Phung Kôranh Phat Dôih 1 - Nau Brah Ndu Ngơi 2023

Ngơi nhhơ ăn gĭt lĕ rngôch ( 1:1 – 3:6 ) Phung ƀon lan Israel lơh pit in đŏng sŏk lĕ n'gor neh mhe

¹ Jêh Y-Yôsuê khĭt, phung ƀon lan Israel ôp Brah Yêhôva pô aơ: “Mbu tâm phung hên mra hăn hao lor gay tâm lơh đah phung Kanaan?”

² Brah Yêhôva plơ̆ lah: “Phung ndŭl mpôl Yuđa hăn hao lor. Aơ, Gâp hŏ jao jêh n'gor nây tâm ti khân păng.”

³ Ndŭl mpôl bunuyh Yuđa lah ma ndŭl mpôl Simêôn, jêng phung oh nâu khân păng, pô aơ: “Dăn khân may hăn hao ndrel ma hên tâm kô̆ neh hên nchroh n'hôr dơi jêh, jêh ri he mra tâm lơh đah phung Kanaan. Jêh nây hên mra hăn ndrel ma khân may tât ta n'gor khân may hŏ nchroh n'hôr jêh.” Pôri ndŭl mpôl Simêôn hăn ndrel ma khân păng.

⁴ Phung ndŭl mpôl Yuđa hăn hao jêh ri Brah Yêhôva jao phung Kanaan jêh ri phung Pêrisit tâm ti khân păng. Khân păng dơi đah jât rbăn nuyh phung nây ta Bêsek.

⁵ Khân păng tâm mâp đah Y-Adôni-Bêsek ta Bêsek, tâm lơh đah păng jêh ri dơi đah phung Kanaan jêh ri phung Pêrisit.

⁶ Y-Adôni-Bêsek nchuăt du, ƀiălah khân păng hăn tĭng jêh ri nhŭp păng, jêh ri koh nglau ti me jêh ri nglau jâng me păng.

⁷ Y-Adôni-Bêsek lah: “Geh pơh jât hađăch gâp koh jêh nglau ti me jêh ri nglau jâng me, dônh ndơ sông sa rmeh tŭp tâm dâng sưng gâp sông. Gâp hŏ ƀư nau nây yor ri Brah Ndu har plơng tay gâp.” Bu leo păng tât ta ƀon toyh Yêrusalem jêh ri păng khĭt ta nây.

⁸ Ndŭl mpôl Yuđa tâm lơh pit sŏk ƀon toyh Yêrusalem, sŏk đao nkhĭt phung ƀon lan jêh ri su lơi ƀon toyh nây.

⁹ Jêh nau nây, ndŭl mpôl Yuđa hăn trŭnh gay lơh phung ƀon lan Kanaan gŭ tâm ta n'gor klơ dor yôk, n'gor Nêgep jêh ri n'gor neh lâng.

¹⁰ Khân păng hăn lơh đŏng phung Kanaan gŭ ta ƀon Hêbron (ntơ Hêbron rnôk kăl e jêng Kiriat-Arba), dơi lơh lĕ ndŭl mpôl Y-Sêsai, Y-Ahiman, jêh ri Y-Talmai.

¹¹ Bơh nĕ, ndŭl mpôl Yuđa hăn lơh phung ƀon lan gŭ tâm ƀon Dêbir (ntơ Dêbir rnôk kăl e jêng Kiriat-Sêpher).

¹² Y-Kalep lah: “Mbu dơi tâm lơh pit sŏk ƀon Kiriat-Sêpher gâp mra ăn H'Aksa, kon bu ur gâp jêng ur păng.”

¹³ Y-Ôtniêl, kon bu klâu Y-Kênas, oh Y-Kalep, pit sŏk ƀon nây jêh ri Y-Kalep ăn H'Aksa, kon bu ur păng jêng ur ma Y-Ôtniêl.

¹⁴ Nôk hăn tât ta ngih Y-Ôtniêl, bu ur nây ntrŭt ndal păng dăn ma mbơ̆ bu ur nây du lôk mir. Bu ur nây mhe jŭr tă klơ seh jêh ri Y-Kalep ôp: “Moh nau ay ŭch?”

¹⁵ Bu ur nây ơh: “Dăn mbơ̆ ăn ma gâp du drăp ndơ. Yorlah mbơ̆ hŏ veh jêh ma gâp neh tâm n'gor Nêgep, pôri dăn mbơ̆ ăn đŏng ma gâp lĕ dak n'hor.” Pôri Y-Kalep ăn ma păng Dak N'hor Klơ jêh ri Dak N'hor Tâm Dâng.

¹⁶ Kon sau mpeh mbơ̆ ur Y-Môis, jêng phung Kênit, tă bơh ƀon Tơm Đung hăn hao ndrel phung kon sau Yuđa, tât tâm bri rdah nkual Yuđa, tâm n'gor Nêgep dăch kêng ƀon Arat jêh ri gŭ rêh n'hanh đah phung ƀon lan Amalek.

¹⁷ Jêh nau nây, ndŭl mpôl Yuđa hăn ndrel ma phung oh nâu khân păng jêng ndŭl mpôl Simêôn hăn lơh đah phung Kanaan gŭ tâm ƀon Sêphat jêh ri ƀư rai lĕ ƀon nây, jêh nây bu ntơ ƀon nây jêng Hôrma.

