tâm ti he, jêng nơm ƀư rai bri he, jêh ri nkhĭt jêh âk phung he.”

²⁵ Dôl nuih n'hâm khân păng răm maak, khân păng nter: “Kuăl hom Y-Samsôn gay ăn ma păng tâm mpơl nau pâl ma he.” Pônây, khân păng leo Y-Samsôn luh tă bơh ndrung bu nă, jêh ri Y-Samsôn pâl tanăp khân păng. Jêh nây khân păng ăn Y-Samsôn dâk vah vang lĕ meh gâng ngih brah.

²⁶ Y-Samsôn lah ma kon se jê̆ têk păng ta ti: “Njŭn leo hom gâp hăn văch dăch lĕ meh gâng ngih brah gay ma gâp nsing ta lĕ meh gâng nây.”

²⁷ Nôk nây ta ngih brah geh âk bunuyh ngăn ngên, geh phung bu klâu jêh ri phung bu ur, jêh ri lĕ rngôch phung kôranh chiă uănh Philistin tâm ban đŏng gŭ ta nây; ta klơ chor ngih brah geh klăp lah tâm pe rbăn bunuyh bu klâu nđâp bu ur gŭ uănh dôl Y-Samsôn pâl.

²⁸ Rnôk nây, Y-Samsôn nter dăn Brah Yêhôva pô aơ: “Hơi Kôranh Brah Yêhôva! Dăn Kôranh Brah kah gĭt tay ma gâp. Hơi Brah Ndu! Dăn ăn nau ktang ma gâp knŏng du tơ̆ aơ đŏng, gay gâp plơng har ma phung ƀon lan Philistin yor bar đah găr măt gâp.”

²⁹ Y-Samsôn ut bar jrŏng meh gâng ta nklang ngih brah, ti pa ma ta du jrŏng meh nây jêh ri ti pa chiau ta du jrŏng meh êng, jêh ri nsŭn lĕ nau ktang ta nây. Păng lah: “Ăn gâp khĭt ndrel ma phung Philistin!” Jêh nây păng srôih ma lĕ nau ktang, nklơ̆ ma bar jrŏng meh gâng ta nklang ngih brah jêh ri ngih brah rlâm nklân khĭt ma phung kôranh chiă uănh jêh ri lĕ rngôch phung ƀon lan gŭ tâm nây.

³⁰ Pônây, nôk khĭt Y-Samsôn nkhĭt âk bunuyh lơn ma nôk păng hôm rêh.

³¹ Jêh nau nây, phung oh nâu păng jêh ri lĕ rngôch ngih mbơ̆ păng hăn trŭnh, leo săk jăn păng sĭt, tâp păng ta vah vang Sôra jêh ri Êstaôl, tâm ntŭk môch Y-Manôa, mbơ̆ păng. Y-Samsôn jêng kôranh phat dôih phung Israel tâm bar jât năm.