Nơm Nti 12 - Nau Brah Ndu Ngơi 2023

¹ Tâm năm mom ndăm, Kah gĭt hom ma Nơm Rhăk Njêng may, Êlor ma lĕ nar mhĭk văch tât; Êlor ma lĕ năm khay dăch tât May ngơi pô aơ: “Nuih n'hâm gâp mâu saơ nau maak ôh;”

² Êlor nar jêh ri nau ang, Khay ndrel lĕ mănh mbing jêng ngo klĕng, Jêh ri tŭk văch tât tay pakơi dak mih.

³ Tâm nar nây, bunuyh mât ngih râm nsâr, Phung bu klâu ngăch dăng mra đôn gor guyh, Lĕ bu ur kĭn tâm mpăl mra gŭ rlu yorlah hôm e ƀhôi, Phung bunuyh uănh rgăn mpông bloh măt hŏ ngo jêh.

⁴ Rnôk nây, bar seng mpông kêng trong nchăng jêh, Nteh mpăl kĭn jê̆ mbrơi, Bu kah rngăl dôl tăng nteh sĭm ndrau, Jêh ri lĕ nteh bu ur druh mprơ jŭr huơi da dê.

⁵ Bu ăt klach ngăn dôl hao prêh, Jêh ri klach krit dôl hăn rŏ trong. Aƀaơ aơ, tơm si amandê luh kao, Phung krah ndrach nhuat jâk ngăn; Nau kơnh mâu hôm geh ôh, Yorlah aƀaơ aơ kon bunuyh hăn tât ngih păng gŭ n'ho ro, Bi phung ndrê klâng hăn ndăch jŭm lĕ trong ƀon toyh.

⁶ Kah gĭt tay hom tât ma Nơm Rhăk Njêng êlor rse prăk tăch, Jêh ri kachok mah nchah; Êlor yăng dak nchah kêng dak n'hor, Rval jâng ndeh pă ta klơ ntu dak,

⁷ Jêh ri ndruyh neh plơ̆ sĭt tâm neh nâm bu kơt saơm, Bi huêng plơ̆ sĭt ndrel Brah Ndu jêng Nơm hŏ ăn păng.

⁸ Nơm nti lah: “Dơm dam ma nau dơm dam, Lĕ rngôch jêng dơm dam da dê!”

Nau rdŭt

⁹ Nơm nti mâu jêng bunuyh blau mĭn dơm ôh hôm jêng đŏng bunuyh bơh nau gĭt rbăng ma phung ƀon lan. Păng hŏ sek uănh, tĭng joi jêh ri dăp âk trong nau hôr.

¹⁰ Kôranh nơm ti rgum tay lĕ nau ngơi di mĭn ueh, jêh ri lĕ nau hŏ geh nchih jêng nau di jêh ri nau nanê̆ ngăn da dê.

¹¹ Nau bunuyh blau mĭn nâm bu mplanh mâng loih nơm chiăp; lĕ nau hôr dơi rgum tay nâm bu kđĭn pâng nâp; yor du huê rmăk biăp mbơh jêh.

¹² Hơi kon gâp, njrăng hom tâm ăp ntil moh nau rlau lĕ nau ntĭm nti aơ. Ndrom samƀŭt nchih âk ngăn ngên, mâu blau lôch ôh; bi nti âk ir ƀư ăn săk jăn hŏt rgănh.

¹³ Nau nglĕ dŭt ăn lĕ rngôch moh ndơ hŏ tăng jêh ta klơ aơ: Klach yơk hom ma Brah Ndu jêh ri djôt prăp nau vay ntăm bơh Păng, Nây jêng lĕ nau ƀư di ma kon bunuyh.

¹⁴ Yorlah Brah Ndu mra djôt leo phat dôih lĕ rngôch kan, Ndrel ma lĕ rngôch nau ndâp, nđâp lah ueh mâu lah mhĭk.