Nau Vay Nkah Tay 2 - Nau Brah Ndu Ngơi 2023

Nsong mblêng tâm bri rdah

¹ “Pôri he plơ̆ sĭt tay, hăn lăp tâm bri rdah mpeh Dak Mƀŭt Chăng tĭng nâm Brah Yêhôva hŏ ntĭnh jêh ma gâp, jêh ri he hăn ndăch dŭt âk nar jŭm n'gor klơ dor yôk Sêir.

² Jêh nây Brah Yêhôva lah ma gâp:

³ ‘Phung ƀon lan hăn ndăch ta yôk aơ jŏ jêh, aƀaơ plơ̆ sĭt hom mpeh pa lơ.

⁴ Ăn may ntĭnh ma phung ƀon lan: Khân may hăn dăch rgăn n'gor phung oh nâu khân may jêng phung kon sau Y-Êsau, gŭ tâm n'gor Sêir. Khân păng mra klach ma khân may, ƀiălah ăn khân may njrăng.

⁵ Lơi tâm lơh đah khân păng ôh yorlah Gâp mâu mra ăn ôh ma khân may n'gor khân păng, nđâp lah knŏng du kô̆ neh ma mpang jâng khân may jot kŏ mâu đŏng. Gâp hŏ ăn jêh yôk Sêir jêng drăp ndơn ma Y-Êsau.

⁶ Khân may mra sŏk prăk gay rvăt ndơ sông sa bơh khân păng gay sa, dak gay nhêt.

⁷ Yorlah Yêhôva Brah Ndu hŏ ăn nau ueh uĭn jêh ma khân may tâm lĕ rngôch kan ti bơh khân may. Păng gĭt nau hăn rgăn bri rdah dŭt toyh aơ. Tâm puăn jât năm aơ Yêhôva Brah Ndu khân may hôm gŭ ndrel mro ma khân may; khân may mâu pưt du ntil ndơ ôh.’

⁸ Pôri he hăn der n'har bri bơh phung oh nâu he jêng phung kon bu klâu Y-Êsau. Khân păng hôm gŭ rêh tâm n'gor klơ dor yôk Sêir. He hăn mpeh ma bri rdah Môap gay der trong rgăn n'gor neh lâng klơ dor Arabah, der ngai trong bơh Êlat jêh ri Êsiôn-Gêber tât Dak Mƀŭt Khĭt.

⁹ Brah Yêhôva lah tay ma gâp: ‘Lơi ƀư jêr mâu lah tâm lơh đah phung Môap jêng kon sau Y-Lot, yorlah Gâp mâu mra ăn ôh ma khân may du gâl tâm neh khân păng gay ƀư drăp ndơn khân may. Gâp ăn jêh ƀon Ar jêng drăp ndơn ma phung kon sau Y-Lot.’

¹⁰ (Kăl e nơh phung Êmim gŭ ta nây. Khân păng jêng du phung ƀon lan toyh, âk, juat nâm du phung Anakim.

¹¹ Nâm bu phung Anakim, bu dơi uănh khân păng jêng phung Rêphaim, ƀiălah phung Môap rnha khân păng jêng Êmim.

¹² Kăl e phung Hôrit gŭ ta Sêir đŏng ƀiălah phung kon sau Y-Êsau mprơh lơi khân păng, ƀư rai lơi jêh ri pit rvan n'gor khân păng, nâm phung Israel hŏ ƀư jêh ta n'gor Brah Yêhôva ăn jêh ma khân păng jêng drăp ndơn.)

¹³ ‘Aƀaơ, dâk hom jêh ri hăn rgăn n'hor dak Sêret.’ Pôri he hŏ rgăn jêh n'hor dak Sêret.

¹⁴ Nau jŏ ntơm bơh he du tă bơh Kadês Barnê tât nôk he găn dak n'hor Sêret jêng pe jât pham năm. Tâm rnôk nây, lĕ phung tahan rô̆ nây bu hŏ ƀư rai jêh bơh rmlak tahan, tĭng nâm Brah Yêhôva hŏ ton jêh ma khân păng.

¹⁵ Nanê̆ ngăn, ti Brah Yêhôva tâm rdâng đah khân păng gay ƀư rai khân păng luh bơh rmlak tahan, kŏ tât mâu hôm geh du huê bunuyh.

¹⁶ Lah lĕ rngôch tahan hŏ khĭt jêh bơh phung ƀon lan

¹⁷ Brah Yêhôva hŏ lah ma gâp:

¹⁸ ‘Nar aơ khân may mra hăn rgăn n'har neh phung Môap, dăch ƀon Ar.

¹⁹ Lah khân may tât dăch phung kon sau Ammôn, may lơi ôh tâm janh mâu lah rduh lơh khân păng, yorlah Gâp mâu mra ăn ôh n'gor phung Ammôn ma may jêng drăp ndơn. Gâp ăn jêh n'gor nây ma phung kon sau Y-Lot jêng drăp ndơn khân păng jêh.’

