Phung Kôranh Phat Dôih 11 - Nau Brah Ndu Ngơi 2023

Y-Jêptê dơi đah phung tahan Ammôn

¹ Y-Jêptê, du huê bunuyh Gilêat, jêng tahan janh ktang. Păng jêng kon du huê bu ur ka n'hong jêh ri mbơ̆ păng jêng Y-Gilêat.

² Ur Y-Gilêat deh ăn păng phung kon bu klâu êng êng. Tơlah phung kon bu klâu ur păng deh nây văch ma toyh, khân păng mprơh lơi Y-Jêptê jêh ri lah: “May mâu dơi dơn ôh drăp ndơ tâm ngih mbơ̆ he, yorlah may jêng kon bu klâu ma du huê bu ur êng.”

³ Pônây, Y-Jêptê nchuăt du tă bơh phung oh nâu păng jêh ri gŭ tâm n'gor Tôp. Geh du phung blă blơ tâm rnglăp ndrel đah Y-Jêptê jêh ri nsong mblêng pit in ndơ ndrel ma păng.

⁴ Pakơi jêh ma nây, phung Ammôn tâm lơh đah phung Israel.

⁵ Dôl phung Ammôn hăn tâm lơh đah phung Israel, phung bu ranh n'gor Gilêat hăn leo Y-Jêptê sĭt tă bơh n'gor Tôp.

⁶ Khân păng lah ma Y-Jêptê: “Dăn ma may plơ̆ sĭt gay chiă uănh hên hăn tâm lơh đah phung Ammôn.”

⁷ Ƀiălah Y-Jêptê lah ma phung bu ranh n'gor Gilêat: “Khân may mâu di hĕ jêng bunuyh tâm rmot jêh đah gâp, mprơh lơi gâp tă bơh ngih mbơ̆ gâp? Mâm ƀư khân may văch tât ma gâp tơlah geh nau uh ah aƀaơ ri mơ dĭng tât?”

⁸ Phung bu ranh n'gor Gilêat lah ma Y-Jêptê: “Yor nây hên văch ma may gay ma may ndrel ma hên hăn tâm lơh đah phung Ammôn, jêh ri jêh nây may mra ƀư kôranh chiă uănh hên nđâp ma lĕ rngôch phung ƀon lan Gilêat.”

⁹ Y-Jêptê plơ̆ lah ma phung bu ranh n'gor Gilêat pô aơ: “Tơlah khân may leo gâp sĭt gay tâm lơh đah phung Ammôn, jêh ri tơlah Brah Yêhôva jao khân păng tâm ti gâp, khân may ŭch gâp mra jêng kôranh chiă uănh ma khân may ƀơh?”

¹⁰ Phung bu ranh n'gor Gilêat lah ma Y-Jêptê: “Hên mra ƀư di nâm nau may lah. Dăn Brah Yêhôva jêng nơm mbơh ta nklang he!”

¹¹ Pôri, Y-Jêptê hăn ndrel ma phung bu ranh n'gor Gilêat; phung ƀon lan njêng păng jêng kôranh tahan jêh ri kôranh chiă uănh ma khân păng. Ta Mispa, Y-Jêptê ngơi tay tanăp măt Brah Yêhôva lĕ nau păng hŏ ngơi jêh.

¹² Y-Jêptê prơh bunuyh mbơh hăn ma hađăch phung Ammôn jêh ri lah: “Moh nau may geh đah gâp, dĭng may leo phung tahan văch tât gay tâm lơh đah n'gor bri gâp?”

¹³ Hađăch phung ƀon lan Ammôn plơ̆ lah ma phung mbơh Y-Jêptê pô aơ: “Yorlah nôk luh bơh n'gor bri Êjipt, phung ƀon lan Israel pit sŏk jêh n'gor gâp, ntơm bơh dak n'hong jê̆ Arnôn kŏ tât ta dak n'hong jê̆ Jabôk jêh ri tât ta dak krong Yurdan. Aƀaơ mplơ̆ sĭt hom n'gor nây ma gâp tâm nau đăp mpăn!”

