Nau Vay Nkah Tay 4 - Nau Brah Ndu Ngơi 2023

Y-Môis đă phung Israel djôt prăp nau vay Kôranh Brah

¹ “Hơi phung Israel, aƀaơ aơ gŭ iăt hom lĕ nau vay dăp jêh ri lĕ nau vay gâp ƀư nti khân may. Djôt prăp hom lĕ nau nây gay ma khân may dơi rêh gay lăp dơn n'gor Yêhôva Brah Ndu phung chô yau khân may ăn ma khân may jêng drăp ndơn.

² Khân may mâu dơi ntop ôh, mâu dơi n'goh ma nau ngơi gâp ntăm jêh ma khân may, ƀiălah ăn khân may djôt prăp nau vay Yêhôva Brah Ndu ntăm, gâp hŏ ntĭnh jêh ma khân may.

³ Măt khân may hŏ saơ jêh nau Brah Yêhôva ƀư jêh đah Baal-Pêôr nôk Yêhôva Brah Ndu ƀư rai jêh bơh nklang khân may lĕ rngôch bunuyh tĭng jêh Baal-Pêôr.

⁴ Ƀiălah khân may jêng phung gŭ răp jăp đah Yêhôva Brah Ndu khân may, ăt hôm e rêh kŏ tât ta nar aơ.

⁵ Aơ, gâp nti jêh ma khân may lĕ nau vay dăp jêh ri lĕ nau vay ƀư di nâm bu Yêhôva Brah Ndu gâp ntĭnh ntăm jêh ma gâp, gay ma khân may djôt prăp dôl gŭ tâm n'gor, khân may mra lăp dơn jêng drăp ndơn.

⁶ Pôri, ăn khân may djôt prăp jêh ri ƀư tĭng nâm lĕ nau ntăm ƀư jêh ri nau vay, yor tă bơh nau nây phung ƀon lan mra saơ nau blau mĭn jêh ri nau gĭt rbăng khân may. Lah tăng lĕ nau vay dăp aơ khân păng mra lah: ‘Knŏng geh phung ndŭl mpôl toyh aơ nanê̆ jêng du phung ƀon lan blau mĭn jêh ri gĭt rbăng!’

⁷ Yorlah mbu phung ƀon lan toyh geh du brah gŭ dăch khân păng tâm ban ma Yêhôva Brah Ndu gŭ dăch he ăp tơ̆ he kuăl mbơh sơm ma păng?

⁸ Mbu ndŭl mpôl toyh dơi geh lĕ nau vay dăp jêh ri lĕ nau vay ƀư sŏng nâm bu lĕ rngôch nau vay nar aơ gâp tâm mpơl tanăp măt khân may?

⁹ Ăn khân may njrăng hom jêh ri chiă mât njrăng huêng khân may, lơi chuêl moh nau măt khân may saơ jêh, jêh ri du bông nau rêh lơi ăn lĕ nau nây du bơh nuih n'hâm khân may. Ƀiălah nti hom nau nây ma phung kon jêh ri ma phung sau khân may.

¹⁰ Kah gĭt hom ta nar khân may dâk tanăp Yêhôva Brah Ndu ta yôk Hôrep lah Brah Yêhôva lah ma gâp: ‘Rgum hom phung ƀon lan. Gâp mra ăn khân păng iăt nau Gâp ngơi gay dôl khân may hôm rêh ta neh ntu, khân păng nti klach yơk ma Gâp jêh ri dơi ntĭm nti tay nau nây ma phung kon khân păng.’

¹¹ Jêh nây khân may văch dăch jêh ri dâk ta jâng yôk, dôl ta klơ yôk ŭnh hit hao prêh kŏ tât ta trôk, ma ndâr tŭk thŭl krăk, nau ngo nkŭm.

¹² Bơh tâm ŭnh Brah Yêhôva ngơi ma khân may. Khân may tăng nau ngơi ƀiălah mâu saơ ôh rup săk jăn păng, knŏng geh bâr ngơi.

¹³ Brah Yêhôva mbơh ma khân may nau tâm rnglăp, nau Păng ntăm jêh ăn khân may djôt prăp, nâm bu ntĭt Jât Ntil Nau Vay Ntăm bơh Păng hŏ nchih jêh ta klơ bar rlat lŭ.

¹⁴ Nôk nây, Brah Yêhôva ntĭnh đŏng ma gâp sâm nti khân may lĕ nau vay dăp jêh ri lĕ nau vay ƀư, gay ma khân may tĭng kơt nau nây tâm n'gor khân may mra lăp sŏk jêng drăp ndơn.”

Ver ta mbah rup brah

¹⁵ “Ăn khân may njrăng nanê̆ jêh ri blau mât huêng khân may, yorlah khân may mâu saơ ôh rup tâm nar Yêhôva Brah Ndu ngơi ma khân may tă bơh ta nklang ŭnh ta Hôrep.

