Nau Vay Nkah Tay 3 - Nau Brah Ndu Ngơi 2023

Dơi lơh đah Y-Ôk, hađăch n'gor Basan

¹ “Lah he plơ̆ hăn trong hao n'gor Basan, pôri Y-Ôk, hađăch n'gor Basan, djôt leo lĕ rngôch phung tahan hăn luh ŭch tâm lơh đah he ta Êdrei.

² Brah Yêhôva lah ma gâp: ‘Lơi klach ôh ma hađăch nây yorlah Gâp hŏ jao jêh păng nđâp phung ƀon lan păng jêh ri n'gor păng tâm ti may. May mra phat păng nâm bu may hŏ phat jêh ma Y-Sihôn, hađăch phung Amôrit, nơm gŭ ta Hêsbôn.’

³ Yêhôva Brah Ndu he hŏ jao jêh Y-Ôk, hađăch n'gor Basan, jêh ri lĕ rngôch tahan păng. He hŏ lơh rai hađăch nây kŏ tât mâu hôm om ôh du huê bunuyh rêh klen.

⁴ Nôk nây, he sŏk lĕ rngôch ƀon toyh hađăch, mâu geh du rplay ƀon toyh ôh he ê sŏk. Lĕ rngôch jêng prao jât ƀon toyh jêh ri lĕ nkual Argôp, jêng ƀon bri hađăch Ôk tâm n'gor Basan.

⁵ Lĕ rngôch ƀon toyh nây nâp da dê, geh pêr prêh, mpông pêr geh mâng nđăng. Rlau ma nây geh âk ƀon jê̆ jê̆ mâu geh ôh pêr văr jŭm.

⁶ He hŏ nkhĭt jêh lĕ ƀon toyh nây tâm ban ma he ƀư jêh ma Y-Sihôn, hađăch ƀon Hêsbôn, jêng ƀư rai lĕ rngôch ƀon toyh, nđâp phung bu klâu, phung bu ur nđâp ma phung kon se.

⁷ Ƀiălah he djôt prăp ma he nơm lĕ rngôch mpô mpa rong jêh ri ndơ pit sŏk bơh ăp ƀon toyh.

⁸ Pôri, tâm rnôk nây he hŏ sŏk pit n'gor bơh ti bar hê hađăch phung Amôrit gŭ mpeh luh nar đah ri dak krong Yurdan, ntơm bơh dak krong Arnôn tât ta yôk Hermôn.

⁹ (Phung Sidôn rnha yôk Hermôn jêng Siriôn, bi phung Amôrit ntơ moh jêng Sênir.)

¹⁰ He pit sŏk đŏng lĕ ƀon toyh tâm neh lâng, lam n'gor Gilêat jêh ri Basan, kŏ tât ta Salêka jêh ri Êdrei, jêng bar ƀon toyh tâm ƀon bri hađăch Ôk, tâm n'gor Basan.

¹¹ (Knŏng geh Y-Ôk, hađăch n'gor Basan, phung Rêphaim, hôm rêh. Sưng bê̆ch hađăch nây ƀư ma loih mâu di hĕ păng gŭ ta ƀon toyh Raba phung kon sau Ammôn? Sưng bê̆ch nây jong rlau puăn met, dĭ du met pham.)

¹² Dôl he pit sŏk n'gor nây jêng drăp ndơn, gâp ăn ma phung Ruben jêh ri ma phung Gat n'gor nkual neh mpeh pa lơ ƀon toyh Arôer, ta kơh dak krong Arnôn, tât ta du n'gul nkual klơ dor yôk Gilêat nđâp ma lĕ ƀon toyh păng.

¹³ Gâp jao gâl yôk Gilêat hôm e jêh ri lĕ n'gor Basan jêng ƀon bri hađăch Ôk ma du n'gul ndŭl mpôl Manasê. (Lam n'gor Argôp jêh ri lĕ n'gor Basan vay dơi rnha jêng n'gor Rêphaim.

¹⁴ Y-Jar bơh ndŭl mpôl Manasê hŏ sŏk lĕ n'gor Argôp kŏ tât n'har phung Gêsurit jêh ri phung Makatit, jêh ri rnha ma ƀon jê̆ Basan ma amoh păng nơm, jêng ƀon jê̆ Jar, kŏ tât ta nar aơ.)

