Phung Kôranh Phat Dôih 13 - Nau Brah Ndu Ngơi 2023

Bu deh ma Y-Samsôn

¹ Phung ƀon lan Israel plơ̆ ƀư tay nau mhĭk tanăp măt Brah Yêhôva, rĭ dĭng Brah Yêhôva jao khân păng tâm ti phung Philistin tâm puăn jât năm.

² Geh du huê bunuyh ta Sôra bơh ndŭl mpôl Dan, amoh jêng Y-Manôa. Ur păng jêng bu ur ndrô gâng, mâu geh kon ôh.

³ Tông mpăr Brah Yêhôva tâm mpơl ma bu ur nây jêh ri lah: “Aơ, ay jêng bu ur ndrô gâng, mâu geh kon, ƀiălah ay mra ntreo jêh ri deh du huê kon bu klâu.

⁴ Pôri, ntơm bơh aƀaơ ăn ay njrăng hom, lơi nhêt ndrănh mâu lah moh ndơ nhêt geh ndrui, jêh ri mâu đŏng sa moh ndơ mâu kloh,

⁵ yorlah ay mra ntreo jêh ri deh du huê kon bu klâu. Mâu dơi ăn măt pêh poih ôh bôk păng, yorlah kon se nây mra jêng du huê Nasirit ma Brah Ndu tă bơh ndŭl me păng. Păng nơm mra tâm rklaih phung Israel bơh ti phung Philistin.”

⁶ Bu ur nây hăn nkoch ma sai păng: “Du huê bunuyh Brah Ndu văch tât ma gâp, muh măt păng klach krit ngăn, nâm bu muh măt tông mpăr Brah Ndu. Gâp mâu ôp ôh păng bơh tă păng văch, jêh ri păng mâu đŏng mbơh ôh amoh păng ma gâp.

⁷ Ƀiălah păng lah ma gâp pô aơ: ‘Aơ, ay mra ntreo jêh ri deh ma du huê kon bu klâu. Pônây aƀaơ, lơi ta nhêt ôh ndrănh mâu lah moh ndơ nhêt geh ndrui, jêh ri tâm ban đŏng lơi ta sa ôh moh ndơ ƀơ̆, yorlah bu klâu aơ mra jêng Nasirit ma Brah Ndu ntơm tă bơh tâm ndŭl me păng kŏ tât nar păng khĭt.’”

⁸ Y-Manôa mbơh sơm ma Brah Yêhôva pô aơ: “Ơ Kôranh Brah! Dăn Kôranh Brah ăn bunuyh Brah Ndu Kôranh Brah prơh hăn trŭnh, plơ̆ văch tay ma hên, gay nti ma hên moh hên mra ƀư ma oh bê mra deh nây!”

⁹ Brah Ndu dơn jêh nau Y-Manôa mbơh sơm. Tông mpăr Brah Ndu plơ̆ văch tay ma bu ur nây dôl păng gŭ tâm mir; bi Y-Manôa, sai păng, mâu gŭ ndrel ôh ma păng.

¹⁰ Bu ur hăn nchuăt nkoch ro ma sai păng: “Aơ, bunuyh hŏ văch tât ma gâp ta nar lor, aƀaơ tâm mpơl tay đŏng.”

¹¹ Y-Manôa ndal hăn tĭng ur păng, jêh ri tơlah hăn văch dăch bunuyh nây, păng lah ma păng: “Di lĕ may jêng nơm hŏ ngơi jêh ma bu ur aơ?” Păng lah: “Di ngăn, gâp nơm.”

¹² Y-Manôa lah: “Tơlah nau may ngơi tât di ngăn, moh nau vay kon se jê̆ aơ mra djôt prăp, jêh ri moh păng mra ƀư?”

¹³ Tông mpăr Brah Yêhôva lah ma Y-Manôa pô aơ: “Bu ur ver hom lĕ nau gâp hŏ ntĭnh jêh.

¹⁴ Păng lơi ta sa moh ntil ndơ tă bơh đang krăk ƀâu, lơi ta nhêt ôh ndrănh mâu lah moh ndơ nhêt geh ndrui, jêh ri tâm ban đŏng lơi ta sa ôh moh ndơ ƀơ̆. Ăn păng djôt prăp lĕ nau gâp hŏ ntĭnh ntăm jêh.”

¹⁵ Nôk nây, Y-Manôa lah ma Tông mpăr Brah Yêhôva: “Hên dăn jă ma may gŭ tay jêh ri thai ma may du mlâm be kon.”

¹⁶ Tông mpăr Brah Yêhôva lah ma Y-Manôa pô aơ: “Nđâp tơlah may kân gâp gŭ tay, gâp mâu đŏng sa ôh ndơ may. Ƀiălah tơlah may ŭch ƀư hom du ndơ ƀư brah gŭch nhhơr ma Brah Yêhôva.” Y-Manôa mâu gĭt ôh păng jêng tông mpăr Brah Yêhôva.

¹⁷ Y-Manôa lah tay ma tông mpăr Brah Yêhôva pô aơ: “Mbu amoh may, gay ma hên yơk ma may tơlah nau may ngơi mra tât di ngăn?”

¹⁸ Tông mpăr Brah Yêhôva plơ̆ lah: “Mâm ƀư may ôp ma amoh gâp? Tâm amoh gâp jêng khlay ngăn.”

¹⁹ Y-Manôa sŏk du mlâm be kon ndrel ma ndơ ƀư brah rnih môi, jêh ri nhhơr ma Brah Yêhôva ta klơ lŭ. Tông mpăr ƀư du nau khlay ngăn ngên tanăp muh măt Y-Manôa jêh ri ur păng.

²⁰ Tơlah chiông ŭnh tă bơh nơng ƀư brah hao leo klơ trôk tông mpăr Brah Yêhôva tâm ban đŏng hao tâm chiông ŭnh tă bơh nơng nây. Saơ pônây, Y-Manôa jêh ri ur păng uănh nau nây khân păng păn muh măt ta neh.

²¹ Tông mpăr Brah Yêhôva mâu hôm tâm mpơl ôh tât ma Y-Manôa jêh ri ur păng. Y-Manôa gĭt năl nây jêng tông mpăr Brah Yêhôva.

²² Y-Manôa lah ma ur păng: “N'hêl nanê̆ he mra khĭt, yorlah he lĕ saơ jêh Brah Ndu!”

²³ Ƀiălah ur păng lah: “Tơlah Brah Yêhôva ŭch nkhĭt he, mâm dĭng Păng dơn jêh ndơ ƀư brah gŭch jêh ri ndơ ƀư brah rnih môi he nhhơr, jêh ri mâm ƀư Păng ăn ma he saơ lĕ nau nây, nâm bu ăn ma he tăng lĕ nau ngơi tâm nar aơ.”

²⁴ Bu ur nây deh ma du huê kon bu klâu, ntơ amoh păng jêng Y-Samsôn. Kon se jê̆ văch ma toyh, jêh ri Brah Yêhôva ăn nau ueh uĭn ma păng.

²⁵ Huêng Brah Yêhôva ntơm văch gŭ đah păng nôk păng gŭ tâm ngih bok ta Dan, vah vang Sôra jêh ri Êstaôl.