²⁰ (N'gor nây ăt dơi uănh jêng n'gor phung Rêphaim. Kăl e ri phung Rêphaim gŭ ta nây, nđâp lah phung Ammôn rnha khân păng jêng Samsumim.

²¹ Khân păng jêng du phung ƀon lan toyh, âk, toyh juat nâm phung Anakim. Ƀiălah Brah Yêhôva hŏ ƀư rai jêh khân păng tanăp măt phung Ammôn. Phung Ammôn mprơh lơi phung ƀon lan nây jêh ri gŭ ntrok ntŭk khân păng.

²² Păng ƀư đŏng kơt nây ma phung kon sau Y-Êsau ta n'gor Sêir, dôl Păng ƀư rai phung Hôrit tanăp măt kon sau Y-Êsau. Phung kon sau Y-Êsau mprơh lơi đŏng phung Hôrit jêh ri gŭ ntrok ntŭk khân păng kŏ tât ta nar aơ.

²³ Bi ma phung Avim, kăle ri khân păng gŭ tâm ƀon jê̆ jê̆ n'ho tât ta ƀon Gaxa, phung Kaptôrim tă bơh Kaptôr tât, ƀư rai khân păng jêh ri gŭ ntrok ntŭk khân păng.)

²⁴ ‘Dâk hom, hăn tay rgăn krong Arnôn. Aơ, Gâp jao jêh Y-Sihôn, hađăch ƀon Hêsbôn jêng phung Amôrit, jêh ri n'gor păng tâm ti khân may. Ntơm pit hom n'gor jêh ri tâm lơh đah hađăch nây.

²⁵ Nar aơ Gâp ntơm ƀư ma lĕ phung ƀon lan tâm neh ntu aơ mra krit jêh ri klach ma khân may. Lah tăng nau bu nkoch bri ma khân may, lĕ phung ƀon lan nây mra râm sâr jêh ri krit tanăp măt khân may.’”

Dơi lơh hađăch Y-Sihôn

²⁶ “Pôri, tă bơh bri rdah Kêdêmôt gâp njuăl phung mbơh tât tâm mâp đah Y-Sihôn, hađăch ƀon Hêsbôn, ma nau ngơi đăp mpăn gay lah đah hađăch nây:

²⁷ ‘Ăn gâp hăn rgăn n'gor hađăch. Gâp mra hăn knŏng rŏ trong toyh, mâu mra teng pa ma mâu lah teng pa chiau.

²⁸ Hađăch mra tăch ma hên ndơ sông sa, dak nhêt ma hên tâm rgâl đah prăk. Dăn knŏng ăn ma hên dơi hăn rgăn n'gor hađăch,

²⁹ tâm ban ma phung kon sau Y-Êsau gŭ tâm n'gor Sêir jêh ri phung Môap gŭ tâm n'gor Ar hŏ ăn jêh ma hên, kŏ tât nôk hên rgăn dak krong Yurdan gay lăp n'gor Brah Yêhôva Brah Ndu hên ăn jêh ma hên.’

³⁰ Ƀiălah Y-Sihôn hađăch ƀon Hêsbôn, mâu ŭch ăn ôh hên rgăn nkual neh hađăch nây. Yorlah Yêhôva Brah Ndu khân may ƀư nau mĭn hađăch brơl, nuih n'hâm dăng ko, gay jao hađăch nĕ tâm ti khân may nâm bu nar aơ khân may hŏ saơ jêh.

³¹ Brah Yêhôva lah ma gâp: ‘Aơ, Gâp ntơm jao Y-Sihôn jêh ri n'gor păng ma may. Ntơm tâm lơh hom đah n'gor păng, ƀư jêng drăp ndơn ma khân may.’

³² Y-Sihôn djôt leo lĕ rngôch bunuyh ƀon lan păng luh tâm lơh đah he ta Jahas.

³³ Ƀiălah Yêhôva Brah Ndu he hŏ jao jêh Y-Sihôn ma he, jêh ri he dơi lơh jêh hađăch nây, nđâp ma lĕ phung kon bu klâu jêh ri lĕ rngôch phung ƀon lan hađăch.

³⁴ Nôk nây hên sŏk lĕ rngôch ƀon toyh jêh ri ƀư rai lĕ phung bu klâu, phung bu ur nđâp phung kon se jê̆, mâu om du huê nuyh hôm rêh ôh.

³⁵ He knŏng djôt mât ma he nơm mpô mpa rong jêh ri lĕ ndơ pit sŏk bơh ƀon toyh he mhe pơ pit.

³⁶ Ntơm bơh Arôer gŭ ta kơh dak krong Arnôn, jêh ri bơh ƀon toyh gŭ tâm rlŭng tât ta Gilêat, mâu geh ôh du ƀon toyh nâp ir đah he. Yêhôva Brah Ndu he hŏ jao jêh ăp ntil ma he.

³⁷ Ƀiălah, he mâu dơi hăn ôh tât n'gor phung kon sau Ammôn ta kơh dak krong Jabôk jêh ri lĕ ƀon toyh tâm n'gor klơ dor yôk mâu lah lĕ ntŭk Yêhôva Brah Ndu he hŏ buay jêh he.”