¹⁴ Y-Jêptê njuăl tay bunuyh mbơh văch tât ma hađăch phung ƀon lan Ammôn jêh ri lah:

¹⁵ “Y-Jêptê lah pô aơ: Phung Israel mâu geh pit in ôh neh phung ƀon lan Môap mâu lah phung ƀon lan Ammôn.

¹⁶ Ƀiălah tơlah khân păng du luh bơh Êjipt, phung Israel hăn rgăn jêh bri rdah tât ta Dak Mƀŭt Chăng, jêh nây hăn tât ma Kadês.

¹⁷ Nôk nây taơ, phung Israel prơh phung mbơh hăn tât tâm mâp đah hađăch Êđôm, lah pô aơ: ‘Dăn ma hên hăn rgăn n'gor hađăch.’ Ƀiălah hađăch Êđôm mâu maak nuih n'hâm. Khân păng prơh đŏng phung mbơh hăn tât tâm mâp đah hađăch Môap, jêh ri hađăch aơ tâm ban đŏng dun, rĭ dĭng phung ƀon lan Israel ăt gŭ ta Kadês.

¹⁸ Jêh nây, khân păng hăn găn tay tâm bri rdah, jêh ri hăn ndăch n'gor Êđôm jêh ri n'gor Môap, jêh nây hăn tât mpeh luh nar n'gor Môap. Khân păng ndâk ngih bok ta mpeh kơh tê̆ dak n'hong jê̆ Arnôn, ƀiălah khân păng mâu lăp ôh tâm n'gor Môap, yorlah Arnôn jêng n'har neh n'gor Môap.

¹⁹ Nglĕ dŭt, phung ƀon lan Israel prơh phung mbơh hăn tât tâm mâp đah Y-Sihôn, hađăch Amôrit, gŭ ta Hêsbôn, jêh ri lah: ‘Dăn ma hên hăn rgăn n'gor may gay hăn tât ma n'gor hên.’

²⁰ Ƀiălah Y-Sihôn mâu iăt ma phung ƀon lan Israel, yor ri mâu ăn ôh hăn rgăn n'gor păng. Y-Sihôn rgum băl lĕ rngôch phung tahan, hăn tât ndâk ngih bok ta Jahsa jêh ri hăn tâm lơh đah phung Israel.

²¹ Yêhôva Brah Ndu phung Israel jao Y-Sihôn jêh ri lĕ rngôch phung tahan păng tâm ti phung Israel. Phung Israel dơi lơh đah phung khân păng jêh ri pit in lĕ n'gor Amôrit, jêng phung ƀon lan gŭ tâm n'gor nây.

²² Phung ƀon lan Israel pit in lĕ rngôch n'gor phung ƀon lan Amôrit, ntơm bơh dak n'hong jê̆ Arnôn kŏ tât ta dak n'hong jê̆ Jabôk, jêh ri ntơm bơh bri rdah kŏ tât ta dak krong Yurdan.

²³ Pônây Yêhôva Brah Ndu phung Israel lĕ mprơh jêh phung ƀon lan Amôrit luh bơh phung ƀon lan Israel Păng, pôri aƀaơ may ŭch plơ̆ pit in bri khân păng nây đŏng?

²⁴ Mâu di hĕ may dơi dơn n'gor jêng moh Chêmôs, jêng brah ma may, hŏ ăn jêh ma may phă? Pôri, he tâm ban đŏng dơn n'gor lĕ bunuyh Yêhôva Brah Ndu hên mprơh jêh phung gŭ ta nây luh bơh he.

²⁵ Lơ hô đŏng, may ueh lơn ma Y-Balak, kon bu klâu Y-Sipôr, hađăch n'gor Môap lĕ? Păng mâp tâm rlăch đŏng mâu lah lĕ tă tâm lơh đah phung Israel đŏng mâu?

²⁶ Dôl pe rhiăng năm, phung Israel gŭ jêh ta Hêsbôn jêh ri n'gor jŭm păng, ta Arôer jêh ri n'gor jŭm păng, tâm lĕ rngôch ƀon toyh ƀoi tĭng dak n'hong jê̆ Arnôn. Mâm ƀư may mâu sŏk pit tay lĕ ƀon toyh nây tâm rnôk nây?

