Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Phung Kôranh Phat Dôih 12 - Nau Brah Ndu Ngơi 2023


Y-Jêptê jêh ri phung Êphraim

1 Phung tahan Êphraim rgum băl, hăn rgăn dak krong tât ta Saphôn jêh ri ôp ma Y-Jêptê pô aơ: “Mâm ƀư may hăn tâm lơh đah phung Ammôn mâu kuăl ôh hên hăn ndrel may? Hên mra su vâl may nđâp may nơm.”

2 Y-Jêptê lah: “Gâp jêh ri phung ƀon lan gâp geh nau tâm djrel hâu ngăn đah phung Ammôn, jêh ri tơlah gâp kuăl khân may, khân may mâu sâm rklaih an ôh gâp bơh ti khân păng.

3 Dôl saơ jêh khân may mâu văch tât tâm rklaih an ôh gâp, pôri gâp hŏ sân săk gâp nơm hăn tâm lơh đah phung Ammôn, jêh ri Brah Yêhôva hŏ jao khân păng tâm ti gâp. Pônây, mâm nar aơ khân may văch tât ta gâp gay ŭch tâm lơh đah gâp?”

4 Nôk nây taơ, Y-Jêptê rgum băl lĕ rngôch phung tahan Gilêat jêh ri tâm lơh đah phung Êphraim. Phung tahan n'gor Gilêat dơi lơh phung Êphraim, yorlah phung Êphraim lah pô aơ: “Hơi phung Gilêat, khân may jêng phung nchuăt du luh bơh phung Êphraim jêh ri gŭ ta nklang phung Êphraim jêh ri Manasê!”

5 Phung tahan Gilêat pit sŏk lĕ ntŭk sơh dak krong Yurdan gay buay lơi phung Êphraim hăn rgăn dak krong. Ăp tơ̆ geh bunuyh Êphraim nchuăt du luh bơh phung Êphraim lah pô aơ: “Dăn ăn ma gâp hăn găn,” phung Gilêat ôp ma păng: “Di lĕ may jêng du huê phung Êphraim lĕ?” Tơlah păng plơ̆ lah: “Mâu ôh”

6 phung Gilêat lah tay: “Pôri, lah hom: Silôbet.” Khân păng lah “Silôbet,” yorlah păng mâu dơi ngơi luh di rah vah ôh, pônây khân păng nhŭp păng jêh ri nkhĭt păng ta ntŭk sơh dak krong Yurdan. Tâm nôk nây geh puăn rmưn bar rbăn nuyh phung Êphraim khĭt.

7 Y-Jêptê, bunuyh Gilêat, jêng kôranh phat dôih phung ƀon lan Israel tâm prao năm. Păng khĭt, jêh ri bu tâp păng tâm ƀon toyh păng nơm jêng Mispa ta Gilêat.


Pe kôranh phat dôih Y-Ipsan, Y-Êlon jêh ri Y-Apdôn

8 Pakơi jêh Y-Jêptê, geh Y-Ipsan ta Ƀêtlêhem jêng kôranh phat dôih phung ƀon lan Israel.

9 Păng geh pe jât nuyh kon bu klâu jêh ri pe jât nuyh kon bu ur; păng ăn pe jât nuyh kon bu ma phung padih băl mpôl păng, jêh ri păng nđăp pe jât kon bu ur noi deh êng ƀư ur ma phung kon bu klâu păng nơm. Păng jêng kôranh phat dôih phung ƀon lan Israel tâm pơh năm.

10 Jêh nây Y-Ipsan khĭt, bu tâp păng ta Ƀêtlêhem.

11 Pakơi jêh Y-Ipsan, geh Y-Êlon, bunuyh Sabulôn, jêng kôranh phat dôih phung ƀon lan Israel tâm jât năm.

12 Jêh nây Y-Êlon, bunuyh Sabulôn, khĭt, bu tâp păng ta Aijalon, tâm n'gor bơh noi deh Sabulôn.

13 Pakơi jêh Y-Êlon, geh Y-Apdôn, kon bu klâu Y-Hilel, bunuyh Pirathôn, jêng kôranh phat dôih phung ƀon lan Israel.

14 Păng geh puăn jât kon bu klâu jêh ri pe jât sau bu klâu. Khân păng ncho pơh jât mlâm seh bri. Păng ƀư kôranh phat dôih phung ƀon lan Israel tâm pham năm.

15 Jêh ri Y-Apdôn, kon bu klâu Y-Hilel, bunuyh Pirathôn, khĭt jêh ri bu tâp păng ta Pirathôn tâm n'gor Êphraim, klơ dor yôk phung ƀon lan Amalek.

© 2023 United Bible Societies. All rights reserved.

Bible Society Vietnam
ကြှနျုပျတို့နောကျလိုကျပါ:



ကြော်ငြာတွေ