¹⁶ Yor nây, khân may lơi ta ƀư nau tih mhĭk, trah rup ma khân may nơm, du rup brah moh ntil, tâm ban nâm rup bu klâu mâu lah bu ur,

¹⁷ mâu lah rup mpô mpa tâm neh ntu, mâu lah rup sĭm klơ trôk,

¹⁸ mâu lah mpa vơr ma ndŭl klơ neh, mâu lah rup ka tâm dak jru.

¹⁹ Lah khân may n'gơr măt klơ trôk, jêh ri khân may saơ nar, khay, lĕ mănh mbing, lĕ rngôch phung tahan tâm trôk, lơi ăn bu đŏt rdu khân may chon mbah mâu lah yơk mbah ma khân păng, yorlah ndơ nây knŏng jêng ndơ Yêhôva Brah Ndu khân may hŏ ăn jêh ma lĕ rngôch phung ƀon lan gŭ tâm dâng neh.

²⁰ Bi khân may, Brah Yêhôva hŏ săch jêh ri njŭn leo khân may luh tă bơh ŭnh năk loih ri, jêng n'gor Êjipt, gay khân may jêng du phung ƀon lan êng Păng nơm, jêng drăp ndơn Păng, tâm ban khân may jêng nar aơ.

²¹ Yor ma khân may Brah Yêhôva ji nuih ma gâp jêh ri Păng hŏ ton jêh pô aơ gâp mâu mra dơi rgăn ôh dak krong Yurdan jêh ri gâp mâu dơi lăp ôh tâm n'gor ueh Yêhôva Brah Ndu ăn ma khân may jêng drăp ndơn.

²² Gâp mra khĭt tâm n'gor aơ, mâu dơi ôh rgăn dak krong Yurdan, ƀiălah khân may mra hăn rgăn jêh ri dơn sŏk n'gor ueh nây jêng drăp ndơn.

²³ Njrăng hom lơi ta chuêl nau tâm rnglăp Yêhôva Brah Ndu khân may hŏ ƀư jêh đah khân may. Lơi ƀư ma khân may nơm du rup trah moh ntil mpa Yêhôva Brah Ndu hŏ buay jêh ma khân may.

²⁴ Yorlah Yêhôva Brah Ndu khân may jêng du rlô ŭnh su jêh ri jêng Brah Ndu blau ntôn.

²⁵ Lah khân may hŏ geh kon geh sau se jêh ri rêh jŏ tâm n'gor, tơlah khân may hôm e ƀư nau tih mhĭk tâm ban ƀư rup brah moh ntil mpa, mâu lah nau djơh mhĭk tanăp măt Yêhôva Brah Ndu khân may gay nsônh Păng ji nuih,

²⁶ pôri nar aơ gâp kuăl trôk jêh ri neh ntu gay mbơh pô aơ, khân may mra gơnh roh lĕ bơh n'gor khân may bơi dơn jêng drăp ndơn đah ri dak krong Yurdan; khân may mâu mra dơi gŭ jŏ ta nây ôh ƀiălah bu mra nkhĭt khân may lĕ ƀhiau.

²⁷ Brah Yêhôva mra tâm nkhah khân may ta nklang phung ndŭl mpôl bunuyh, knŏng hôm e djê̆ dơm tâm ăp bri dak, ntŭk Brah Yêhôva mra nsot khân may tât.

²⁸ Ta nây, khân may mra pah kan ma phung brah ƀư ma si jêh ri ƀư ma lŭ, jêng nau kan ti bunuyh ƀư, rĭ dĭng mâu blau saơ, mâu blau tăng, mâu blau sông sa, mâu lĕ blau n'hơp.

²⁹ Ƀiălah bơh ntŭk nây đŏng khân may mra joi Yêhôva Brah Ndu jêh ri ndah nâm jŏ khân may joi Păng ma lĕ nuih n'hâm, ma lĕ huêng, pôri khân may mra tâm mâp đah Păng.

³⁰ Lah khân may gŭ tâm nau rêh ni, jêh ri lah lĕ rngôch nau aơ mra tât jêh ma khân may, tâm nar nglĕ dŭt, khân may mra plơ̆ tay ma Yêhôva Brah Ndu khân may jêh ri tông bâr Păng.

³¹ Yorlah Yêhôva Brah Ndu khân may jêng Brah Ndu bêng ma nau yô̆ nđach; Păng mâu mra chalơi khân may, mâu ƀư rai khân may, mâu đŏng chuêl nau tâm rnglăp Păng hŏ ton ma phung chô yau khân may.”

Yêhôva jêng Brah Ndu

³² “Pôri, ăn khân may mĭn ma lĕ nar kăl e, rnôk panăp ma khân may, ntơm bơh nar Brah Ndu rhăk njêng bunuyh ta neh; mĭn hom bơh bôl trôk aơ tât dŭt bôl trôk ri, prot geh nau tât toyh kơt nây, mâu lah hŏ tă tăng jêh moh nau kan tâm ban kơt nây lĕ mâu?

³³ Mâp geh du phung ƀon lan tăng bâr brah ngơi bơh tâm trong ŭnh, nâm bu khân may hŏ tăng jêh, jêh ri hôm e rêh lĕ mâu?

