Phung Kôranh Phat Dôih 10 - Nau Brah Ndu Ngơi 2023

Bar hê kôranh phat dôih Y-Tôla jêh ri Y-Jar

¹ Pakơi Y-Abimêlek, geh Y-Tôla, kon bu klâu Y-Pua, sau Y-Dôdô, bơh noi deh Isakar, dâk tâm rklaih phung Israel. Păng gŭ ta Samir tâm n'gor klơ dor yôk Êphraim,

² jêh ri ƀư kôranh phat dôih tâm phung ƀon lan Israel bar jât ma pe năm. Păng khĭt jêh ri bu tâp păng ta Samir.

³ Pakơi geh Y-Jar, bunuyh Gilêat, jêng kôranh phat dôih phung ƀon lan Israel tâm bar jât ma bar năm.

⁴ Păng geh pe jât nuyh kon bu klâu, ăp nơm ncho du mlâm seh bri, jêh ri chiă uănh du ƀon toyh. Pe jât ƀon toyh nây tâm nkual Gilêat, nar aơ rnha jêng Havôt-Jar.

⁵ Y-Jar lĕ khĭt jêh ri bu tâp păng ta Kamon.

Phung Philistin jêh ri phung Ammôn tŭn jot phung Israel

⁶ Phung ƀon lan Israel plơ̆ ƀư tay nau djơh tanăp măt Brah Yêhôva. Khân păng pah kan ma brah Baal jêh ri brah Astarôt, nđâp lĕ brah phung ƀon lan Aram, lĕ brah phung ƀon lan Sidôn, lĕ brah phung ƀon lan Môap, lĕ brah phung ƀon lan Ammôn, jêh ri lĕ brah phung ƀon lan Philistin. Khân păng chalơi Brah Yêhôva, mâu hôm ôh pah kan ma Păng.

⁷ Brah Yêhôva ji nuih ma phung Israel. Păng jao khân păng tâm ti phung Philistin jêh ri tâm ti phung Ammôn.

⁸ Ntơm bơh năm nây, bar phung ƀon lan aơ tŭn jot jêh ri mưch rmot phung Israel. Đơ phung Israel gŭ mpeh kơh tê̆ dak krong Yurdan tâm n'gor Gilêat, ta n'gor Amôrit, bu tŭn jot đŏng jêh ri mưch rmot tâm jât ma pham năm.

⁹ Phung Ammôn tâm ban đŏng rgăn dak krong Yurdan gay hăn tâm lơh đah phung Yuđa, đah phung Benjamin, jêh ri đah ngih phung Êphraim. Phung Israel tŭp tâm nau rêh ni hâu ngăn.

¹⁰ Nôk nây, phung ƀon lan Israel vơl dăn ma Brah Yêhôva pô aơ: “Hên hŏ ƀư tih ngăn jêh đah Kôranh Brah, yorlah hên chalơi jêh Brah Ndu hên jêh ri pah kan rhŏ ma phung brah Baal.”

¹¹ Ƀiălah Brah Yêhôva plơ̆ lah ma phung ƀon lan Israel pô aơ: “Mâu di hĕ Gâp tâm rklaih jêh khân may bơh phung Êjipt, bơh phung Amôrit, bơh phung Ammôn, jêh ri bơh phung Philistin?

¹² Nôk phung Sidôn, phung Amalek, jêh ri phung Maôn tŭn jot jêh khân may jêh ri khân may nter dăn ma Gâp jêh ri Gâp hŏ tâm rklaih jêh khân may dơi rklaih bơh ti khân păng.

¹³ Ƀiălah khân may chalơi Gâp, pah kan rhŏ ma phung brah êng, yor nây dĭng Gâp mâu tâm rklaih khân may.

¹⁴ Hăn vơl dăn hom ma phung brah khân may hŏ săch jêh gay khân păng tâm rklaih khân may dôl nau rêh ni!”

¹⁵ Phung ƀon lan Israel lah ma Brah Yêhôva: “Hên ƀư tih jêh! Dăn Kôranh Brah ƀư hom ma hên tĭng nâm nau Kôranh Brah mĭn ueh, ƀiălah aƀaơ dăn Kôranh Brah sâm rklaih hên!”

¹⁶ Khân păng ntlơi lĕ đơ phung brah êng, jêh nây plơ̆ tay pah kan ma Brah Yêhôva. Brah Yêhôva rngot rvê ngăn ma nau rêh ni phung ƀon lan Israel.

¹⁷ Phung ƀon lan Ammôn rgum băl jêh ri ndâk ngih bok tâm n'gor Gilêat. Phung ƀon lan Israel tâm ban đŏng rgum băl jêh ri ndâk ngih bok ta Mispa.

¹⁸ Phung ƀon lan jêh ri phung kôranh chiă uănh n'gor Gilêat tâm lah ndrăng khân păng: “Mbu nơm mra jêng kôranh chiă uănh nau tâm lơh đah phung Ammôn? Păng mra jêng kôranh chiă uănh ma lĕ rngôch phung ƀon lan Gilêat.”