Nau Vay Nkah Tay 9 - Nau Brah Ndu Ngơi 2023

Phung ƀon lan Israel dơi tâm lơh bơh nau yô̆ Kôranh Brah

¹ “Hơi phung Israel, gŭ iăt hom! Nar aơ khân may mra rgăn dak krong Yurdan, gay lơh n'ho mprơh phung ndŭl mpôl toyh lơn jêh ri dăng lơn ma khân may, geh lĕ ƀon toyh jêh ri bât mpêr nâp prêh tât ta trôk.

² Aơ jêng du phung ƀon lan toyh juat, phung kon sau Y-Anakim, khân may hŏ gĭt jêh ri tăng jêh bu nkoch bri: ‘Mbu dơi tâm rdâng đah phung kon sau Y-Anakim?’

³ Nar aơ, ăn khân may gĭt Yêhôva Brah Ndu mra hăn lor panăp khân may tâm ban ma du mbŭch ŭnh dôl hit, mra ƀư rai phung nây jêh ri hŭch phung nây ntrŭnh khân păng nơm tanăp măt khân may. Khân may mra ntrŭt gơnh jêh ri ƀư rai khân păng, tĭng nâm Brah Yêhôva hŏ ton jêh.

⁴ Ƀiălah dôl Yêhôva Brah Ndu hŏ lơh nsot khân păng tanăp khân may, lơi ngơi ôh tâm nuih n'hâm khân may pô aơ: ‘Yor nau sŏng srăng gâp rĭ dĭng Brah Yêhôva hŏ njŭn leo gâp lăp pit sŏk n'gor aơ.’ Ngăn ya, yor nau ƀai phung ndŭl mpôl nây dĭng Brah Yêhôva lơh nsot khân păng bơh tanăp khân may.

⁵ Mâu di yor nau sŏng srăng mâu lah nuih n'hâm song bơh khân may, dĭng khân may lăp pit sŏk n'gor lĕ phung ƀon lan nây; ƀiălah yor nau ƀai khân păng dĭng Yêhôva Brah Ndu mra nsot lơi khân păng luh bơh tanăp khân may gay ƀư nau gĭt mbên nanê̆ nau Păng ton jêh ma phung chô yau khân may jêng Y-Abraham, Y-Isăk, jêh ri Y-Yakôb.

⁶ Pôri ăn khân may gĭt pô aơ mâu di ôh yor nau sŏng srăng bơh khân may dĭng Yêhôva Brah Ndu ăn khân may pit sŏk n'gor ueh aơ, yorlah khân may jêng du phung ƀon lan dăng bôk.”

Nau dăng nuih n'hâm Phung ƀon lan Israel

⁷ “Ăn khân may kah gĭt, lơi ta chuêl, tâm bri rdah khân may hŏ nsônh jêh nau ji nuih Yêhôva Brah Ndu kơt nĕ. Tă bơh nar khân may du luh bơh n'gor Êjipt kŏ tât ta ntŭk aơ, khân may hŏ tâm rdâng ƀaƀơ jêh đah Brah Yêhôva.

⁸ Ta yôk Hôrep, khân may hŏ nsônh nau ji nuih Brah Yêhôva jêh ri Păng hŏ ji nuih jêh đah khân may kŏ tât Păng mĭn ŭch ƀư rai khân may.

⁹ Dôl gâp hao klơ yôk gay dơn bar plơp lŭ, Brah Yêhôva hŏ nchih jêh ta klơ bar plơp nây nau tâm rnglăp, Păng hŏ ƀư jêh đah khân may, gâp hŏ gŭ ta klơ yôk puăn jât nar jêh ri puăn jât măng, gâp mâu sa piăng let mâu đŏng nhêt dak.

¹⁰ Brah Yêhôva hŏ ăn jêh ma gâp bar plơp lŭ bơh nglau ti Brah Ndu nơm nchih, ta klơ nây geh dĭng lĕ nau ngơi Brah Yêhôva hŏ lah jêh ma khân may ta klơ yôk, bơh tâm nklang ŭnh, ta nar tâm rƀŭn.

¹¹ Tăch puăn jât nar jêh ri puăn jât măng nây, Brah Yêhôva hŏ jao ăn jêh ma gâp bar plơp lŭ geh nchih jêh nau tâm rnglăp Păng hŏ ƀư jêh đah khân may.

¹² Brah Yêhôva lah ma gâp: ‘Dâk hom, jŭr gơnh bơh ntŭk aơ yorlah phung ƀon lan may njŭn jêh luh bơh n'gor Êjipt hŏ ƀư jêng nau tih mhĭk. Khân păng hŏ chalơi gơnh trong Gâp hŏ ntĭm nti jêh, jêh ri tŏ ma khân păng nơm du mlâm rup brah.’

¹³ Brah Yêhôva hôm lah ma gâp: ‘Gâp hŏ saơ jêh phung ƀon lan aơ jêng du phung ƀon lan dăng bôk!