³⁴ Mâu lah mâp geh lĕ du huê brah hăn săch ma păng nơm du mpôl băl bunuyh tă bơh nklang du mpôl băl êng ma lĕ nau tâm rlong, mpơl nau mbên jêh ri nau mbên mha, ma nau tâm lơh, ma ti nau dơi yơr huy, ma lĕ nau krit klach toyh, nâm bu lĕ rngôch nau Yêhôva Brah Ndu hŏ ƀư jêh ma khân may tâm n'gor Êjipt tanăp măt khân may?

³⁵ Khân may hŏ saơ jêh lĕ nau nây, gay ma khân may dơi gĭt năl Yêhôva jêng Brah Ndu, rlau ma Păng mâu hôm geh nơm êng ôh.

³⁶ Bơh trôk, Păng ăn khân may tăng bâr Păng ŭch nti đăp khân may. Ta klơ neh, Păng ăn khân may saơ ŭnh toyh Păng, jêh ri khân may tăng bâr Păng tă bơh tâm nklang ŭnh toyh.

³⁷ Yorlah Păng rŏng ma phung chô yau khân may jêh ri hŏ săch noi deh khân may, jêh ri Păng nơm hŏ sŏk nau brah toyh Păng, njŭn khân may luh tă bơh n'gor Êjipt,

³⁸ lơh n'ho mprơh tanăp măt khân may lĕ phung ƀon lan toyh lơn jêh ri ktang lơn ma khân may, gay njŭn khân may lăp ta nây, ăn bri neh khân păng ma khân may jêng drăp ndơn nâm bu nau khân may geh ta nar aơ.

³⁹ Pôri nar aơ ăn khân may gĭt jêh ri djôt prăp hom tâm nuih n'hâm khân may pô aơ, tâm trôk ta klơ jêh ri ta neh ntu tâm dâng, Brah Yêhôva jêng Brah Ndu, mâu hôm geh nơm êng ôh.

⁴⁰ Djôt prăp hom lĕ nau vay Păng dăp jêh ri nau vay Păng ntăm, gâp ăn jêh ma khân may nar aơ gay ma khân may jêh ri ma phung kon sau khân may pakơi taơ geh nau ueh uĭn, jêh ri dơi gŭ jŏ nar tâm n'gor Yêhôva Brah Ndu khân may ăn jêh ma khân may n'ho ro.”

Pe ƀon du krap

⁴¹ Y-Môis prăp êng pe ƀon toyh mpeh luh nar đah ri dak krong Yurdan

⁴² gay ƀư ntŭk du krap ma nơm nkhĭt bu jêng nơm nkhĭt bunuyh chiau meng păng ma nau mâu geh ndra ŭch ôh jêh ri saơm mâu mâp ôh geh nau tâm rmot. Bunuyh nây klăp lah du ndĕ jêh ri krap lăp tâm du ƀon toyh tâm ăp ƀon toyh nây jêh ri mra dơi rêh.

⁴³ Nây jêng ƀon toyh Bêser tâm bri rdah, ta neh lâng klơ dor, prăp ma phung Ruben; ƀon toyh Ramôt tâm n'gor Gilêat prăp ma phung Gat; jêh ri ƀon toyh Gôlan tâm n'gor Basan prăp ma phung Manasê.

Nau nti tal bar bơh Y-Môis: Nau vay ma phung Israel

⁴⁴ Aơ jêng nau vay Y-Môis mpơl tanăp phung kon Israel:

⁴⁵ Aơ jêng lĕ nau ntrŭnh jêh ri lĕ nau vay dăp jêh ri lĕ nau vay ƀư bơh Y-Môis ngơi jêh ma phung ƀon lan Israel, nôk khân păng luh bơh n'gor Êjipt,

⁴⁶ dôl khân păng hôm gŭ mpeh đah ri dak krong Yurdan, tâm rlŭng tâm tham đah Bet-Pêôr. Aơ jêng neh Y-Sihôn, hađăch phung Amôrit, nơm hŏ chiă uănh ta ƀon toyh Hêsbôn, Y-Môis n'hanh phung Israel tâm lơh kŏ dơi jêh, nôk khân păng luh bơh n'gor Êjipt.

⁴⁷ Phung ƀon lan Israel hŏ pit sŏk jêh n'gor hađăch nây nđâp ma n'gor Y-Ôk tâm ban đŏng, hađăch n'gor Basan. Nây jêng bar hê hađăch phung Amôrit gŭ mpeh đah ri dak krong Yurdan mpeh luh nar.

⁴⁸ Nkual aơ ntơm bơh Arôer, ta kơh dak krong Arnôn kŏ tât ta yôk Siriôn, jêng Hermôn,

⁴⁹ nđâp lĕ neh lâng klơ dor Arabah đah ri dak krong Yurdan, mpeh luh nar, kŏ tât ta Dak Mƀŭt Khĭt, tâm dâng jâng yôk Pisga.