¹⁵ Gâp jao đŏng n'gor Gilêat ma Y-Makir.

¹⁶ Bi phung Ruben jêh ri phung Gat, gâp jao gâl neh bơh n'gor Gilêat tât ta dak krong Arnôn, sŏk ta nklang dak krong nây jêng n'har, jêh ri kŏ tât ta dak krong Jabôk, jêng n'har phung kon sau Ammôn.

¹⁷ Ta mpeh nhâp nar, nkual neh pe ndŭl mpôl jong ngăn kŏ tât ta n'gor neh lâng klơ dor Arabah, sŏk dak krong Yurdan jêng n'har, bơh nglao Galilê tât ta dak mƀŭt Arabah, jêng Dak Mƀŭt Khĭt tâm dâng jâng yôk Pisga mpeh luh nar.

¹⁸ Nôk nây gâp geh ntĭnh ma khân may: ‘Yêhôva Brah Ndu khân may hŏ jao jêh n'gor aơ jêng drăp ndơn ma khân may. Lĕ rngôch phung tahan janh ktang tâm khân may djôt leo ndơ tâm lơh hăn lor tanăp phung oh nâu khân may jêng phung ƀon lan Israel.

¹⁹ Knŏng phung ur, phung kon jê̆ jêh ri mpô mpa rong khân may mra gŭ tâm ăp ƀon toyh gâp hŏ jao jêh ma khân may (yorlah gâp gĭt khân may geh âk mpô mpa rong).

²⁰ Ndah jŏ Brah Yêhôva ăn nau rlu ma phung oh nâu khân may tâm ban ma khân may nơm, jêng nôk khân păng dơi gŭ tâm n'gor Yêhôva Brah Ndu khân may ăn jêh ma khân păng ta mpeh nhâp nar đah ri dak krong Yurdan, rnôk nây mơ khân may mplơ̆ sĭt drăp ndơn gâp hŏ jao jêh ma khân may.’

²¹ Dôl nôk nây gâp ntĭnh đŏng nau aơ ma Y-Yôsuê: ‘Măt may hŏ saơ jêh lĕ nau Yêhôva Brah Ndu khân may hŏ ƀư jêh ma bar hê hađăch aơ. Brah Yêhôva mra ƀư kơt nây ma lĕ rngôch ƀon bri hađăch khân may mra hăn rgăn.

²² Lơi klach ôh ma khân păng yorlah Yêhôva Brah Ndu khân may mra tâm lơh an ma khân may.’

²³ Nôk nây gâp kuăl mbơh sơm ma Yêhôva pô aơ:

²⁴ ‘Hơi Yêhôva Brah Ndu, May hŏ ntơm mpơl jêh ma oh mon May saơ nau chrêk rmah jêh ri ti nau brah May. Yorlah, mbu brah klơ trôk mâu lah ta neh ntu dơi ƀư lĕ nau kan jêh ri ƀư nau brah tâm ban ma May?

²⁵ Gâp dăn ma Kôranh Brah ăn gâp dơi vay hăn rgăn jêh ri saơ n'gor ueh, n'gor klơ dor yôk ueh nây jêh ri dor Liban mpeh đah ri dak krong Yurdan.’

²⁶ Ƀiălah Brah Yêhôva ji nuih ma gâp yor khân may jêh ri mâu iăt nau gâp ôh. Păng lah ma gâp: ‘Găp jêh! May lơi hôm ôh ngơi nau aơ ma Gâp!

²⁷ Hăn hao hom ta n'gơn yôk Pisga, n'gơr măt may mpeh nhâp nar, mpeh pa lơ, mpeh pa dâng jêh ri mpeh luh nar jêh ri uănh n'gor nây ma măt may, yorlah may mâu dơi ôh hăn rgăn dak krong Yurdan aơ.

²⁸ Ƀiălah ăn may ntĭnh hom ma Y-Yôsuê, n'hao nuih păng jêh ri ƀư ktang nuih n'hâm Y-Yôsuê yorlah păng nơm mra hăn lor tanăp phung ƀon lan aơ jêh ri njŭn leo khân păng lăp sŏk dơn drăp ndơn jêng n'gor may mra saơ.’

²⁹ Yor nây, he hŏ gŭ jêh tâm rlŭng tâm tham đah Bet-Pêôr.”