¹⁸ Ndŭl mpôl Yuđa pit sŏk đŏng ƀon Gaxa jêh ri lĕ n'gor jŭm păng, ƀon Askalôn jêh ri Êkron jêh ri n'gor jŭm păng.

¹⁹ Brah Yêhôva gŭ ndrel ndŭl mpôl Yuđa jêh ri khân păng dơi pit n'gor klơ dor yôk. Ƀiălah khân păng mâu dơi mprơh phung ƀon lan gŭ ta n'gor neh lâng yorlah khân păng geh âk ndeh ma loih.

²⁰ Ndŭl mpôl Yuđa pă ƀon Hêbron ma Y-Kalep nâm nau Y-Môis hŏ ton. Y-Kalep mprơh noi deh bơh pe kon bu klâu Y-Anak du luh bơh ƀon nây.

²¹ Ƀiălah phung kon sau Benjamin mâu mprơh ôh phung Jêbusit gŭ tâm ƀon Yêrusalem, pônây phung Jêbusit ăt hôm gŭ n'hanh ma phung kon sau Benjamin kŏ tât ta nar aơ.

²² Bi ngih Yôsep tâm ban đŏng hăn hao lơh ƀon Bêthel, jêh ri Brah Yêhôva gŭ ndrel khân păng.

²³ Pônây, ngih Yôsep đă bu hăn n'hut uănh ƀon Bêthel (kăl e ƀon nây geh amoh Lus).

²⁴ Phung n'hut uănh saơ du huê bunuyh luh tă tâm ƀon, pôri khân păng lah ma păng pô aơ: “Ntĭm ma hên trong gay lăp tâm ƀon, hên mra ƀư ueh ma may.”

²⁵ Păng ntĭm ma khân păng trong gay lăp tâm ƀon jêh ri khân păng sŏk đao ƀư rai tâm ƀon, ƀiălah khân păng ăn bunuyh nây jêh ri lĕ rngôch rnăk vâl păng hăn du luh.

²⁶ Păng hăn tât ta n'gor phung ƀon lan Hitit, rdâk njêng du rplay ƀon ta nây jêh ri tâm amoh Lus; amoh ƀon nây hôm e ntơ kŏ tât ta nar aơ.

²⁷ Ndŭl mpôl Manasê mâu dơi mprơh ôh phung ƀon lan gŭ tâm ƀon Bet-Sêan jêh ri n'gor jŭm păng, mâu lah phung ƀon lan gŭ ta Tanak jêh ri n'gor jŭm păng, mâu lah phung ƀon lan gŭ tâm ƀon Dôrơ jêh ri n'gor jŭm păng, mâu lah phung ƀon lan gŭ tâm ƀon Iblêam jêh ri n'gor jŭm păng, mâu lah phung ƀon lan gŭ tâm ƀon Mêgidô jêh ri n'gor jŭm păng. Yor ri, phung Kanaan hôm e gŭ tâm n'gor nây.

²⁸ Tơlah phung ƀon lan Israel jêng janh ktang lơn, khân păng phak phung Kanaan pah kan ƀiălah mâu geh mprơh lĕ khân păng ôh.

²⁹ Ndŭl mpôl Êphraim ăt mâu mprơh ôh phung Kanaan gŭ tâm ƀon Gêser, pôri phung Kanaan ăt gŭ tâm ƀon Gêser n'hanh khân păng.

³⁰ Ndŭl mpôl Sabulôn ăt mâu dơi mprơh ôh phung gŭ tâm ƀon Kitron mâu lah phung gŭ tâm ƀon Nahalol; phung Kanaan gŭ rêh n'hanh ndŭl mpôl Sabulôn ƀiălah phak pah kan ma khân păng.

³¹ Ndŭl mpôl Aser ăt mâu mprơh ôh phung gŭ tâm ƀon Akô, Sidôn, Ahap, Aksip, Hêlbo, Aphik jêh ri ƀon Rêhôp.

³² Pôri, ndŭl mpôl Aser gŭ rêh nsum đah phung Kanaan jêng phung gŭ tâm n'gor tơm, yorlah phung Aser mâu mprơh ôh phung nây du.

³³ Ndŭl mpôl Naptali mâu mprơh ôh phung gŭ tâm ƀon Bet-Sêmes jêh ri Bet-Anat, ƀiălah gŭ rêh nsum đah phung Kanaan jêng phung tơm bri. Ƀiălah phak phung Bet-Sêmes jêh ri phung Bet-Anat pah kan ma ndŭl mpôl Naptali.

³⁴ Phung Amôrit bun ndŭl mpôl Dan tât ta n'gor klơ dor yôk, mâu ăn khân păng trŭnh tâm neh lâng.

³⁵ Phung Amôrit lĕ mĭn jêh ŭch gŭ ta yôk Hêbres, Aijalon, jêh ri ƀon Saalbim; ƀiălah ndŭl mpôl Yôsep ktang lơn yor ri phak khân păng pah kan.

³⁶ N'har neh phung Amôrit ƀoi tĭng nkual phung ƀon lan Êđôm, ntơm bơh ntŭk hao sop Akrabim, vah vang Sêla let klơ.