Phung Kôranh Phat Dôih 15 - Nau Brah Ndu Ngơi 2023

Y-Samsôn dơi đah phung Philistin

¹ Jŏ djê̆ ta nây, di yan kăch ba ƀlê, Y-Samsôn hăn tâm khâl đah ur păng jêh ri djôt leo ăn păng du mlâm be kon. Păng lah: “Gâp ŭch hăn tât gay gŭ ndrel ma ur gâp tâm jrô bê̆ch.” Ƀiălah mbơ̆ bu ur nây mâu ăn ôh păng lăp.

² Mbơ̆ bu ur nây lah: “Gâp mĭn may tâm rmot ngăn ma păng rĭ dĭng gâp ăn păng ma băl may. Oh bu ur păng mâu hĕ ueh lơn ma păng? Pônây, sŏk hom oh păng ntrok ma păng.”

³ Y-Samsôn lah: “Tơlah tơ̆ aơ gâp ƀư djơh ma phung ƀon lan Philistin, pôri gâp tâm ban đŏng mâu geh dôih ôh.”

⁴ Pônây Y-Samsôn hăn nhŭp pe rhiăng mlâm mpik jêh ri kât chiăng bar mlâm jêng ăp kôp, jêh ri kât ŭnh chai ta vah vang chiăng bar mlâm mpik.

⁵ Păng mpoh jêh ŭnh chai jêh ri mƀơk phung mpik lăp tâm mir ba ƀlê ê hŏ rek phung Philistin. Tâm ban pônây, păng su ba ƀlê nchăp jêh tâm ban đŏng ba ƀlê ê hŏ rek, jêh ri lĕ mir ôlive.

⁶ Phung Philistin ôp: “Mbu nơm ƀư nau aơ?” Bu plơ̆ lah: “Y-Samsôn ro yơh, klay du huê bunuyh ta Timna, yorlah păng sŏk ur păng ăn ma băl păng.” Pôri phung Philistin văch tât, su bu ur nây nđâp ma mbơ̆ păng ma ŭnh.

⁷ Y-Samsôn lah: “Tơlah khân may ƀư kơt nây gâp ton mra har plơng ma khân may jêh nau nây gâp mra gŭ mpăn.”

⁸ Păng dong khân păng hâu ngăn jêh ri nkhĭt âk bunuyh. Jêh nau nây, păng hăn trŭnh jêh ri gŭ tâm trôm lŭ Êtam.

⁹ Rnôk nây, phung ƀon lan Philistin hăn hao ƀư pôih rmlak tâm n'gor Yuđa jêh ri lam tât ta Lêhi.

¹⁰ Phung Yuđa lah ma khân păng pô aơ: “Mâm ƀư khân may văch tâm lơh đah hên?” Khân păng plơ̆ lah: “Hên văch ta aơ gay chăp Y-Samsôn jêh ri mra ƀư ma păng nâm bu păng hŏ ƀư ma hên!”

¹¹ Pe rbăn phung Yuđa hăn trŭnh ma trôm lŭ Êtam jêh ri lah ma Y-Samsôn: “May mâu hŏ gĭt ma phung Philistin dôl chiă uănh he? Pônây, moh nau may hŏ ƀư dĭng ƀeng ma hên nây?” Păng plơ̆ lah: “Gâp ƀư ma khân păng nâm bu khân păng ƀư jêh ma gâp.”

¹² Khân păng lah tay: “Hên hăn trŭnh ta aơ gay chăp may jêh ri jao may ma phung Philistin.” Y-Samsôn lah: “Sơm ton hom ma gâp khân may mâu mra nkhĭt ôh gâp.”

¹³ Khân păng plơ̆ lah: “Ơ, hên knŏng ŭch chăp may jêh ri jao may tâm ti khân păng mâu di ŭch nkhĭt may ôh.” Pônây, khân păng chăp păng ma bar rse ndrăn mhe, jêh ri leo păng du luh bơh trôm lŭ.

¹⁴ Tơlah păng hăn tât Lêhi, phung ƀon lan Philistin troh nchuăt sĭt mpeh Y-Samsôn. Huêng Brah Yêhôva văch gŭ ndrel ma Y-Samsôn, ƀư ăn lĕ rse bu kât tŭp bơh ti păng nâm ŭnh sa rse brai mhay.

¹⁵ Păng saơ du mlâm nting kang seh bri mhe khĭt, păng yơr ti kuăn sŏk ndơ nây jêh ri dong nkhĭt du rbăn nuyh phung Philistin.

¹⁶ Rnôk nây Y-Samsôn lah: “Ma du mlâm nting kang seh bri, Nkhĭt kŏ tât săk jăn khĭt bun mbŭch! Ma du mlâm nting kang seh bri, Gâp hŏ nkhĭt jêh du rbăn bunuyh!”

¹⁷ Lôch jêh păng ngơi pônây, păng mƀăr lơi nting kang seh bri bơh ti păng, jêh ri tâm amoh ntŭk nây jêng Ramat Lêhi.

¹⁸ Yorlah ji hir dak hâu ngăn, păng kuăl mbơh sơm Brah Yêhôva pô aơ: “Kôranh Brah hŏ ăn ma oh mon Kôranh Brah nau tâm rklaih toyh aơ, aƀaơ mâm gâp mra khĭt ma nau ji hir, jêh ri tŭp đŏng tâm ti phung mâu geh koh ntâu?”

¹⁹ Brah Ndu rlah lŭ ta Lêhi gay dak brul luh. Nôk Y-Samsôn nhêt dak, huêng păng plơ̆ sĭt jêh ri geh suan tay. Yor ri, bu tâm amoh dak n'hor aơ jêng Ên-Hakôr kŏ tât ta nar aơ.

²⁰ Y-Samsôn jêng kôranh phat dôih phung ƀon lan Israel tâm bar jât năm tâm rnôk phung Philistin chiă uănh phung Israel.