Phung Kôranh Phat Dôih 14 - Nau Brah Ndu Ngơi 2023

Y-Samsôn sŏk ur

¹ Y-Samsôn hăn ntrŭnh ma Timna, păng saơ du huê bu ur druh Philistin gŭ ta nây.

² Nôk plơ̆ sĭt, păng nkoch ma mê̆ mbơ̆ păng pô aơ: “Gâp saơ jêh du huê bu ur druh Philistin ta Timna. Aƀaơ dăn mê̆ mbơ̆ nđăp păng jêng ur gâp.”

³ Mê̆ mbơ̆ păng lah: “Tâm nklang phung mpôl băl may mâu lah tâm lĕ phung ƀon lan he, mâu geh du huê bu ur druh may ŭch kŏ tât may sŏk du huê ur tă bơh phung Philistin mâu geh ôh nau koh ntâu?” Y-Samsôn lah ma mbơ̆ păng: “Dăn mbơ̆ nđăp păng ma gâp, yorlah păng tâm di ngăn đah gâp.”

⁴ Mê̆ mbơ̆ păng mâu dơi gĭt rah vah ôh nau nây luh bơh Brah Yêhôva ăn tât, yorlah Păng joi nau găl gay tâm rdâng đah phung Philistin. Rnôk nây phung Philistin chiă uănh phung Israel.

⁵ Y-Samsôn hăn ndrel ma mê̆ mbơ̆ păng trŭnh ta Timna. Tơlah khân păng tât jêh ta đang krăk ƀâu Timna, geh du mlâm yau mŭr kon bruh rduh jêh ri ngrông nter tanăp măt păng.

⁶ Huêng Brah Yêhôva văch gŭ ndrel ma Y-Samsôn kŏ tât păng hêk yau mŭr nây ma ti păng nâm bu hêk du mlâm be kon. Ƀiălah păng mâu mbơh ôh ma mê̆ mbơ̆ păng gĭt moh nau păng hŏ ƀư.

⁷ Jêh nây Y-Samsôn hăn trŭnh ngơi ndrel ma bu ur druh nây, jêh ri păng tâm kơnh ma Y-Samsôn.

⁸ Jŏ djê̆ ta nây, păng plơ̆ tay gay ŭch nsông đah bu ur nây, păng veh uănh săk jăn yau mŭr nây, păng saơ geh mpơng sŭt jêh ri dak sŭt tâm săk yau mŭr nây.

⁹ Păng kuak sŏk dak sŭt ma mpang ti păng, sa n'ho ma hăn. Nôk păng hăn văch dăch ma mê̆ mbơ̆ păng, jêh ri ăn ma păng ƀă sa, ƀiălah păng mâu nkoch ôh păng hŏ sŏk jêh dak sŭt nây tâm săk yau mŭr kon.

¹⁰ Mbơ̆ păng hăn trŭnh ma ngih bu ur nây, jêh ri ta nây Y-Samsôn nkra nau nhêt sa tĭng nâm nau vay ma phung bu klâu ndăm vay ƀư.

¹¹ Tơlah saơ Y-Samsôn, phung ƀon lan leo pe jât ndăm gay ƀư băl ndrel păng.

¹² Y-Samsôn lah ma phung băl: “Gâp mra ăn ma khân may du nau nchroh n'hôr. Tơlah khân may dơi rblang nau nây ma gâp tâm pơh nar nau nhêt sa, gâp mra nkhôm ma khân may pe jât blah ao ma bok mhay jêh ri pe jât kôp ao padih.

¹³ Bi tơlah khân may mâu dơi rblang khân may chê̆ hom ma gâp pe jât blah ao tâm trôm ma bok mhay jêh ri pe jât kôp ao padih.” Khân păng lah: “Nchroh n'hôr hom jêh ri hên gŭ iăt.”

¹⁴ Păng lah nchroh n'hôr: “Ndơ sông sa luh tă bơh ndơ sông sa; Ndơ njŭng luh tă bơh ndơ ktang.” Tâm pe nar khân păng mâu dơi rblang ôh nau nchroh n'hôr nây.

¹⁵ Tât nar tal pơh, khân păng lah ma ur Y-Samsôn: “Ndơm hom sai ay ăn păng rblang nchroh n'hôr nây ma he, tơlah mâu, hên mra su ay nđâp ngih vâl mbơ̆ ay ma ŭnh. Di lĕ khân may jă hên tât ta aơ gay tŭn jot hên?”

¹⁶ Ur Y-Samsôn nhĭm jêh ri lah đah păng: “May tâm rmot đah gâp, may mâu rŏng ôh ma gâp! May ngơi jêh nchroh n'hôr ma phung ƀon lan gâp ƀiălah may mâu rblang ôh nau nây ma gâp.” Păng lah: “Gâp mâu mâp rblang ôh ma mê̆ mbơ̆ gâp, mâm dĭng gâp rblang ăn ma ay?”

¹⁷ Dôl pơh nar nau nhêt sa, păng ăt nhĭm tanăp păng. Nar năng pơh, păng rblang ma păng, yorlah păng ăt bonh leng păng. Jêh nau nây, păng rblang nau nchroh n'hôr nây ma phung băl păng.

¹⁸ Pônây, tâm nar tal pơh, êlor ma nar nhâp, lĕ phung tâm ƀon toyh nây lah ma păng: “Moh ndơ njŭng lơn ma dak sŭt, Moh ndơ ktang lơn ma yau mŭr?” Y-Samsôn lah ma khân păng: “Tơlah khân may mâu chuar ôh tâm mir ma ndrôk me druh gâp, Khân may mâu mra dơi rblang nchroh n'hôr gâp ôh.”

¹⁹ Rnôk nây, Huêng Brah Yêhôva văch gŭ ndrel ma Y-Samsôn. Păng hăn trŭnh ta Askalôn, nkhĭt pe jât nuyh, sŏk pit ndơ khân păng jêh ri nkhôm lĕ kôp ao padih ma phung rblang dơi nau tâm nchroh n'hôr nây. Păng plơ̆ sĭt ma ngih mbơ̆ păng tâm nau ji nuih hâu ngăn.

²⁰ Bu ăn ur Y-Samsôn ma du huê bu klâu ndăm jêng băl păng.