²⁷ Pôri, gâp mâu geh ƀư tih ôh đah may, ƀiălah may ƀư mhĭk gay tâm lơh đah gâp. Dăn Brah Yêhôva, jêng Nơm phat dôih, nar aơ phat dôih ta nklang phung ƀon lan Israel jêh ri phung ƀon lan Ammôn!”

²⁸ Ƀiălah hađăch phung ƀon lan Ammôn mâu ŭch iăt ôh nau bunuyh mbơh Y-Jêptê.

²⁹ Nôk nây, Huêng Brah Yêhôva trŭnh gŭ ndrel Y-Jêptê, păng hăn găn n'gor Gilêat jêh ri Manasê, tât ma Mispa tâm n'gor Gilêat, jêh nây ntơm bơh Mispa ta Gilêat, păng găn tât n'gor phung ƀon lan Ammôn.

³⁰ Y-Jêptê ƀư nau ton ma Brah Yêhôva pô aơ: “Tơlah May jao phung ƀon lan Ammôn tâm ti gâp tơlah gâp dơi tâm lơh plơ̆ sĭt,

³¹ ăp bunuyh mâu lah moh ndơ du luh bơh mpông ngih gâp lor lơn gay tâm mâp gâp, pôri bunuyh mâu lah ndơ nây mra jêng ndơ Brah Yêhôva, jêh ri gâp mra nhhơr păng jêng ndơ ƀư brah gŭch.”

³² Y-Jêptê găn tât ta n'gor phung Ammôn jêh ri Brah Yêhôva jao khân păng tâm ti păng.

³³ Y-Jêptê dơi tâm lơh đah khân păng ntơm bơh Arôer tât ma n'gor jŭm Minnit, kŏ tât ma Abel-Kêramim, jêh ri dơi pit bar jât ƀon toyh. Phung ƀon lan Ammôn mâu dơi lơh jêh ri gŭ chŭn tâm dâng phung ƀon lan Israel.

³⁴ Y-Jêptê plơ̆ sĭt tay ma ngih păng ta Mispa, jêh ri aơ, kon bu ur păng djôt leo gâr jê̆ jêh ri pâl ntalơ̆ tâm mâp păng. Bu ur jêng kon bu ur păng, padih bu ur nây mâu hôm geh ôh kon bu ur mâu lah kon bu klâu êng đŏng.

³⁵ Y-Jêptê saơ jêh păng luh du, păng nkhêk ro bok ao păng nơm jêh ri lah: “Hơi kon! Kon bu ur gâp, kon ƀư ăn ma gâp rngot hâu ngăn ngên! Kon jêng nau uh ah toyh ma gâp! Yorlah gâp ngơi jêh nau ton sơm tanăp Brah Yêhôva jêh ri mâu dơi rgâl ôh.”

³⁶ Păng lah ma păng: “Hơi mbơ̆, tơlah may hŏ ngơi jêh nau ton sơm ma Brah Yêhôva, ƀư hom ma gâp di tĭng nâm nau may ton jêh, yorlah aƀaơ Brah Yêhôva mplơ̆ plơng jêh phung ƀon lan Ammôn, phung rlăng may.”

³⁷ Păng ngơi đŏng ma mbơ̆ păng pô aơ: “Kon dăn mbơ̆ nau aơ: mbơ̆ kâp gân ma gâp bar khay, gâp mra hăn ta nkual klơ dor yôk gay gâp jêh ri phung băl gâp nhĭm nhhiăng ma nau gâp jêng bu ur druh.”

³⁸ Y-Jêptê lah: “Hăn hom!” Jêh nây păng ăn păng hăn bar khay. Păng hăn ndrel phung băl păng, jêh ri nhĭm nau păng jêng bu ur druh ta klơ yôk.

³⁹ Lôch bar khay, păng plơ̆ sĭt tay ma mbơ̆ păng, jêh ri mbơ̆ păng ƀư tĭng nâm nau păng ton jêh. Păng ê hŏ tâm mâp đah bu klâu ôh. Tă bơh nau nây, phung ƀon lan Israel geh du nau vay aơ:

⁴⁰ Ăp năm, phung kon bu ur Israel nhĭm nhhiăng ma kon bu ur Y-Jêptê, du huê bunuyh Gilêat, tâm puăn nar.