¹⁴ Lơi ta mpăng Gâp ôh, Gâp mra ƀư rai khân păng jêh ri jut lơi amoh khân păng bơh neh ntu aơ. Ƀiălah Gâp mra ƀư ma may dơi jêng du ndŭl mpôl dăng lơn jêh ri âk lơn ma khân păng.’

¹⁵ Pôri, gâp plơ̆ ro jêh ri hăn trŭnh bơh yôk nđâp ma bar rlat lŭ geh nchih nau tâm rnglăp tâm ti gâp, tâm nôk lam yôk hôm ŭnh sa.

¹⁶ Gâp saơ nanê̆ khân may hŏ ƀư tih jêh đah Yêhôva Brah Ndu, khân may gơnh chalơi trong Brah Yêhôva hŏ ntĭm nti jêh ma khân may, khân may tŏ jêh ma khân may nơm du mlâm rup kon ndrôk.

¹⁷ Gâp djôt bar plơp lŭ jêh ri klŭp mprah ta neh. Bar plơp lŭ nchah hăch âk rlat tanăp măt khân may.

¹⁸ Jêh nây, yor nau tih khân may hŏ ƀư jêh nôk ƀư nau mhĭk gay nsônh nau ji nuih Brah Yêhôva, gâp chon mbah tanăp măt Păng tâm puăn jât nar măng, nâm bu nôk ta lor, gâp mâu geh sa piăng let kŏ mâu đŏng nhêt dak.

¹⁹ Gâp klach râm sâr ngăn tanăp nau ji nuih Brah Yêhôva hŏ nuih đah khân may; Păng ji nuih kŏ tât gay ŭch ƀư rai khân may. Ƀiălah nđâp ma aƀaơ aơ đŏng, Brah Yêhôva hŏ iăt nau gâp.

²⁰ Brah Yêhôva ji nuih đŏng nđâp ma Y-Arôn kŏ tât ŭch nkhĭt păng, ƀiălah nôk nây ro gâp kơl mbơh sơm đŏng ma Y-Arôn.

²¹ Gâp djôt ndơ tih khân may, jêng rup kon ndrôk, su ndơ nây tâm ŭnh, nchah lơi ăn hăch, kĭn lơi kŏ se jêng rnih nâm bu ndruyh jêh nây nkhŭt ndruyh nây tâm n'hor dak hoch tă bơh klơ yôk.

²² Khân may hŏ nsônh jêh ma Brah Yêhôva ji nuih ta Tabêra, ta Masa jêh ri ta Kibrôt Hatava.

²³ Nôk đă khân may bơh Kadês Barnê, Brah Yêhôva ntĭnh jêh: ‘Hăn hao hom jêh ri pit sŏk n'gor Gâp hŏ ăn jêh ma khân may,’ ƀiălah khân may tâm rdâng đah nau ntrŭnh bơh Yêhôva Brah Ndu, mâu rnơm nsing, jêh ri mâu đŏng tông bâr Păng.

²⁴ Ntơm bơh nar gâp gĭt năl khân may tât aƀaơ, khân may tâm rdâng ƀaƀơ đah Brah Yêhôva.

²⁵ Pôri, gâp hŏ chon mbah tanăp Brah Yêhôva tâm puăn jât nar jêh ri puăn jât măng, yorlah Brah Yêhôva hŏ lah jêh Păng gay ŭch ƀư rai khân may.

²⁶ Gâp hŏ mbơh sơm ma Brah Yêhôva: ‘Hơi Kôranh Brah, Brah Yêhôva, dăn Kôranh Brah lơi ƀư rai ôh phung ƀon lan May, jêng drăp ndơn May, jêng phung ƀon lan May hŏ tâm chuai jêh ma nau rnam dŭt prêh May, jêh ri hŏ njŭn leo khân păng luh bơh n'gor Êjipt ma ti nau rnam May.

²⁷ Dăn Kôranh Brah kah gĭt ma phung oh mon May jêng Y-Abraham, Y-Isăk jêh ri Y-Yakôb, lơi klăp ndăng ôh ma nau nuih n'hâm dăng ko, djơh mhĭk jêh ri ma nau tih phung ƀon lan aơ.

²⁸ Tơlah mâu, phung ƀon lan tâm n'gor May hŏ njŭn leo hên luh jêh, mra lah: Yorlah Brah Yêhôva mâu dơi ôh djôt leo phung ƀon lan aơ lăp tâm n'gor Păng hŏ ton jêh, jêh ri yorlah tâm rmot ma khân păng rĭ dĭng Păng njŭn khân păng luh jêh ri gay ăn khân păng khĭt tâm bri rdah.

²⁹ Ƀiălah khân păng jêng phung ƀon lan May, jêng drăp ndơn dĭng May hŏ dŏng jêh nau rnam toyh jêh ri yơr ti dŭt dăng gay djôt leo khân păng luh bơh Êjipt.’”