Philip 2 - Nau Brah Ndu Ngơi 2023

Nau Brah Krist ntrŭnh săk

¹ Pôri, tơlah tâm Brah Krist geh nau n'hao nuih n'hâm, tơlah tâm nau rŏng geh nau bong leng, tơlah tâm Brah Huêng Ueh geh nau tâm rnglăp, tơlah geh nuih n'hâm rŏng jêh ri nau yô̆

² ăn khân may du nau mĭn ndrăng khân may, du nau rŏng, du nuih n'hâm, du nau mĭn gay ƀư ma gâp răm maak nŭm rĭng.

³ Lơi ƀư ôh du ntil ndơ yor ma nuih n'hâm mbeh, mâu lah yor ma nau lư n'găr gơnh roh, ƀiălah dêh rhêt hom, uănh phung êng jêng khlay rlau lơn ma khân may nơm.

⁴ Ăp nơm tâm phung khân may lơi mĭn nau khlay ma păng nơm ôh, ƀiălah mĭn nau khlay ma bunuyh êng đŏng.

⁵ Ăn khân may geh du nau mĭn tâm ban ma Brah Yêsu Krist hŏ geh jêh,

⁶ Păng ơm geh rup Brah Ndu, Ƀiălah mâu uănh nau tâm ban đah Brah Ndu Jêng nau djôt prăp;

⁷ Păng hŏ chalơi Păng nơm, Djôt rup oh mon, Jêh ri plơ̆ jêng tâm ban ma kon bunuyh.

⁸ Păng hŏ tâm mpơl jêh tâm ban du huê bunuyh, Ntrŭnh êng păng nơm, tông bâr kŏ tât khĭt, Kŏ tât khĭt ta si tâm rkăng.

⁹ Yor nau nĕ Brah Ndu n'hao Păng klơ dŭt prêh, Jêh ri ăn ma amoh Păng jêng klơ lơn tâm lĕ amoh,

¹⁰ Gay nôk tăng ma amoh Brah Yêsu, Lĕ kômâk klơ trôk, tâm neh ntu, tâm dâng neh ntu Chon kômâk da dê,

¹¹ Jêh ri lĕ rngôch mpiăt mbơh da dê Brah Yêsu Krist jêng Kôranh Brah, Gay tâm rnê Brah Ndu jêng Brah Ndu Mbơ̆.

Gŭ rêh tâm nau chroh

¹² Pôri, hơi phung oh nâu gâp rŏng ngăn ngên, nâm bu khân may vay tông bâr ƀaƀơ, mâu di knŏng nôk gâp geh măt, ƀiălah aƀaơ aơ, dôl gâp ndŭt măt, lơ hô tông bâr lơn đŏng; sŏk hom nau klach râm sâr gay ƀư lôch jêh nau tâm rklaih khân may nơm.

¹³ Yorlah Brah Ndu jêng Nơm dôl pah kan tâm khân may, gay ma khân may ƀă ŭch ƀă ƀư tĭng nau mĭn ueh Păng.

¹⁴ Ƀư hom lĕ kan, lơi ngơi ƀŭk dŭk suyh mâu lah vât vâng ôh,

¹⁵ gay ma khân may mâu geh nau nduyh ôh jêh ri kloh rsang, jêng kon dŭt ueh ngăn ma Brah Ndu ta nklang phung ndŭl mpôl plĕch rlăm jêh ri nau tih; ta nklang phung ndŭl mpôl nây, khân may sol hom nâm bu nau ang ta neh ntu;

¹⁶ Djôt nâp hom nau ngơi rêh mro mrăng, gay tâm nar Brah Krist, gâp dơi tâm rnê êng ma gâp nơm mâu nchuăt dơm dam jêh ri mâu jâk jêr dơm dam.

¹⁷ Nđâp tơlah mham gâp nkhŭt ta klơ ndơ nhhơr. jêh ri kan nau chroh khân may, gâp maak lĕ jêh ri maak ndrel ma khân may lĕ rngôch

¹⁸ Khân may tâm ban lĕ, răm maak hom jêh ri maak ndrel ma gâp.

Nau ngơi nhhơ ma Y-Timôthê jêh ri Y-Êpaphôdit

¹⁹ Yor Kôranh Brah jêng Brah Yêsu, gâp kâp gân njuăl gơnh Y-Timôthê văch ma khân may, gay ma gâp nơm geh nau n'hao nuih dôl gĭt nau mhe mhan tă bơh khân may.

²⁰ Yorlah mâu geh nơm du nuih n'hâm đah gâp gay mĭn rvê n'hêl nanê̆ ngăn ma khân may nâm bu Y-Timôthê.

²¹ Lĕ rngôch knŏng mĭn rvê ma nau khlay êng khân păng nơm, mâu di mĭn rvê ma nau khlay Brah Yêsu Krist ôh.

²² Ƀiălah khân may gĭt jêh nuih n'hâm ueh Y-Timôthê, păng ndrel ma gâp pah kan ma Nau Mhe Mhan Ueh tâm ban kon ndrel đah mbơ̆ păng.

²³ Yor nây, gâp kâp gân mra njuăl Y-Timôthê hăn, tơlah gâp gĭt nanê̆ nau tât ma gâp.

²⁴ Ƀiălah tâm Kôranh Brah, gâp chroh pô aơ gâp nơm ăt mra tât gơnh đŏng.

²⁵ Gâp mĭn njuăl Y-Êpaphôdit plơ̆ sĭt ma khân may jêng di. Păng jêng du huê oh nâu, du huê nơm pah kan ndrel jêh ri bunuyh tâm lơh ndrel ma gâp, ăt jêng nơm mbơh jêh ri bunuyh pah kan, khân may njuăl păng gay rvê ma nau gâp ŭch.

²⁶ Yorlah păng ŭch ngăn tâm mâp đŏng ma lĕ rngôch khân may, jêh ri rvê yor khân may tăng jêh păng geh nau ji.

²⁷ Nanê̆ ngăn, păng geh nau ji bơi ma khĭt, ƀiălah Brah Ndu yô̆ nđach ma păng, mâu di knŏng yô̆ nđach ma păng dơm, ƀiălah nđâp ma gâp tâm ban lĕ, gay lơi ăn gâp geh nau rngot rvê âk ir.

²⁸ Yor ri, gâp ndal njuăl păng plơ̆ sĭt, gay ma khân may geh nau răm maak nôk mâp tay păng, bi gâp mâu ir đŏng geh nau rvê.

²⁹ Pôri, khân may răm maak hom tâm Kôranh Brah gay rom păng; jêh ri yơk hom ma bunuyh nâm nđĕ;

³⁰ yor ma nau kan Brah Krist dĭng păng bơi ma khĭt, sân săk păng nơm gay ƀư rĭng lĕ nau kan khân may mâu dơi kơl gâp.